Mark 14

¹Yaahanle mahiku manli ophiya niira na Paasikha ni na mikatthe soohiheliwa miropo. Alupale a anamukuttho n'awiixuttihi a ikano yaaniphavela enamuna yonvara Yesu ni mwiitiho, wira emwiive.

²Nto awo yaanihimya wira: Nihinvare vaniirani wira ohikhumelele onyakula eriyari y'atthu.

³Yesu arye-ene oPetaniya, owannyawe Simoni Namakuttula, alyaaka n'atthu, aahirwa muthiyana mmosa akunxe-ene murinki wiihaniwa alapastru, wasareiye makhura oowunkhela oowatta musurukhu yiihaniwa narto, nto aahicuula murinki'uwo onamwiitthela Yesu vamuru.

⁴Atthu akina yaari-vo yaahinanariwa n'itthu ele nto khupacerya ohimeeryana yiiraka: ?Makhur'ala aniihononeliwani?

⁵Tthiri vaareerenle otumihiwa ni musurukhu wa paratha ovikana imiya thaaru khukaweliwa alipa oohaawa.? Siiso yaanimuruwanasa muthiyan'owo.

⁶Vano Yesu aahahimeerya wira: Muhiyeeni. Munimuukhulelani? Ola ookirela etthu yooreera.

⁷Alipa oohaawa munookhalana eriyari anyu mahiku othene. Awo munoowerya owiirela sooreera okathi ontthunaanyu. Vano miyo khamunkikhalana mahiku othene.

⁸Ola iirale enwery'awe, ohoottiha makhura erutthu aka wira erowaniwe omahiye.

⁹Kinoohimeeryani ekeekhayi wira mapuro othene a olumwenku enrow'aya olaleiwa Ehapari Yooreera nave-tho yeela yiiraly'awe muthiyan'ola enrowa olaleiwaka uupuweleliwaka yoola.

¹⁰Yuta Iskariyoti mmosa a awiixutti ale muloko n'anli, aahirowa wa amakhulupale a anamukuttho wira aavahererye Yesu.

¹¹Awo yaahitteeliwa murima vanci-ene ni mwaha-ene yoowo nto yaahimuroromeliha onvaha musurukhu. Nave khupacerya ophavela enamuna xeeni yaakel'awe oonvariha.

¹²Nto, nihiku noopacerya na mikatthe soohiheliwa miropo, okathi wahel'aya mukuttho wa Paasikha, awiixutti yaahimukoha wira: Muntthuna wira nrowe woowi nalokikerye yoolya ya Paasikha?

¹³Nto Yesu aahaaruma awiixutti anli aahimeeryaka wira: Murowe omuttettheni munookumana ni mulopwana mmosa airenye-ene muno wa maasi mmutthareke.

¹⁴Etthoko enrow'awe okela mwamuhimeerye mwaneene emp'eyo wira: Mwiixuttihi onnookohani wira: Nri vayi nipuro ninrow'aka olya-vo niira na Paasikha vamosa n'awiixutti aka?

¹⁵Owo onimoothoonyeryani mpaani mwawe esaala yuulupale, eri osulu ereerihiwe mwakilokiherye memmo yooly'ahu.

¹⁶Vano awo yaahirowa, khukela omuttettheni yaahiphwanya sothene ntoko saahimeeryaly'awe Yesu nave khulikaniha yoolya ya Paasikha.

¹⁷Nsuwa nikenle-ene Yesu aahirowa n'awiixutti awe.

¹⁸Ekilaanthe-ene va meesa ely'aka, Yesu ahihimya wira: Kinooleelani ekeekhayi wira mmosa a nyuwo onlya ni miyo onookivariha.

¹⁹Awo yaahiriipiwa murima vanci-ene khupacerya mmosa mmosa omukoha yiiraka: Khino ti miyo?

²⁰Nto Yesu aakhulaka khwahimeerya wira: Ti mmosa a muloko nenli onrerya mparathoni vamosa ni miyo.

²¹Veekeekhayi Mwaana a Mutthu onimookhwa, ntoko silempw'aya mwa Soolempwa sa Yoowo. Vano ootakhaliwa t'ule onrowa onvahererya Mwaana a Mutthu. Fataari mutth'uwo ahaayariwe!

²²Okathi waaly'aya, Yesu aahikuxa mukatthe, aahimuxikhuru Muluku, aahikawanya khwaavaha awiixutti aahimeeryaka wira: ?Mukuxe mukhuureke ela ti erutthu aka.?

²³Nave aahikuxa ekoopho, aahimuxukhuru Muluku, khwaavaha yaawo nave othene aya yaahiwurya.

