Luke 2

¹Mahiku awo, Sesari Aukusto, mwene muulupale a oRooma, aahikumiherya nlamulo n'orowa orepeliwa atthu othene a mulaponi.

²Orepeliwa iwo wopacerya wiiriwe Kirino anari kuvernatoro a oSiiriya.

³Atthu othene y'anirowa orepeliwa, khula mutthu muttetthe awe.

⁴Nto Yosefe aahivenya muttetthe w'oNasareti elapo y'oKalileya, arowaka oYuteya, muttetthe wa Taviti, wiihaniwa Petelehemu, okhala wira aari a nloko na Taviti,

⁵wira arepeliwe ni Maria, mwar'awe; Maria okathi uwo iira orupanle-ene.

⁶Nave enari oPetelehemu weiwo, n'ahiphiya nihiku nawe n'oyara,

⁷nave owo aahimuyara mwan'awe oopacerya. Aahimukhuneela n'ikuwo, khumwaatalela mwaalyelya inama, okhala wira mpaani mwaamak'aya aletto khiwaari-mo opuro w'areerela.

⁸Ekuluttu y'eyo y'ahikhala amakampusi y'aviriha ohiyu mmathalani, erupelelaka inama saya.

⁹Nave munkelo a Apwiya aahaakhumelela yaawo, nttittimiho na Muluku naahamwaleela. Awo y'ahoova vanci-ene,

¹⁰Vano munkelo aahahimeerya wira: ?Muhoove!? Koruuhenleni ehapari yooreera, yootteeliha murima, y'eyo enrowa watteeliha murima vanci-ene atthu othene.

¹¹Olelo, muttetthe wa Taviti, m'oyareliwa Moopoli, okhanle Kristu Pwiya.

¹²Ethoonyeryo enrowa woosuwelihani t'ila: Munoomphwanya mwaana akhuneeliwe-ene n'ekuwo, aataleliwe-ene mwaalyelya inama.

¹³Naanaanoru, vamosa ni munkel'owo w'ahikhumelela-tho muttitthi w'ankelo a wirimu yaamuttottopela Muluku yiiraka:

¹⁴?Attittimihiwe Muluku a wirimu-rimu ni vathi-va evahiwe murettele atthu onaaphent'awe.?

¹⁵Ankelo v'avenyaly'aya vale arowaka wirimu, amakampusi awo y'ahihimeeryana y'aworu wira: ?Nrowe oPeteleheemu, nawehe itthu Apwiya sinsuwelinh'aya.?

¹⁶Y'ahirowa voowakuveya khumphwanya Maria ni Yosefe ni mwaana aataleliwe-ene mwaalyelya inama.

¹⁷V'amoonaly'aya, yaahilaleya itthu s'ahimeeriw'aya sa Mwaan'owo.

¹⁸Othene ale yiiwale itthu saahimy'aya amakampusi, yaanitikinihiwa.

¹⁹Nave Maria aanisuka itthu iya sothene atthokelelaka mmurimani mwawe.

²⁰Amakampusi y'ahihokolowela w'akhumaly'aya, emuttottopelaka Muluku n'umwiipela mwaha wa sothene s'onaly'aya ni s'aiwaly'aya, ntoko saalaleeriw'aya.

²¹Vaaphiyaly'aya nihiku naneethanu neeraru aahihihiwa masoma khuvahiwa nsina na Yesu, ntoko munkelo s'ahimaly'awe owo ahinatthi orupaliwa.

²²Vaaphiyaly'aya nihiku na niira nooreerihiwa atthu, ntoko saarum'aya Ikano sa Monse, yaahimuroiha Yesu mpaani mwa Muluku oYerusalemu wira yanvahererye w'Apwiya.

²³Ntoko saarum'aya Ikano s'Apwiya wira: ?Anamwane othene axilopwana oopacerya oyariwa, yaahaana ovahereriwa w'Apwiya.?

²⁴Ni wira yavahe mukuttho wa masiya manli, w'ala ipompa piili, ntoko sinrum'aya ikano s'Apwiya.

²⁵Vano okathi uwo, aahikhala oYerusalemu mulopwana mmosa, iihaniwa Simeyoni. Aari ooreera murima ni oomoova Muluku, aalipelela okurunuxiwa murima wa Isarayeli. Nave Erooho Yooreera yari ni yoowo.

²⁶Owo aahileeliwa ni Erooho Yooreera wira khaarowa okhwa ahimoonne toko Kristu, Pwiya.

