Mark 10

¹Yesu aahikhuma vale khurowa muttetthe w'oYuteya ni ekhopela ekina ya muro Yortani. Waahithukumana-tho muttitthi w'atthu ohoolo w'awe, yaawo Yesu aawiixuttiha ntoko saalimalenly'awe.

²Afarisi akina yaahimwaattamela nto khumukoha ephavelaka omweehererya yiiraka: ?Vannireerela mulopwana waahiya amwaar'awe??

³Yesu aahaakhula ni aahaakoha wira: ?Monse oorummeni exeeni??

⁴Awo khwiira: ?Monse aahimutthuniherya mulopwana waalepela amwaar'awe epaphelo yoomwalana nto khuyamwalana.?

⁵Vano Yesu aahahimeerya wira: ?Monse ohoolepelani nikano nla mwaha woosuwela wira mw'atthu oolipa murima.

⁶Nto ekhumelo ya woopaceryani woolumwenku. Muluku ompattunxe mulopwana ni muthiyana.

⁷Tivo, mulopwana onimwaahiya atiithyi awe n'ame awe wira aphitaane ni mwaar'awe,

⁸Nave oowanli aya anikhala mwa mutthu mmosa paahi, siiso awo khanikhala atthu anli, anikhala mutthu mmosa paahi,

⁹Tivo, mutthu ahimwalanyihe yeeyo Muluku ophitaanny'awe.?

¹⁰Vaaphiyaly'aya owaani, awiixutti yaahimukoha-tho Yesu mwah'ene yoola,

¹¹Nave owo aahahimeerya wira: ?Mulopwana onimuhiya mwaar'awe khumuthela mukina, onimuraruwela mwaar'awe ole oopacerya.

¹²Nave wa enamuna emosa-ru muthiyana onimwalana ni iyaawe anatheliwa ni mulopwana mukina onooraruwa.?

¹³Atthu akina yaanimuruhela Yesu anamwane wira aareerihe, nto awiixutti yaanaapwapwela atthu awo.

¹⁴Yesu voonaly'awe etthu ila aahinanariwa nto khwaahimeerya awiixutti wira: ?Mwaahiye anamwane ekirweeleke miyo! Muhaakhoottiherye, omwene wa Muluku ti waw'aya ale ari ntoko axinamwan'ala.

¹⁵Muupuwele wira ole ohinrowa okhala ntoko mwana-mwane wira aakhelele omwene wa Muluku khanikela mu Mweneni memmo.?

¹⁶Numala aahaakuxa anamwan'awo awiixaatherya matata nto khwaareeriha.

¹⁷Okathi Yesu waakhumaly'awe vale, mulopwana mmosa aahimutthimakela khumukokhorela ohoolo w'awe nto khumukoha iiraka: ?Mwiixuttihi ooreera murima, kiireke exeeni wira kiphwanye ekumi ehinimala??

¹⁸Yesu aahiwaakhula iiraka: ?Munkiirelelani ooreera murima? Ooreera murima Muluku paahi, ni khaavo-tho;

¹⁹veekeekhayi munnisuwela sooruma sinihimya wira: Muhimwiive mutthu, muhiraruwe, muhiiye, muhimootherye mutthu, muhiwootothe akhw'inyu, mwaattittimihe atiith'inyu n'ame anyu.?

²⁰Nto mulopwan'owo khwiira: ?Mwiixuttihi, okhuma enamwane aka kinneettela sooruma iya.?

²¹Yesu aahinwehexexa n'uphenta nto khumuhimeerya wira: Nlelo ennohaleelani etthu emosa. Murowe mwatumihe sothene sirin'anyu musurukhu-ene mwaavahe alipa oohaawa. Siiso munookhalana muhakhu wirimu. Numala murwe mukithareke.

²²Owo aahiriipiwa murima ni moolumo ale nto aahirowa ahisiveliwe, okhala wira aahikhalana muhakhu munci-ene.

²³Vano Yesu aawehaka awiixutti awe, aahahimeerya wira: ?Etthu yoorika vanci-ene athaaciri okela mu mumweneni wa Muluku!?

²⁴Awiixutti yaahitikinihiwa ni moolumo ale. Nave Yesu ahaahimeerya-tho iiraka: Anaaka kinoolelani wira orikarika ale anroromela muhakhu okela mu Mweneni wa Muluku!

²⁵Ti vookhweyaxa ekamelo ovira vaphakani vanttottho ohikhanle tthaciri okela mu Mweneni wa Muluku.

²⁶Khula emaara awiixutti yaamutepa otikinihiwa n'iye yaaiwaaya, nto khunakohana yiiraka: Nto siiso onwerya woopowa taani?

²⁷Yesu aahaawehexexa khwiira: V'ekeekhayi, etthu atthu ehinweryaya, nto Muluku khanooceela. Tthiri Muluku onniwerya sothene.

²⁸Vano Petru aahimukhoha Yesu wira: ?Hiyo va noohiya sothene nnoottharani nyuwo.

