Mark 7

¹Nihiku nimosa aFarisi n'awiixuttihi a ikano sa Monse yaakhumme oYerusalemu yaahikumana ni Yesu.

²Awo yaahoona wira awiixutti akina a Yesu yaalya ehittharihelaka nlamulo n'akhoottiha olya ohinyanwe.

³Okhala wira aYuta, otepaxa-wene aFarisi, khanlya ehinyanwe oratta-ene, ntoko malimalelo a makhulupaly'aya a khalayi.

⁴Okathi wothene anihokolow'aya opasari khanlya ehinyanwe oratta-ene. Nave sookhala ikano sikina sinci-ene akhalinnh'aya ntoko malamulo khunarumeela ni woovelela, ntoko inamunma sikina soorapiha ikoopho, n'iparatho sooloko ni sa ekoopiri.

⁵Tivo aFarisi awiixuttihi a ikano sa Monse ehalaka omukoha Yesu wira: ?Vanikhala sai awiixutti anyu ahintthar'aya ikano sa khayi, nto khunalya ehinyanwe saana mmatatani mw'aya??

⁶Nto Yesu aahiwaakhula wira: ?Anawootothe! Khweeli khoothale profeta Yesaya voohimyaaweni nyuwo! Alepaka wira: Atthu ala ankittittimiha ni moolumo paahi, nto mirima saya siri ottaiwene ni miyo.

⁷Awo annikikokhorela mahala, nave ikano siniixuttihaya ti s'atthu paahi.

⁸Munnikhootta Ikano sa Muluku; khuyatthara miixuttiho s'atthu.?

⁹Yesu ahaahimeerya-tho wira: Nyuwo munnihiya weettela ikano sa Muluku munatthara ikano s'atthu.

¹⁰Okhala wira, Monse aahiixuttiha wira: Mwaattittimiheke atiith'inyu n'amam'inyu. Nto aahihimya-tho wira: Ole onaaveeha atiithy'awe hata amey'awe aiviwe.

¹¹Tthiri nyuwo munnihimya wira: Akhala mutthu oniwiirela atiithi awe wala aman'awe wira: Muhakhu mwaarow'anyu ophwanya mwa miyo ti wo wavaha Apwiya,

¹²ni wira siiso nyuwo khamunimuhiya aakhaliheryaka atiith'awe hata ame awe.

¹³Wa enamuna y'eyo, nyuwo munnihiya ottittimiha ikano sa Muluku, khunaxikha s'ephattu anyu. Nave sookhala itthu ikina sinci-ene sinttharelana ni seiyo nyuwo muniiranyu.

¹⁴Yesu aahiwiihana-tho atthu khwaahimeerya wira: Othene mukiwiriyane wira musuwele.

¹⁵Kahiyo itthu sinikela mmirimani mwa mutthu simmunanariha, enimunanariha mutthu t'ile enikhuma mmirimani mwa mutthu.

¹⁶Ole orina maaru, iiweke!

¹⁷Okathi Yesu waamwanry'awe atthu aahihokolowela owaani, awiixutti yaahimukoha wira exeeni yaatthun'awe ohimya ni nlikanyiho nle

¹⁸Nave owo aahiwaakhula iiraka: Nyuwo-tho khamunsuwela? Nto khamunoona wira sothene mutthu only'awe wala oniwury'awe, iyo khasinimunanariha mutthu,

¹⁹maana khasinkela mmurimani, sinikela munapwipwini numala sinakhuma mwerutthuni? Yesu aahooniherya wira soolya sothene ti sooreera.

²⁰Nave khuhimya-tho wira: Itthu sinikhuma mmurimani mwa mutthu tinimunanariha mutthu.

²¹Mmurimani mwa mutthu ti munikhum'aya muupuwelo oonanara ni sothene simmuruuhela mutthu ehaaya wiiya, onamuttompe, wira yootakhala,

²²oraruwa, milili, waapa, wootha, ohonona, nrima, efitina, wiisoona, olavilavi.

²³Soonanara iya sothene sinkhuma mmirimani mwa mutthu ti seiyo sinimunanariha mutthu.

²⁴Yesu aahirowa mmuttettheni mw'elapo y'oTiro. Aahikela mpaani okhala wira khaatthuna osuweliwa nipuro naary'awe. Nto khaawenrye ohooniwa okathi munci-ene.

²⁵Muthiyana mmosa, aarina mwan'awe mwaamuthiyana aavariwe ni munepa wootakhala, vaaiwaly'awe sa Yesu aahirwa naanaanoru khukokhora ohoolo w'awe.

²⁶Owo khaakhanle muYuta aari a oFeniisiya. Aahinvekela Yesu wira oomole munepa wootakhala waanvanre mwan'awe.

²⁷Nto Yesu aahimuhimeerya wira: ?Mwaahiye toko anamwane elye. Khivanreerela owaakha anamwane yoolya khwaarihela axaana a alapwa.?

²⁸Nave muthiyan'owo aahimwaakhula Yesu iiraka: ?Aayo, Pwiya, hata axi'ana yaawo a alapwa annoolya vathi va meesa itathela simmora anamwane yaalyaka.

²⁹Nto Yesu aahimuhimeerya wira: ?Moohimya saana, Muhokoloweleke owaani, maana munep'owo wootakhala woomuhiya mwan'inyu.?

³⁰Okathi muthiyan'ole waaphiyaly'awe owaani aamphwannye mwan'awe ammaathale-ene voolilini. Tthiri munepa wootakhala waahimuhiya.

³¹Yesu aahivenya elapo y'oTiro khuvira oSitoni, arowaka nratta n'oKalileya. Vaakhumaly'awe iwo aahirowa mulaponi mwa mittetthe muloko.

³²Weiwo aahiruuheliwa mutthu ohiniiwa ni ahaalavula saana, nto yaahinvekela Yesu wira amwiixaatherye matata wira anvonihe.

³³Yesu aahikhuma opur'ole waari atthu anci-ene amukunxe-ene mulopwan'ole. Khukeliha ikatha owaruni w'awe amutapherya mara nlumi n'awe.

³⁴Nuumala, aahiweha wiirimu khwiittha iphumu ahimyaka wira: Efata, enihimya wira: Mutthukuwe!

³⁵Naanaanoru owaruni w'awe waahitthukuwa, nlumi n'awe naahitapuwa nto owo khupacerya olavula oratta-ene.

³⁶Nto Yesu aahahimeerya ale othene yaari vaavale wira ehimuleele mutthu etthu ile. Nto vaahimeery'awe wira ehimuleele mutthu awo yaamutepa olavula eyo yaakhumelenle.

³⁷Othene yaahitikinihiwa. Nto yaanihimya wira: ?Sothene oniir'awe ti sootikiniha. Onniwerya waatthukula maaru ale yahaiwa n'ale yaahaalavula khunalavula.?