²⁷Uupuxeriwe-ene ni Erooho Yooreera, owo aahirowa mpaani mwa Muluku okathi atiithi awe n'ame awe Yesu yaamuruhaly'aya mwaana wira emaliherye ntoko sinrum'aya ikano.

²⁸Nto Simeyoni aahimukuxa Yesu mmatatani mwawe khumuttottopela Muluku iiraka:

²⁹?Vano Apwiya kihiyekeni kikhweeke ni murettele okhala wira moomaliherya saahimaly'anyu.

³⁰Maana maitho aka ahoona woopola wanyu

³¹Weiwo waalokihenry'anyu ohoolo w'atthu othene.

³²Muthuko onaamwaleela amalapo ni nttittimiho na Isarayeli atthu anyu.?

³³Atiithi awe n'ame awe mwaana owo yaanitikinihiwa vanci-ene n'itthu Simeyoni saahimy'awe sa yoowo.

³⁴Simeyoni aah'areeriha ni aahimuhimeerya Maria maam'awe Yesu wira: Mwaan'ola oyareliwe wira okhale mwaha woopweteya hata wo woopowa w'atthu anci-ene a Isarayeli ni wira okhale mwaha woovaanyihana.

³⁵Nave-tho xoowa onoothikila Erooho anyu, wira sooniheriwe soowuupuwela sa mirima sinci-ene.

³⁶Aahikhala-tho muthiyana mmosa, aari profeta, nsina nawe Hana, mwaana a Fanuweli, a nihimu n'Aseri. Aari owuuluvala: Aahikhala n'iy'awe iyaakha thanu na piili okhuma omwali awe,

³⁷khukhala namukhweli mpakha iyaakha miloko mithanu na miraru ni xexe. Khaaleva empa ya Muluku, aanimurumeela Muluku othana n'uhiyu, atthukwaka ni avekelaka.

³⁸Okathi ene yoowo, muthiyana owo aahirwa onapacerya omuttottopela Muluku n'umulaleya mwaana ole w'atthu othene y'alipelela woopoliwa oYerusalemu.

³⁹Vaamalihaly'aya sothene ntoko saarum'aya Ikano s'Apwiya, y'ahihokolowela oKalileya, muttetthe aya w'oNasareti.

⁴⁰Nto mwaana owo aaninnuwa ni aanilipa asareiye-ene ankhili, ni mahala a Muluku y'ari ni yoowo.

⁴¹Iyaakha sothene, atiithi awe n'ame awe Yesu y'anirowa oYerusalemu otthapelela niira na Paasikha.

⁴²Yesu vaarin'awe iyaakha muloko ni piili, yaahirowana oYerusalemu ntoko saalimalenly'aya orowa niira nlo.

⁴³Vaamanly'aya mahiku a niira, Yosefe ni Maria yaahivenya, ehokolowelaka owaani. Vano mmiravo Yesu aahihala oYerusalemu weiwo, atiithi awe n'ame awe ehisuwenle.

⁴⁴Yuupuwela wira Yesu aari n'atthu akina mmukhwahani, siiso yaaheetta nihiku noothene, nto vahaamoon'aya yaahikelela omphavela mw'amusi aya ni mw'atthu yaasuwel'aya,

⁴⁵Nto khuhimpwanya. Vano y'ahihokowela oYerusalemu emphavelaka.

⁴⁶Vaamanly'aya mahiku mararu emphavelaka, y'ahimpwanya mpaani mwa Muluku, akilanthe-ene eriyari ya asuweli, aawiriyanaka ni aakohaka.

⁴⁷Othene ale y'amwiiwa yaanitikinihiwa ni miruku sawe ni waakhula wawe.

⁴⁸Atiithi awe ni ame awe vaamoonaly'aya yaahitikinihiwa. Ame awe yaahimukoha wira: ?Mwan'aka muniirelenle-ni siiso? Miyo n'atith'inyu naahixanka niwaavyakani.?

⁴⁹Yesu aahiw'akhula wira: Mwaakiphavelela-ni khimwaasuwela wira kaah'ana okhala mpaani mwAtiithi aka?

⁵⁰Nto awo khiyaasuwela oratta-ene moolumo ala yaahimy'awe.

⁵¹Yesu aahivenya ni yaawo khuhokolowela oNasareti aaniwiiwelela yaawo. Ame awe yaanitthokelela itthu iya sothene mmurimani mwaya.

⁵²Nto Yesu aaninnuwa n'ankhili, n'erutthu ni mahala ohoolo wa Muluku ni wa atthu.