²⁴Yesu aahahimeerya wira: ?Ela t'iphome aka, ephome ya waataana wa Naanaano, yela enyeeheriwa mwaha w'atthu anci-ene.

²⁵Kinoohimeeryani ekeekhayi wira nkiniwurya-tho eviinyu mpakha nihiku ninrow'aka owurya evinyu esya moomweneni mwa Muluku.?

²⁶Numala wiipa isipo yaahirowa omwaako Olivera.

²⁷Nave Yesu aahahimeerya wira: Nyuwo othene ohiyu yoola munookihiya miyo okhala wira vaalempwa wira: Kinoomwiiva makampusi nave ipwittipwitthi sinoomwareya.

²⁸Nto miyo kahihimuwa mookhwaani kinimoohoolelani orowa oKalileya.

²⁹Vano Petru aahimya wira: ?Hata othene yoohiyakani, nto miyo nnaari.?

³⁰Yesu aahimwaakhula iiraka: Kinooleelani ekhweeli wira olelo ohiyu yoola, muthupi ohinatthi wiipa vanli nyuwo munookiruna imaara tthaaru.

³¹Nave aanihimya alipiheryaka wira: Koolikanana okhwa ni nyuwo, nkinoorunani hata vakhaani, nave-tho atthu othene yaanihimya enamuna emosaru.

³²Vano yaahiphiya nipuro niihaniwa Ketsemani. Yesu aahahimeerya awiixutti awe wira: Mukilaathi vaava miyo kinrowa ovekela.

³³Khumukuxa Petru, Yakopo ni Yohani. Vaavo aahipacerya oriipiwa murima ni ohaawa.

³⁴Nto khwahimeerya wira erooho aka yooriipiwa vanci-ene mpakha okhwa muhale vaava, ni mulipeleleke.

³⁵Nto vaaronw'awe vakhaani ohoolo, aahikokhora khuuramaka mpakha vathi, nave aahivekela wira: ?Vakhala wi vanniweryaneya, okathi uwo okivire.?

³⁶Owo anihimya wira: ?Abba.? Tiithi! Nyuwo munniwerya sothene, mukaakiherye ohaawa nno. Nto ehiireye ntoko sintthun'aka, yiireye ntoko sintthunanyu.

³⁷Numala aahihokolowela waari awiixutti khwaphwanya erupaka. Nto khumukoha Petru wira: ?Simoni, munoorupa? Muhooceela okiwehererya nnakhala mano ewoora emosa?

³⁸Nwehereryeke, ni nvekeleke wira muhimore mwehereriwaka. Veekeekhayi erooho wa enniilipiha, nto erutthu khilimpe.

³⁹Aahivenya-tho arowaka ovekela nave aahihimya-tho moolumo mamosa-ru.

⁴⁰Nto aahirowa-tho waari awiixutti khwaphwanya-tho erupaka, maana ikhove khisareera wavola. Hata awo khiyaasuwela omwaakhula.

⁴¹Ahokolowelaka ekwaha ya neeraru, nto aahahimeerya wira: Vano murupeke ni mmumuleke, paahi okathi woophiya. Tthiri Mwaana a Mutthu onrowa ovahereriwa mmatatani mwa-alipa oottheka.

⁴²Nvenye nrooke. Owo onrwa-vo mulipa onrwa okivariha.?

⁴³Nlelo Yesu iira alavulaka okathi waaphiyaly'awe Yuta mmosa a wiixutti muloko n'anli. Aaruuhaka atthu anci-ene yaakunxe-ene axoowa n'ikopo. Yaarummwe ni makhulupale a anamukuttho, n'awiixuttihi a ikano ni mahumu.

⁴⁴Vano ole aarowa onvariha aahaavaha ethoonyeryo iiraka: Ole miyo kinrow'aka onvaha epeeco, ti yoowo, munvareke ni mmurowaneke.

⁴⁵Yuta aphiyaka-ru, aahimwaattamela Yesu khunvaha epeeco aanamwiirela: Mwiixuttihi, Mwiixuttihi.

⁴⁶Naanaanoru yaahinvara yoowo khomutthukwa.

⁴⁷Vano mmosa aari ni Yesu aahimutholola xoow'awe aahimukwasa naaru murumeyi a mukhulupale a anamukuttho.

⁴⁸Vano Yesu aahaakoha wira: Muruiye-va naaxowa, n'ikopo, wira mukivare, ntoko wira miyo ka nawiiye?

