Mark 12

¹Yesu aahipacerya waalaleerya atthu ni nlikanyiho ntoko nla: Ahikhala mutthu aaphatten'ye mwiri wa ewuva mmatta mw'awe, aahitekelela mukuso mukhere-khere, aahithipa nipuro noowama mihokorokho nave aahiteka-tho empa yoorupelela. Numala aahiwooliha alimi akina wira elimeke, nto aahikhuma arowaka elapo ekina.

²Waaphiyaly'aya okathi woohepha, mwaneene ematta aahimuruma murumeyi awe orowa w'alimi ale wira aakhele epantte ya mihokorokho sawe.

³Nto alimi awo yaahinvara murumeyi owo yaahimmana khumoomola matata-ru.

⁴Vano mwaneene ematta aahimuruma murumeyi mukina n'uwo-tho yaahimmana va muru khunveeha.

⁵Ahaarumihela-tho murumeyi mukina aneeraru. Awo khumwiiva. Nave-tho anci-ene akina yaaronwe-wo yaahaamana akina yaahiwiiva.

⁶Mwaneene ematta vano aahalanne mmosa, mwan'awe amphentex'awe, nto aahaarumihela mwan'awe yoowo uupuwela wira: Mwaana'kola awo anoomuttittimiha.

⁷Nto awo yaahihimeeryana yaawo-ru wira: Ola t'unrowa ohalana itthu s'atiithi awe. Haya nimwiive soohiyeriwa s'awe ikhale s'aw'ihu

⁸Tthiri yaahinvara khumwiiva emurihela ota w'ematta.

⁹Vano mwaneene ematta ontthuna wiira sayi? Mwaneene yoowo onrowa, owiiva alimi ale ni wavaha akina ematta.

¹⁰V'ekeekhayi nyuwo moosoma moolumo a Soolempwa anihimya wira: ?Nluku alipa ooteka empa naakhoottaly'aya nookhalihiwa nluku nuulupalexa,

¹¹eyo enikhuma w'Apwiya, nave etthu yootikiniha vamaithoni vahu.?

¹²Vano makhulupale a aYuta yaaniphavela enamuna yoonvara Yesu, maana yaanisuwela wira nlikanyiho nle yaahimmwa yaawo. Nto yaanoova muttitthi w'atthu ti vo yaamuhiyaly'aya Yesu enarowa.

¹³Vano-nto yaahimurumihela Yesu aFarisi akinaku, vamosa n'atthu a Heroti, wira yaamulupatthe n'itthu saahimy'awe.

¹⁴Okathi yaaphiyaly'aya wa Yesu, yaahimwiirela: ?Mwiixuttihi, noosuwela wira nyuwo mwa mutthu muneettela exariya ni khamuncala sinuupuwel'aya atthu. Tthiri khamunthanla makhalelo a mutthu, nto munnixuttiha n'uroromeleya ephiro ya Muluku. Vano haya munihimeerye etthu emosa: Nliveke wala nihiliveke mpooxito wa mwene Kesari? Ayo wala nnaari??

¹⁵Yesu aahisuwela wothererya waya nto khwaakoha iiraka: ?Xeeni muhalaka orwa okeehererya? Nkaruuhani-va musurukh'uwo koone!?

¹⁶Awo yaahimuruuhela musurukh'ule nave Yesu aahaakoha wira; ?Elatarato ela va ni nsina nlempwe vaava ti nawani?? Nto awo yaahaakhula wira: Ti na mwene Kesari.

¹⁷Vano Yesu aahahimeerya wira: Munvahe mwene Kesari ele ekhanle ya mwene Kesari nave munvahe Muluku ele ekhanle ya Muluku. Awo yaahitikinihiwa vanci-ene ni waakhula w'awe.

¹⁸ASatukhi akina, yaawo yahaakupali ohihimuwa w'alipa ookhwa yaahimwaattamela Yesu khumukoha wira:

¹⁹?Mwiixuttihi, Monse oonihiyerya yoolempwa wira: Mulopwana akhwa nto khumuhiya mwaar'awe ahiyaranne mwaana, muhim'awe ohaana omuthela naamukhweli owo, wira amuyarele aana muupaly'awe ole okhwiiye.

²⁰Vano yaahikhala axinna athanu n'anli. Ole oopacerya aahithela khukhwa ahiyaranne mwaana.

²¹Muhim'awe oottharelana aahimuthela n'amukhweli n'uwo-tho khukhwa ahiyaranne mwaana. Khuniiraneya ni muhim'awe aneeraru,

²²siiso othene aya yaahikhwa ehiyaranne mwaana. Numala aahikhwa muthiyan'owo.

²³Vano nihiku noohihimuwa evenyaka mookhwaani muthiyan'owo onrowa okhala awani? Maana othene aya athanu nanli yamuthenle yoowo!?

