Mark 9

¹Nave aahihimya-tho wira: ?Nwiiriyane saana enooleelakani: Vaava aakhala-vo atthu akina ahinrowa okhwa ehoonne Omwene wa Muluku n'uwerya.?

²Nuvira mahiku mathanu n'amosa, Yesu aahiwela omwaako, ni aahakuxa awiixutti araru: Petru, Yakopo ni Yohani. Omwaako weiwo aahirukunuxa mukhalelo awe ohoolo w'aya

³nto soowara s'awe saahikhala s'owaaryexa ni s'otteelaxa. Mulaponi-mu khaavo mulipa ookattha aarowa owerya otteeliha siiso.

⁴Vano, awiixutti yaahimoona Eliya ni Monse evaanelaka ni Yesu.

⁵Nto Petru aahiira: ?Pwiya, ti vooreera hiyo okhalaka vaava! Nteke mixaxa miraru: Mmosa wawinyu, mukina wa Monse ni mukina wa Eliya.?

⁶Petru khaasuwela hata yaahimy'awe. Okhala wira awiixutti yaanoova vanci-ene.

⁷Numala osulu naahirwa neeku naakhuneela. Nave muneekuni memmo naahiiwanyeya nsu naahimya wira: ?Ola Mwan'aka onimphent'aka. Mmwiiweleleke enihimy'awe!?

⁸Naanaano-ru awiixutti yaahiweha-weha vaavale khuhimoona-tho mutthu mukina, ahikhanle Yesu paahi ari ni yaawo.

⁹Okathi waakhuruw'aya omwaako, Yesu aahaalopola wira ehimuhimeerye mutthu etthu ile yoonaly'aya. Mwaana a Mutthu ahinatthi ohihimuwa mookhwaani.

¹⁰Awo yaahiiwelela moolumo ala, nto yaanikohana yaaworu wira: Exeeni Yesu aatthun'awe ohimya ni moolumo ale oohihimuwa mookhwaani.

¹¹Nto yaahirowa omukoha Yesu wira: ?Khi awiixuttihi a ikano sa Monse anihimeryani wira Eliya tunrowa opacerya orwa??

¹²Yesu aahaakhula wira: ?Ekeekhayi wira Eliya tunrowa opacerya orwa wira alokiherye sothene. Ntoko silempwaya wira Mwaana a Mutthu onoohaawa vanci-ene n'unyoholiwa.

¹³Tthiri miyo kinnooleelani wira Eliya aahoorwa nto atthu khumwiiriha sothene yaatthun'aya, ntoko silempw'aya sa yoowo.?

¹⁴Vaaphiy'aya waari awiixutti akina yaahiphwanya muttitthi w'atthu othukumanne-ene ni awiixuttihi a ikano sa Monse evaanyihanaka ni yaawo.

¹⁵Muttitthi owo omoonakaru Yesu waahekeseya n'utteeliwa murima nave khumutthimakela orowa omukoha ihaali,

¹⁶nto Yesu aahaakoha iiraka: Munivaanyihanani?

¹⁷Nave mukina aari eriyari va muttitthi aahaakhula wira: Mwiixuttihi kooruuhenleni mwan'aka, ovariwe ni munepa wootakhala nto khaniwerya olavula.

¹⁸Munepa owo wanvara vale onnimmora khuyakhuma nipheru mwaano n'ulumanyiha maino ohinakhalana ikuru. Kihaavekela awiixutti anyu wira yoomole munepa owo nto khuhiwerya.

¹⁹Nto Yesu aahahimeerya wira: ?Nyuwo atthu oohaamini! Kinrowa okhalaka ni nyuwo mpakha lini? Kinnrowa woovilelani mpakha lini? Mukiruuhele-va mmirav'owo.?

²⁰Okathi wamuruuhenly'aya munepa waahimoona Yesu nto ommoroxela mmiravo owo vathi nave owo khunaipuruwa akhumaka nipheru mwaano.

²¹Yesu aahimukoha tiithi awe wira: ?Opacenrye lini wira siiso?? Awo yaahaakhula yiiraka opacenrye ari mwamukhaani.

²²Imaara sinci-ene onnimurihela vaikho hata mmaasini wira omwiive. Nto nyuwo mwaaweryaka, munikhaliherye, munimorele ikharari!

²³Yesu aahaakhula wira: ?Nyuwo mwaaminikiru wira ti siiso, sothene sinniweryaneya w'ale arina waamini.?

²⁴Nanaanoru atiithy'awe mwaana yaahikhuwela yiinlaka khwiira: ?Miyo kinnaamini. Nto muncererye waamini waka!?

