Mark 11

¹Numala ovira oPetania ni oPetifaxi, yaahiphiya vamwaako Olivera, waattamela oYerusalemu. Yesu aahaaruma awiixutti anli,

²aahimeeryaka wira: Murowe muttetthe ori ohoolo iwe. Mukelaka-ru memmo munoophwanya mwaapuuru atthukeleliwe, ohinathi weettaniwa nlelo. Mwamutaphule nto mmuruuhe naanaano-va.

³Akhala onookohani wira exeen'iyo eniir'anyu-vo, mmuhimeerye wira Apwiya t'animphavela. Anoomuhokoloxerya vaava.

⁴Awo yaahirowa nave veekeekhayi yaahimphwanya mwaapuuru atthukeleliwe vate oluluwana ni mukhora wa ota emutaphula.

⁵Vano atthu akina yaari vaavale yaahaakoha wira: Exeeni enimutaphulel'anyu mwaapuuru owo?

⁶Awo yaahaakhula ntoko Yesu saahimeeraly'awe nave awo yaahiweemiherya.

⁷Awiixutti yaahimuroiha mwaapuur'ule wa Yesu, yaahaatala malay'aya ottuli wa mwaapuuru yoowo nave Yesu aahin'wela.

⁸Vano atthu anci-ene yaanaatala malay'aya mphironi nave akina yaatala makukhu a miri yaaikintth'aya mmatta.

⁹Nave atthu yaahanle ottuli n'ale yaahoonle yaanikhuwela yiiraka: ?Attittimihiwe Muluku! Attottopeliwe ole onrwa ni nsina n'Apwiya!

¹⁰Oreerihiwe Omwene onrwa omwene wa Taviti, Tiith'iahu Attittimihiwe Muluku wirimu-rimu.?

¹¹Yesu aahiphiya oYerusalemu. Khukela mpaani mwa Muluku nave aahiweha itthu sothene saari memmo, nto okhala wira vaahiila, aahirowa o Pethaniya n'awiixutti muloko naanli.

¹²Mmeeloni mw'aya, ahokolowaka oPetania, Yesu aahivoliwa etala.

¹³Aahoona ottaiwene mwiri wa mpheera waari ni makukhu manci-ene. Nto, okathi waaphiyaly'awe mmukhitte mwa mwiri, aahoona wira owo waarina makukhuru paahi, maana khiwaaphiyale okathi oniim'aya.

¹⁴Vano Yesu aahiirela mwir'ule: ?Ahikhale-tho onrowa olya mihokorokho s'awo!? Nave awiixutti yaahiiwa moolumo ale.

¹⁵Vaaphiyaly'aya oYerusalemu, Yesu aahikela mpaani mwa Muluku khupacerya owoomola-mo ale yatumiha naale yaathuma. Aahipittula meesa a ale yaakakhanya musurukhu ni minyukhu saale yatumiha ipompa;

¹⁶nave khaamutthuniherya mutthu okuxa etthu mpaani mme.

¹⁷Numala aahipacerya owiixuttiha iiraka: Muluku oohimya mu Soolempwa sawe wira: Empaaka enimwiitthaniwa empa yoovekela-mo ya maloko othene. Nto nyuwo moothatuxa okhala nikhuku nan'awiiye.

¹⁸Makhulupale a anamukuttho n'awiixuttihi a ikano esuwelakaru etthu ila yaahipacerya ophavela enamuna yoomwiiva Yesu. Nto yaanimoova, okhala wira atthu yaanitikinihiwa ni mwiixuttiho awe.

¹⁹Vaailaly'aya, Yesu n'awiixutti yaahikhuma mmuttettheni.

²⁰Nihiku nikina, vaasiisu ene yaahivira vakhiviru va mpheera y'ole nto yaahoona wira owo waahuuma ni mitathaari sene.

²¹Petru aahuupuwela yiiranen'iye mahiku vakhaani nto khumuhimeerya Yesu: ?Mooneke, Mwiixuttihi! Mpheer'ola muulumenly'anyu tthiri ohuuma!?

²²Nto Yesu aahahimeerya awiixutti wira: ?Mmwaaminiki Muluku!?

²³Kinnooleelani ekeekhayi wira mwiirela mwaako ola wira: ?Muthaame-vo mwairihele mphareya,? nto muhihoveryaka mmurimani mw'anyu, nave mwaaminiki eyo enihimy'anyu, siiso vanimwiiraneya.

²⁴Tivo kinoohimeery'akani wira: Sothene munivek'anyu ni ?mavekelo? mwaaminiki ntoko muroovahiwa nave siiso vanimwiiraneya

²⁵Mwaavekelaka vale, muupuwela wira moonanariwa ni mukhw'inyu, mmulevelele toko, wira Atiith'inyu, ari wirimu, yooleveleleni-tho itampi sanyu.

²⁶Nto mwaahaaleveleleke akhw'inyu atiith'inyu a wirimu nave khanoolelelani.

²⁷Yaahitthikela-tho oYerusalemu. Yesu eettaka mpaani mwa Muluku, makhulupale a anamukuttho, awiixuttihi a ikano ni mahumu yaahimwaattamela

²⁸nto khumukoha wira owerya xeeni oniiran'anyu itthu iya? Taani oovan'heni owerya iwo?

²⁹Yesu aahiwaakhula wira: ?Ni miyo-tho kinimookohani, mwakaakhula-ru, kinimoohimeryani owerya oniiran'aka itthu iya.?

³⁰Vano kihimeeryeni: Yohani aapatisa nuuwerya wa Muluku wala w'atthu?

³¹Nto awo yaahipacerya ovaanela mukina ni mukhw'awe yiiraka: Naakhula wira waakhumme wa Muluku owo onoonikoha wira weeso mwahaamwaminelani Yohani.

³²Namuhimeerya wira waakhumme w'atthu, nave yaaniwoova atthu maana atthu yaanimukupali Yohani okhala profeta a ekeekhayi.

³³Tivo yaamwaakhunly'aya wira: ?Khaninsuwela.? Nave Yesu aahahimeerya wira: Paahi ni miyo nave nkinoohimeeryani owerya oniiranaaka itthu iya.