²⁴Yesu aahiwaakhula wira waaso kahiyo munvonya mwaha woohisuwelaka soolempwa hata owerya wa Muluku?

²⁵Okathi alipa'ookhwa onrow'aya ohihimuwa mookhwaari anrowa okhala ntoko ankelo a wirimu. Atthu anihihimuwa mookhwaani khanrowa othelaka nnakhala otheliwaka.

²⁶Nto mwaha wohihinuwa w'alipa ookhwa, khamunasome mulivuruni mwa Monse enamuna Muluku saamulavulihaly'awe vamwiiwani waavarela mooro, amuhimeeryaka wira: ?Miyo ka Muluku a Aparahaamu ni Muluku a Isaakhi ni Muluku a Yakopo?

²⁷Tthiri Muluku kahiyo a alipa-ookhwa, ka Muluku a ekumi. Tivo nyuwo khamureere ovonya.?

²⁸Mwiixuttihi mmosa a ikano aahimwaattamela nave aahiiwa evaanyihanaka nto voonaly'awe wira Yesu aahiwaakhula oratta-ene aahimukoha wira: Yooruma yoopacerya mwa moolumo othene piivi?

²⁹Yesu aahimwaakhula wira Yooruma yuulupale t'ila: N'wiriyane Isarayeli! Apwiya Muluku ahu, ti Pwiya mmosa-ru paahi.

³⁰Mwaaphenteke Apwiya Muluku anyu ni murim'anyu wothene n'iroho anyu yothene n'usuwela wanyu wothene n'ikuru sanyu sothene.

³¹Nave yooruma ya nenli enlikanan'aya t'ila: ?Mumphenteke mukhw'inyu ntoko siniiphent'anyu mmansinyu. Khiivo yooruma yuulupalexa envikana sooruma iya.?

³²Nave mwiixuttihi a ikano khwiira: Khivareere oreera, Mwiixuttihi! Moolavula ekeekhayi, muhimaly'anyu wira Muluku ori mmosa paahi nave khaavo-tho mukina ahikhanle yoowo,

³³nave wira nihaana omphenta ni murima wothene, ni wiiwelela wothene, n'ikuru sothene, ni wira nihaana omphenta mukhw'ihu ntoko siniiphent'ahu mmansihu. Vannitepa oreera wiiwelela ikano iya ovikana mikuttho soopaha inama ni sooveleela sikina sinlikana n'iseiyo.

³⁴Yesu aahoona wira khivaareere oreera mwiixuttihi ole a ikano enamuna yaakhunly'awe nto khumuhimeerya wira: ?Nyuwo khamurakamenlanne ni omwene wa Muluku.? Numala itthu iya, khaavo-tho aaminyanle omukoha.

³⁵Nihiku nimosa Yesu viir'awe aaxuttihaka atthu mpaani mwa Muluku, aahaakoha enamuna ela iiraka: Awiixuttihi a ikano anniixuttiha wira Moopoli osuulu wa Taviti?

³⁶Moone wira Taviti mmansawe aahisuwelihiwa ni Erooho Yooreera wira Muluku ohaahimeerya Apwiyaka iiraka: Mukilaathi moono aka woolopwana, mpakha miyo waakuherya awanan'inyu vathi va inawu s'anyu.

³⁷Vano, Taviti yoowo ahimyaka wira Moopoli ti Pwiyaka, nto Moopoli onkhakala sayi osuulu awe? Muttitthi wothene w'atthu waanimwiiwa Yesu n'usiveliwa n'iye saahimy'awe.

³⁸Awiixuttihaka siisale, Yesu aahihimya-tho wira: Mwiipasoope n'awiixuttihi a ikano, Awo wasivela weettakasa ewanre-ene ikuwo soorekama, n'okhomasiwa mmapuwani.

³⁹Anniithanlela mapuro oopacerya mpaani moothukumana ni mapuro oopacerya a muniirani

⁴⁰Annoolya mihakhu s'anaamukhweli nave annoothererya yiiraka mavekelo oorekama. Nto Muluku onimwaahukhumu vanci-enexa mwaha wa yeeyo.

⁴¹Yesu akilaathale-ene ohoolo wa nipuro naaheliwa musurukhu, aaniweha enamuna atthu saahel'aya-mo musurukhu nipuro nlo, nave athaaciri anci-ene yaanihela-mo musurukhu munci-ene.

⁴²Vano aahirwa muthiyana naamukhweli oothoiwa khuhela-mo onkurusaato miili, owo otakaaxerya waphiyerya etoosu.

⁴³Yesu aahiwiihana awiixutti nto khwaahimeerya wira: ?Veekeekhayi kinnohimeeryani wira naamukhweli ola oothoiwa oovaha waavikana atthu othene.?

⁴⁴Maana othene ahenle-mo musurukhu waaxuwa, nto naamukhweli ula n'uthoiwa wawe, ooleva sothene saarin'awe, muhakhu awe wothene.