⁴⁹Mahiku othene kaakhala ni nyuwo kiixuttihaka mpaani mwa Muluku, nto khimwaakivanre! Eyo enthoonyerya wira Soolempwa sihaana omaliheriwa.

⁵⁰Okathi-ene yoowo awiixutti awe othene yaahimuhiya khutthyawa.

⁵¹Nto mmiravo mmosa aawanre mukhumi paahi taamutthara Yesu. Khuvariwa,

⁵²nto aahihiya mukhumy'awe khutthyawa ahiwanr'etthu.

⁵³Numala yaahimuroiha owanny'awe mukhulupale a anamukuttho, weiwo yaathukumann'ayawo makhulupale a anamukuttho, mahumu, n'awiixuttihi a ikano.

⁵⁴Petru aanimuttharelela Yesu eettaka ottaiwene mpakha vate va mukhulupale a anamukuttho. Aahikilaathi vamosa ni arumeyi khiyoora mooro.

⁵⁵Makhulupale a anamukuttho ni alipa oophuka milattu othene aya yaaniphavela mulattu woomuhimyana Yesu wira emulamule wiiviwa, nto khiyaaphwanya.

⁵⁶Atthu anci-ene yaanimootherya Yesu itthiru, nto moolumo aya yaanivirikana.

⁵⁷Vano akina yaanivenya enamootherya ehimyaka wira:

⁵⁸Hata hiyo noomwiiwa ahimyaka wira: Kinookomolela vathi emp'ela ya Muluku etekiwe ni matata a atthu nave mahiku mararu paahi kinooteka ekina, yoohitekiwa ni matata a atthu.

⁵⁹Nlelo nto moolumo aya khiyaalikana.

⁶⁰Okathi uwo mukhulupale a anamukuttho aaheemela eriyari y'atthu othene, khumukoha Yesu iiraka: Nyuwo khamunaakhula etthu? Atthu ala anoohimyanani exeeni?

⁶¹Nto Yesu nlelo aaroomaala nave khaakhunl'etthu. Vano mukhulupale a anamukuttho aahimukoha-tho wira: Ti nyuwo Kristu, Mwaana a Muluku oottottopeliwa?

⁶²Nave owo aahaakhula iiraka: ?Ayo, ti yomi. Munoomoona Mwaana a Mutthu akilanthe-ene moono woolopwana wa Muluku ooweryaxa ni arwaaka mmeekuni a wirimu.?

⁶³Mukhulupale a anamukuttho vaaiwaly'awe siiso aahaahula soowara s'awe, nthoonyeryo nooviruwa, ahimyaka wira: Khinnimphavela-tho-va namoona mukina.

⁶⁴Nyuwo muhiiwa enamuna ola onveehaly'awe Muluku, munuupuwela sayi? Othene aya yaahimulamulela wiiviwa.

⁶⁵Akina yaahipacerya omusenyerya. Enamukhuneela owiitho, enammanakasa nto yaanimukoha wira: ?Haya omuhimye oomanne, wakhala wira wa profeta.? Nave atthu yaamulipelela yaahimmana epuurata.

⁶⁶Okathi Petru vaakilanthe awe vathi va nivate aahiphiya murumeyi mmosa muthiyana a mukhulupale a anamukuttho.

⁶⁷Owo amoonaka-ru ooraka mooro aahinwehexexa oratta-ene nto khumuhimeerya wira: ?Nyuwo-tho mwaari ni Yesu mu Nasareti!?

⁶⁸Vano Petru aahikhootta iiraka: ?Nkinimusuwela, ni hata nkiniiwa enihimy'anyu.? Numala aahivenya vale khurowa mpirothi nto okathi-ene yoowo muthupi waahiipa.

⁶⁹Nave murumeyi mwaamuthiyana aahithipelela onwehexexa Petru nto aahahimeerya atthu yaari vaavale wira ola mmosa a yaale.

⁷⁰Nave owo aahikhootta-tho. Nuuvira okathi vakhaani atthu yaari vaavale yaahimwiirela Petru wira: ?Khivanaayiheriwa-tho wira nyuwo mwa mmosa a yaawo, maana ni nyuwo-tho mwa mu Kalileya.?

⁷¹Nto owo aanilaphela ahimyaka wira: ?Nkinimmusuwela mulopwana owo nyuwo munimuhimya'anyu.?

⁷²Okathi yoowo, muthupi waahiipa vaneenli. Naanaanoru Petru aahuupuwela moolumo aahimeeriw'awe ni Yesu wira: ?Muthupi ohinathi wiipa imaara piili nyuwo munookiruna imaara thaaru.? Vano aahitthyawela ota, khiyanla.