Mark 6

¹Numala Yesu aahivenya arowaka elapo awe, nave awiixutti awe yaahimutthara.

²Vaaphiyalyaya esaapatu aahipacerya wiixuttiha mpaani moothukumana. Atthu anci-ene yaamwiiwa yaahitikinihiwa enahimya wira: Oixuntte vai itthu iya? Ovahiwe naani osuwela nno? Oniira enamuna xeeni sotikiniha iya?

³Kahiyo yoola kalapinteero, mwaana a Maria munn'awe Yakopo ni Yosefe, Yuta ni Simoni? Ankhi axirokor'awe kahi yaale ankhalan'ahu? Tivo vahaamin'aya.

⁴Nto Yesu aahahimeerya wira: Profeta onniphentiwa mapuro othene, ni onnithanyiwa elapo y'owany'awe paahi ni variyari va onlokoni w'awe ni v'amusi awe.

⁵Vano khaawerya wira weiwo sotikiniha. Ohikhanle wavoniha aretta vakhaani paahi awiixatheryaka matata.

⁶Yesu aahitikinihiwa ni ohaamini w'atthu a elapo awe khutthokiha ovira mittetthe soowaattamela.

⁷Yesu aahiwiihana awiixutti muloko n'anli nto khupacerya waaruma anli-anli.

⁸Aavahaka owerya wo woomola minepa sootakhala nave aahaatumererya iiraka: Ehikuxe etthu y'orumeela mphironi, ehikhanle ekopo. Ehikuxe etthu yoolya, hata esaakho, nnakhala musurukhu,

⁹hata ikuwo sikina, nnakhala isantaalya sikina.

¹⁰Nto ahaahimeerya-tho wira: Mwakela mulaponi vano akhala mutthu onrowa woovahani nipuro, mukhaleke weiwo mpakha okhuma w'anyu elapo eyo,

¹¹vakhala wira nipuro nikina axineene khawaakhenle-ni wala khatthunne owiiwelelani, mwaakhumaka elapo eyo mutathe ntthupi na isantaalya s'anyu ntoko ethoonyeryo noowaalaxerya atthu awo.

¹²Nto awiixutti yaahivenya nave khurowa waalaleerya atthu wira erukunuxe murima n'uttharuwa wira soohiloka.

¹³Yaanoomola minepa sinci-ene sootakhala nave yaanaavoniha aretta anci-ene, yaattikitthelaka makhura.

¹⁴Mwene Heroti aahiiwa itthu iya maana nttittimiho na Yesu naanimwareela mapuro othene. Akina yaanihimya wira: ?Owo Yohani Mpatisa oroohihimuwa mookhwaani, ti vo vanooney'aya owerya wo wira mitikiniho.?

¹⁵Akina yaanihimya wira owo ti Eliya, nave akina-tho yaanihimya wira: ?Profeta ntoko yaale a khalayi.?

¹⁶Heroti vaaiwaly'awe sa yoowo aahiira: Veekeekhayi owo Yohani Mpatisa yoole aarumaly'ayaka wiikitthiwa muru, oroohihimuwa.

¹⁷Okhala wira Heroti yoowo aahaaruma atthu awe omutthukela mwaha wa Herotiya aari mwaara a muhim'awe Filipe yoowo aamuthenly'awe;

¹⁸okhala wira, Yohani aanimuhimeerya Heroti iiraka: Kahi etthu saana omuthela mwaara a muhim'anyu;

¹⁹Herotiya aanimunyokha Yohani Mpatisa vano aaniphavela omwiiva nto khaarina owerya woomwiiva;

²⁰Heroti aanimoova Yohani okhala wira aanisuwela wira owo aari naxariya ni ooreera murima, nave aahimulipiha yoowo oratta-ene. Vano okathi vaamwiiw'awe, khaawerya olavula etthu, owo aaninwiriyana ni murim'awe wothene.

²¹Nto, waahiphiyerya okathi wa Herotiya, naaphiyenry'aya nihiku na niira nootthapela oyariwa w'awe, aahaalattula makhulupale a mulaponi mw'awe, makhulupale a anakhoto n'atthu oosuwanyeya a oKalileya.

²²Okathi ene yoowo wa niira, mwaana mwaamuthiyana a Herotiya aahikela vasaala aahiina. Amusiveliha vanci-ene Heroti n'atthu yalattunly'awe, nto mwene aahimuhimeerya wira: Mukivekele entthun'anyu miyo kinimoovahani.

²³Aahihimya-tho alaphelaka wira: ?Kinimoovahani ele enrow'anyu okivekela hata okawanya omwene aka eriyari.?

²⁴Owo aahikhuma arowaka waakoha amam'awe khwiira: ?Kavekele exeeni?? Nto ama'awe yaahimuhimeerya wira: ?Mwaavekele muru wa Yohani Mpatisa.?

²⁵Numala aahihokolowela vasaala, khurowa vaari mwene, khumuhimeerya wira: Kintthuna wira mukivahe naanaano-va muru wa Yohani Mpatisa mparathoni.

²⁶Mwene aahiriipiwa murima vanci-ene, nto okhala wira aahilapha ohoolo w'atthu yaalattuliwe khaawenrye okhoottiha yaavekeliwawe;

²⁷aahimuruma naanaanoru murumeyi awe wira amuruuhele muru wa Yohani Mpatisa; murumey'uwo aahirowa okhatteya, aahiikittha muru wa Yohani.