²⁹Yesu aahaakhula wira: ?Tthiri miyo kinoohimeeryani ekeekhayi wira ole ohiyale emp'awe, n'axinn'awe, axirokor'awe, n'amey'awe, n'atiithy'awe, naan'awe, wala imatta s'awe mwaha wa miyo ni wa Ehapari Yooreera,

³⁰onimwaakhela voovikana miloko muloko, vathi vaava, ipa, n'axinna, n'axirokora, n'aximayi, n'anamwane, n'imatta nave-tho n'ulupatthiwa. Nave woomaliheryani woolumwenku onimwaakhela ekumi ehinimala.

³¹Anci-ene ari oopacerya, anookhala ookiserya, nave okiserya anookhala oopacerya.?

³²Erowaka ephiro ya oYerusalemu, Yesu aahirowa ohoolo w'awiixutti. Awo yaahixanka n'ale yaamutthara yaahisareya woova. Vano Yesu aahiwiitthana-tho awiixutti ale muloko naanli wiphiini nto aahipacerya waahimeerya sothene saarowa omukhumelela iiraka:

³³?Mwiiwe saana! Vano ninrowa oYerusalemu, weiwo Mwaana a Mutthu onoovahereriwa mmatatani mwa amakhulupale a anamukuttho ni mwa awiixuttihi a ikano sa Monse. Awo anoomulamula wiiviwa ni anoonvahererya wa amalapo,

³⁴y'awo anoorowa omunyohola, ni omusenyerya, n'ummana nave anoomwiiva. Nto mmurottoni mw'aya owo onoohihimuwa.?

³⁵Yakopo ni Yohani, anamwane a sepeteyo, yaahimwaattamela Yesu nto khumuhimeerya wira: ?Mwiixuttihi, nimphavela woovekelani etthu emosa.?

³⁶Nto Yesu aahiwakhula wira: Muntthuna wira kiwiireleni exeeni?

³⁷Awo khumuhimeerya wira: Munihiye nikilaathi mapuro manli oopacerya munttittimihoni mw'anyu.

³⁸Yesu aahitthikela owaakhula iiraka: Nyuwo hata khamunsuwela etthu enkivekel'anyu. Munoona wira munoowerya owurerya ekahi y'ohaawa miyo enrow'aka owurerya ni opatisiwa ntoko sinrowaka opatisiwa miyo?

³⁹Awo yaahaakhulela yiiraka nnoowerya ayo. Vano Yesu ahaahimeerya-tho iiraka: Vekeekhayi, nlelo munoowurerya ekahi y'ohaawa kinrow'aka owurerya ni munoohaawa ntoko sinrow'aka ohaawa,

⁴⁰nto okilaathi mapuro manli oopacerya nkihiyo miyo kiniwiirelani. Mapuro awo taawaya ale Muluku aathanlaly'awe.

⁴¹Awiixutti akina muloko yaahiiwa mwah'owo nto yaahinviruwela vanci-ene Yakopo ni Yohani.

⁴²Vano Yesu aahiwiihana othene khwaathukumanya nto khwaahimeerya wira: Ntoko sinsuwel'anyu, ale anaalamulela atthu aakhalana ikuru sinaawerya atthu awo, Nave makhulupale t'ale anaaruma.

⁴³Vano eriyari ya nyuwo ehiiraneyeke etthu ene yeeyo. Ohiya-tho vo, ole ontthuna okhala muulupale variyari v'anyu ohaana waarumeela akhw'awe.

⁴⁴Nave ole oniphavela okhala oopacerya aikhalihe murumeyi a atthu othene.

⁴⁵Maana Mwaana a Mutthu nave-tho khaarweenle orumeeliwa, Owo orwenle orumeela ni ovaha ekumi awe wira awoopole atthu anci-ene.

⁴⁶Yaahiphiya oYeriko, nave okathi Yesu waakhum'awe omuttettheni n'awiixutti, n'atthu anci-ene, aahimphwanya mulopwana mmosa oohoona nsina nawe Partimeyo mwaana a Timeyu, aavekela esimola mmphironi.

⁴⁷Mulopwan'ole oohoona aiwakaru wira aari Yesu a oNasareti aavira, aahipacerya okhuwela iiraka: Yesu Mwaana a Taviti, mukimorele ikharari!

⁴⁸Atthu anci-ene yaanimpwapwela ni yaanimwiirela wira amaale, nto owo nlelo aamutepa okhuwela iiraka: Mwaana a Taviti, mukimorele ikharari!

⁴⁹Nto Yesu aaheemela khwaahimeerya wira: ?Nkamwiihaneni arwe-va.? Awo yaahirowa nto khumuhimeerya wira: ?Mulipihe murima, owo onoowiihanani.?

⁵⁰Mulipa oohoon'owo aahiriha mukhumi awe, aahivenya khurowa waari Yesu.

⁵¹Vano Yesu aahimukoha wira: ?Muntthuna kiwiireleni exeeni?? Nto owo aahaakhula iiraka: ?Kho Mwiixuttihi! Kaaphavela otthikela woona.?

⁵²Yesu aahimwirela wira: ?Murooke! Waamini w'anyu wowoopolani.? Naanaanoru Partimeyu aahitthikela woona nave aahimutthara Yesu ephiro yaarow'awe.