Mark 13

¹Yesu akhumaka mpaani mwa Muluku, wiixutti awe mmosa aahimuhimeerya wira: Mwiixuttihi, moone maluku ale ni moone ipa iye.

²Vano Yesu amwaakhulaka, aahimuhimerya wira: Munnoona wunnuwa wa ipa iya? Khaninrowa ohala nluku vasulu va nikhw'aya, nihinrowa omoroxeliwa vathi.

³Yesu aahikilaathi omwaako Olivera awehaka empa ya Muluku. Vano Petru ni Yakopo ni Yohani n'Antere yaahimukoha wiiphini yiiraka:

⁴?Munihimeerye itthu iya sinrowa okhumelela lini? Nave ethoonyeryo xeeni enihimya wira seiyo sothene sihanle okhumelela??

⁵Vano Yesu aahipacerya waahimeerya iiraka: ?Mwiipasoope muhiihiyererye mootothiwaka ni mutthu-ti-mutthu!

⁶Anookhumelela anawootothe anci-ene ni nsina n'aka ehimyaka wira: Moopoli ti miyo.? Nto anoowoototha atthu anci-ene.

⁷Mwaiwa ehimmwaka wira yokhala ekhotto mapuro othene muhoove. Itthu iyo sihaana okhumelela, nave khasin'himya wira tuumala wene w'elapo.

⁸Maloko anootuphela maloko makhw'aya, mulaponi sinookhumelela ikhotto. Enookhumelela etetere ni etala mapuro manci-ene. Sookhumelela iya sinrowa okhala ntoko owereya woopacerya w'okathi w'oyara.

⁹Mwiipasoope vanci-enexa! Munoorowa ohoolo wa ma Kuvernatoro ni wa mamwene, mwaha wa, miyo, ni siiso munookhalano okathi woowaahimeerya onamoona wa nsina n'aka.

¹⁰Vano sothene iyo ihinatthi wiiraneya ehaana toko olaleiwa Ehapari Yooreera mmalokoni mothene

¹¹Okathi onrow'anyu ovariwa khuvahereriwa makhulupale, muhivela-vele muupuwelaka sintthun'anyu ohimya. Muluku onimoovahani moolumo anrowanyu ohimya okathi-ene yoowo. Tthiri khamuhiyo nyuwo munrowa olavula, Erooho Yooreera tenrowa olavula.

¹²Onookhumelela okathi mutthu onrowawe waakuxa axin'awe aavahererye wira yaiviwe nave anamuyari anrowa waavahererya an'aya. Nave anamwane anrowa waarukunuwela anamuyari aya wira ewiive;

¹³nyuwo munoonyokhiwa n'atthu othene mwaha wa miyo. Vano ale anrowa okhalela nthiti mpakha woomaleloni yaawo t'ani yoopowe.

¹⁴Tthiri mwoona yootakhala yoowoopiha ekhalaka mapuro wahaareerelaya okhala, (ale ansoma animwiiwa) nto ale anrowa okhala elapo y'oYuteya atthyawele omiyakoni.

¹⁵Ole ori vampani, ahikhuruwe, ahikele mpaani okuxa etthu.

¹⁶Ni ole ori omatta ahihokolowele owaani wira akuxe yoowar'awe

¹⁷Mahiku yaawo ootakhaliwa athiyan'ala anrowa ophwanyiwa erupanle-ene n'ale anrowa omwaamwihaka mwaana.

¹⁸Munvekeleke Muluku wira itthu iya sihikhumelele eyiita.

¹⁹Okhala wira mahiku ene yaawo onrowa okhala ohaawa wuulupale ohinakhumelele okhuma woopaceryani w'elapo mpakha-va, nave khunrowa-tho okhumelela ohaawa siiso

²⁰Nave Apwiya yahaavukunle mahiku awo, waaso khaavo aarowa woopowa. Nto mwaaha w'atthu awe oothanliwa, Muluku ahalaka ovukula mahiku a okathi owo.

²¹Akhala onoohimeeryani wira: ?Mmoone, Moopoli ori-va,? wala Moopoli ori iwe, muhimwaamini!

²²Maana anookhumelela atthu oowiipaka aKristu ni oowiipaka maprofeta nave anoopaka ithoonyeryo ni miiriirya wira ewootottheke atthu hata yawerya vale anoowoototha oothanliwa.

²³Moone saana miyo kihooleelani sothene sihinatthi okhumelela.

²⁴Numala mahiku yaawo oohaawa, nsuwa nnooriipa nave mweeri onoohiya waarya w'aya.

²⁵Ittheneeri sinoomora wirimu nave ikuru sa wirimu sinoottikinyeya.

²⁶Vano munoomoona Mwaana a Mutthu arwaaka mmeekuni n'uwerya wuulupale ninttittimiho.

²⁷Nave owo onimwaaruma ankelo awe wira yaathukumanye oothanliw'awe okhuma woopaceryani w'elapo mpakha wookiseryani w'erimu.

²⁸Tthiri mwiixutte nlikanyiho nla na mwiri wa mpheera: Okathi iritta saya simpacerya'aya ophituwa ni inaphuwa makukhu, munnisuwela oratta-ene wira eyiita eri vakhiviru.

²⁹Nave-tho siiso nyuwo okathi onrow'anyu woona sikhumelelaka itthu iya, musuweleke wira vano, ori vakhiviru, ni ori vamukhora.

³⁰Kinooleelani ekhweeli wira itthu iya sothene sinimwiiraneya atthu ala ehinatthi ovira.

³¹Erimu n'ilapo ya vathi, sinoomala nto moolumo aka khanimala.

³²Vano khaavo onsuwela vanrwaya nihiku nlo hata okathi uwo nnakhala ankelo a wirimu, nnakhala Mwaana, Atiithi paahi t'asuwenle.

³³Mwiipasoope, nwehereryeke, maana khamunsuwela vanrow'aya ophiya nihiku nlo.

³⁴Vari ntoko mutthu mmosa orina ekwah'awe ahinatthi ovenya vate vawe onnaahiyerya arumeyi awe miteko sa vate: Khula mutthu muteko awe, khumuruma mulipa oolipelela mukhora wira alipeleleke.

³⁵Tivo, mulipeleleke, maana khamunsuwela vanrowawe ohokolowa mwaneene empa, onrwa makaaripi. Hata ohiyu eriyari, khino vaniipa muthupi, kaahiki vaxaka.

³⁶Vahiiraneye wira orwaaka naanaanoru oophwanyeni murupaka.

³⁷Itthu iya sinoohimeeryaakani kinaahimeerya atthu othene wira; mulipeleleke.