²⁸Nave aahimuruuhela mparathoni. Mwaan'ole aahaakhelela mur'uwo numala khwaaroihela amam'awe

³⁰Okathi arummwa yaatthikaly'aya yaahithukumana ni Yesu, khumuhimeerya sothene siraly'aya ni saixuttihaly'aya.

³¹Nto Yesu aahahimeerya wira: ?Mukitthare woothakoni, nipuro noomaleleya, mwamumule vakhaani.? Nave yaahikhala atthu anci-ene yaarwa, ni yaarowa, siiso Yesu n'awiixutti awe khiyaarina okathi w'olya.

³²Yaahikela mukalawani khiyarowa woothakoni.

³³Nave atthu a mittetthe sothene yaahiwoona evenyaka khusuwela nipuro n'arowaya. Tivo, atthu awo yaahirowa khukhala araaci ophiya waavikana awo yaapacenrye ovenya.

³⁴Okathi Yesu waakhumaly'awe mukalawani aahoona ohoolo w'awe muttitthi muulupale w'atthu. Aahaamorela ikharari vanci-ene atthu ale othene yaalikana nnikoto na ipwittipwitthi sihirina makampusi, nto khupacerya owiixuttiha itthu sinci-ene.

³⁵Okhala wira vaahanle wiila, awiixutti yaahimwaattamela Yesu nto khumuhimeerya wira: ?Nipuro nla moothakoni nave vahanle wiila.

³⁶Mwaamwarye, atthu ala wira erowe ilapo ni mittetthe soowaattamela yathume etthu-pitthu wira elye.? Nto Yesu aahiwaakhula iiraka: ?Mwaavaheke nyuwo yoolya.?

³⁷Nave awo khumuhimeerya yiiraka: ?Wira nathume mikatthe soowaavaha atthu ala othene, nihaana nikhalanaka musurukhu wa eparatha miloko miloko miili.?

³⁸Yesu aahiwiirela-tho: ?Moone mikatthe sirin'anyu? awo yaahirowa woona nto khumwaakhula wira nrina mikatthe thanu n'ihopa piili.

³⁹Nto Yesu aahaaruma awiixutti awe waakilaathiha atthu awo othene va malaxini makithi makhuru ookawanyeya,

⁴⁰atthu othene yaahikilaathi khula nipuro atthu miloko muloko ni nikhuru n'atthu miloko mithanu

⁴¹Numala Yesu aahikuxa mikatthe iyo thanu n'ihopa piili aahiweha wirimu khureeriha aahimeya mikatthe iyo aavahererya awiixutti awe wira yaakawele atthu. Siiso-tho aahakawela atthu ihopa iye.

⁴²Othene yaahilya mpakha ovona,

⁴³Nto nlelo yaahittotteliwa mapatuxa yaahanle a mikatthe ni ihopa khusarihiwa ittanka muloko ni piili

⁴⁴atthu y'alyiiye yoolya eyo yaahanle ophiyerya imiya miloko mithanu.

⁴⁵Naanaanoru, Yesu aahaaruma awiixutti wira ekele mukalawani, nave aahahimeerya wira elapuwele okhopela oluluwana ni epantte y'oPetsaita, Owo aahaanle amwaryaka muttitthi w'atthu.

⁴⁶Numala olaxerya muttitthi w'atthu, aahiwela va mwaako wira avekele.

⁴⁷Vailaka ekalawa yiira yeettaka eriyari ya nratta, Yesu iira ari-ene muxerexere.

⁴⁸Vahalaka oxa, Yesu aahoona wira awiixutti awe waanaalipela olapuwa, okhala wira epheyo yaanaavelaveliha. Aahaatthimakela eettaka vasulu va maasi ni khuphavela waahoolela.

⁴⁹Okathi awo yaamoonaly'aya Yesu eettaka vasulu va maasi yaahipacerya okhuwela ni woova, yaanyiheryaka wira waari munepa.

⁵⁰Othene yaahimoona nto khoova, vano Yesu naanaanoru aahahimeerya wira: ?Mulipihe murima! Ti miyo muhoove!?

⁵¹Numala aahikela mukalawani, khukhala ni yaawo nave epheyo yaahimaala. Awiixutti yaahitikinihiwa vanci-ene.

⁵²Okhala wira khiyaasuwelanxe mutikinih'ole wa mikatthe, tthiri mirima s'aya saari soolipa.

⁵³Nto yaahilapuwa nratta khuphiya oXenesareti nto yaaheemexa ekalawa oxerexere.

⁵⁴Akhuruwakaru mukalawani naanaanoru atthu yaari iwo yaahimusuwela Yesu;

⁵⁵nave owo aviraka mmuttettheni mmo mothene, atthu yaanaarowana aretta ewatalenle-ene munrepani, mpakha wapixa nipuro naiw'aya wira ori vaavo.

⁵⁶Ilapo sothene ni mittetthe sothene ni mapuro othene aaphiy'awe, atthu yaanaaruuha arett'aya mwaathukumaniwa, envekelaka wira aatthuniherye ovara mukerekhere mwa nlaya nawe paahi, othene ale yaakwannya nlaya yaanipenuwa.