²⁵Yesu aahoona muttitthi w'atthu ale ari vaavale. Nto aahipwapwela munep'ole wootakhala iiraka: We munepa ohiniiwa ni ohinlavula, ti mi kinoohimeerya, okhume mwa mmirav'ola nave ohitthikele-tho mwa yoowo!

²⁶Munep'owo woottakhala waahikhuma okhuwelaka, numala omuxekexa n'uwali. Mmirav'owo khukhala ntoko orimookhwa, siiso atthu anci-ene yaahimy'aya wira ohookhwa.

²⁷Vano Yesu aahinvarela ntata, khunvenxa nave owo khweemela.

²⁸Okathi Yesu waahokolowenly'awe owaani, awiixutti yaahimukoha vaary'aya meekhaya yiiraka: Exeeni hiyo nihalaka wooceela woomola munepa woottakhal'ole?

²⁹Nto Owo aahiwaakhula wira: ?Muttitthi wa minepa ntoko ole oniweryaneya woomola ni mavekelo n'utthuka paahi.?

³⁰Yesu n'awiixutti awe yaahikhuma vale nave yaahivira elapo y'oKalileya, nto Yesu khaaphavela osuweliwa vaary'awe.

³¹Nto aaniwiixuttiha awiixutti awe iiraka: ?Mwaana a Mutthu onoovahereriwa mmatatani mw'atthu. Awo anoomwiiva nave owo onoohihimuwa mookhwaani yamala mahiku mararu.?

³²Awo khiyaaiwa saana ele yaahimeeriw'aya, nto yaanoova omukoha.

³³Yaahiphiya muttetthe w'oKafaranawu. Okathi waaphiyaly'aya owaani, Yesu aahaakoha awiixutti wira: ?Exeeni nyuwo mwaavaanyihan'anyu murw'aka mphironi??

³⁴Vano awo yaaroomaala, maana mphironi yaarwa evaanyihanaka wira ti pani aarowa okhala muulupalexa.

³⁵Nto Yesu aahikilaathi, awiihana ale muloko n'anli khwaahimeerya wira: ?Akhala oopacerya, ohaana okhala ookiserya n'ukhala murumeyi a atthu othene.?

³⁶Nto aahimukuxa mwanamwane mmosa khumweemexa variyari v'aya. Numala aahimukhupaarela nave khwaahimeerya awiixutti wira:

³⁷Ole onimwaakhela mwana-mwane ntoko ola mwa nsina n'aka onikaakhela miyo. Nave ole onikhaakhela miyo, khanikaakhela miyo paahi, nto onnimwaakhela-tho ole okirumme.

³⁸Yohani aahimuhimeerya Yesu wira: ?Mwiixuttihi, noomoona mutthu oomolaka minepa sootakhala ni nsina n'anyu nto noomukhoottiherya, okhala wira khaneetta ni hiyo.?

³⁹Yesu aahahimeerya wira: ?Mmuhiye mulopwan'owo, maana khaavo oniira sotikiniha ni nsina n'aka, numala khiyaakiveeha.

⁴⁰Ole ohinnivirikanya taawihu.

⁴¹Muupuwele wira: Ole onoovahani maasi oowurya mwaha w'okhala aKristu kinnoohimeeryani ekeekhayi wira khanooceela otthuveliwa.?

⁴²Yesu aahihimya-tho wira: Ole onrowa omutthekiha mmosa a axikhaani ala anikaamini miyo, fataari waari oriheliwa mutth'uwo varatani atthukeleliwe-ene nxilo muxikoni.

⁴³Tivo, ntata nanyu nootthekihani, mwiikitthe. Fataari okela wirimu ni ntata nimosa ohikhanle okhalano matata manli ni khurowa omooroni, weiwo ohinttiphaaya okathi wothene.

⁴⁴Weiwo ohaawa ohimmalaaya ni mooro ohinttiphaya.

⁴⁵Nave nnawu nanyu nootthekihani, mwiikitthe. Fataari okela wirimu ni nnawu nimosa ohikhanle okhalana inawu soopiili nto khurowa omooroni,

⁴⁶weiwo ohaawa ohimmal'aya nave mooro ohinttiph'aya-tho.

⁴⁷Nave niitho n'anyu nootthekihani, musyoole. Fataari okela mu mweneni wa Muluku nniitho nimosa ohikhanle okhalana maitho manli nto khurowa omooroni,

⁴⁸weiwo ohaawa ohimmal'aya ni mooro ohinttiph'aya.

⁴⁹Maana othene animweeleeliwa ni mooro.

⁵⁰Maana maakha etthu yooreera, vano awo yahiya osiva waya nto nyuwo munwerya sai ohokoloxerya osiva iwo? Khula mutthu aphaveleke weeleela saana ekumi awe nto mukhalaneke murettele mukina ni mukhw'awe.