Mark 8

¹Numala okathi vakhaani, yaahithukumana-tho atthu anci-ene ohoolo wa Yesu. Okathi yaamalenly'aya yoolya, Yesu aahiwiihana awiixutti nto khwaahimeerya wira:

²?Kinniwoonela othunku atthu ala avirin'he mahiku mararu ekittharaka ni kharina yoolya.

³Kawiirela orowa owaani evoliwe-ene anoomora etala mphironi. Nave akina akhumme ottaiwene.?

⁴Nto awiixutti yaahimwaakhula wira: ?Nintthuna orowela woowi mikatthe soowaakawela atthu anci-ene m'othakoni-mu??

⁵Yesu aahaakoha wira: ?Murina mikatthe kavi? Awo yaahimwaakhula wira: ?Nirina thanu napiili.?

⁶Vano Yesu aahaaruma atthu okilaathi vathi. Aahikuxa mikatthe thanu napiili, aahimuxukhuru Muluku, aahimeya, nto khunaavaha awiixutti awe wira yaakawele atthu othene. Awo nave yaahiira ntoko saarummwaly'aya

⁷Nave-tho yaahikhalana ihopa vakhaani, seiyo nave aareerihaly'awe nto aavahererya awiixutti awe wira yaakawele atthu.

⁸Othene yaahilya mpakha ovona nlelo yaahittotteliwa mapattuxo yaahanle esareya ithokwa thanu na piili.

⁹Atthu yaalyiiye yaahanle ophiyerya imiya miloko mixexe (4000). Numala Yesu aahaamwarya atthu wira eroweke owaani;

¹⁰Naanaanoru aahikela mukalawani vamosa n'awiixutti awe khurowa elapo y'oTalimanutha.

¹¹Yaahirwa aFarisi akina khunavanyihana ni Yesu. Ephavelaka onvelaveliha, yaahinvekela wira apake mutikiniho onthoonyiherya wira owerya w'awe okhumme wa Muluku.

¹²Yesu aahiittha iphumu murohoni mwawe, khuhimya wira: Xeeni atthu ala anivekelaya ethoonyeryo? Veekeekhayi kinnohimeeryani wira atthu ala khanivahiwa ethoonyeryo makhala emosa.

¹³Siiso owo aahaahiya khutthikela mukalawani vamosa n'awiixutti awe analapuwela ekhopela ekina ya nratta.

¹⁴Nto awiixutti yaahiliyala okuxa yoolya awo yaarina mukatthe emosa paahi mukalawani.

¹⁵Vano Yesu aahaalopola iiraka: ?Mwiipasoope ni miropo s'aFarisi ni sa mwene Heroti.?

¹⁶Nto awiixutti yaanaapelana yaawo-ru maana yuupuwela wira Yesu aahimyale siis'ale mwaha woohikhalana mikatthe.

¹⁷Yesu aahiiwa waapelana iwo nto khwaakoha wira: ?Exeeni enivaanyihan'anyu mwaha woohikhalana mikatthe? Nlelo khamunsuwela? Muri ntoko siisaale atthu ahiniwerya osuwela itthu iya?

¹⁸Mookhalana maitho: Khamunoona? Mookhalana maaru: Khamuniiwa? Khamunuupuwela?

¹⁹Okathi waakawanny'aka mikatthe thanu kaavaha yoolya atthu imiya miloko mithanu? Ni mwaatthottenle ittokwa kavi saasanrye mapatuxo yaahanle? Awo yaahaakhula wira: ?Muloko ni piili.?

²⁰Yesu ahaakoha-tho wira: Ankhi okathi waakawannyaka mikatthe thanu na piili, khwaavaha atthu imiya muloko mixexe, mwaakunxe ithokwa ikavi saasanrye mapattuxa yaahanle? Awo yaahimwaakhula wira: Thanu na piili.

²¹Vano nto Yesu aahaakoha-tho wira: Nlelo khamunsuwela?

²²Yesu n'awiixutti awe yaahiphiya oPetsaita. Aahiruuheliwa mutthu oohoona khuvekeliwa Yesu wira anvonihe.

²³Owo aahivarela ntata na mutth'uwo oohoona khumurowana ota wa muttetthe. Numala aahitapherya mara mmaithoni mw'awe, aahimwiixaatherya matata khumukoha iiraka: ?Munnoona etthu??

²⁴Owo aahitthukula maitho khwiira: ?Aayo kinniwoona atthu, anikhala ntoko miri sineetta!?

²⁵Yesu aahimwiixaatherya-tho matata maitho awe nto okathi mulopwan'ole vaatthikenly'awe okhunula maitho aanoona oratta-ene itthu sothene.

²⁶Yesu aahimwirela orowa owaani, amuhimeeryaka wira: Muhivire-tho mmuttettheni.

²⁷Numala aahirowa n'awiixutti mittetthe s'elapo y'oKesareya wa Filipi nto erowaka mphironi aahaakoha wira: ?Atthu aniira miyo kaani??

²⁸Nto awo yaahimwaakhula wira: ?Atthu akina anihimya wira nyuwo mwa Yohani Mpatisa, akina aniira mwa Eliya, akina-tho nlelo anihimya wira mwammosa a maprofeta.?

²⁹Yesu aahaakoha-tho wira: ?Khi nyuwo, munuupuwela wira miyo ka pani? Petru aahaakhula naanaanoru wira: ?Nyuwo mwa Moopoli.?

³⁰Vano Yesu aahiwiirela wira: ?Etthu-ila muhimuhimeerye mutthu.?

³¹Nto Yesu aahipacerya owiixuttiha awiixutti iiraka: ?Mwaana a Mutthu ohaana ohaawa itthu sinci-ene n'uruniwa ni mahumu ni makhulupale a anamukuttho n'awiixuttihi a ikano sa Monse. Ohaana wiiviwa, nto yamala mahiku mararu ohaana ohihimuwa mookhwaani.?

³²Yesu aalavula itthu iya ahivithak'etthu. Vano Petru aahimwiihana wiiphini nave khupacerya onvaanyiha. Mwaha w'ele yaahimaly'awe.

³³Vano nto Yesu aahirukunuwa khwaaweha awiixutti nave khumpwapwela Petru iiraka: ?Okhume ohoolo waka, Satana! Wee onsuwela itthu s'atthu paahi nto khunahiya sa Muluku.?

³⁴Numala aahiitthana muttitthi w'atthu vamosa n'awiixutti awe khwaahimeerya wira: ?Akhala ontthuna okitthara aikhootte mwaneene, nave akapatte mwiikimanyo awe nto akitthareke.

³⁵Ole oniphavela woopola ekumi awe, enomurimeela, vano ole ompweteiwa ekumi awe mwaha wa miyo ni wa mwiixuttiho aka, owo onimoopola ekumy'awe.

³⁶Nto mutthu omphwanya-ni waakhela olumwenku wothene, nave ekumi awe erowaka opweteya?

³⁷Wala ontthuna ovaha exeeni wira aakakhanye ni erooho awe?

³⁸Tivo, akhala mutthu onuuliwa muru mwaha wa miyo ni wa itthu siniixuttihaka, eriyari y'atthu ala oohiroromela ni oottheka, nave Mwaana a Mutthu okathi onrw'awe munttittimihoni ni Akelo ooreera murima onimuuliwa muru ni mutth'uwo.?