Luke 3

¹Eyaakha yanamuluko ni thanu Tiperio onari mwene muulupale a oRooma, Ponsio Pilato ari Kuvernatoro a oYeteya, Heroti ari mwene a oKalileya, Filipe muhim'awe Heroti, ari mwene a wItureya ni oTarakoniti, Lisania ari mwene oPileni;

²Hana ni Kaifa ari makhulupale a anamukuttho. Okathi yoowo, masu a Muluku yaahimurweela Yohani mwaana a Sakariya moothakoni.

³Vano Yohani aaheetteetta elapo yothene yowaattamela muro Yortani, aalaleeryaka atthu wira erukunuxe murima, epatisiwe, wira eleveleliwe itampi saya.

⁴Nto ti siiso silempwaya mulivuruni mwa moolumo a profeta Yesaya wira: Ookhala mutthu onikhuwela moothakoni iiraka: Mwaalokiherye ephiro Apwiya, mwaareerihele mittaala s'aya.

⁵Malitti othene animuuheleliwa, miyaako ni mattumuxa othene anoopwexakasiwa, iphiro soothipakaseya sinimwaapatthiwa, iphiro sookottoopa sinimookololiwa.

⁶Atthu othene animoona woopola wa Muluku.

⁷Tivo, atthu anci-ene yaanirowa opatisiwa ni Yohani. Van'owo aanaahimeerya wira: Nyuwo, nloko na ivili! T'ani owixuttin'heni otthyawa ehukhumu ya Muluku ehanle orwa?

⁸Mooniherye miteko sanyu wira veekeekhayi moorukunuxa mirima nave ohikhanle ohimya yeenyuru wira: ?Hiyo n'osuulu w'Aparahaamu.? Nto miyo veekeekhayi kinnooleelani wira Muluku hata maluku ala onoowerya otatuxa akhalihe osuulu w'Aparahaamu.

⁹Maxatto oolikana wira aikitthe mitathaari sa miri. Tivo mwiri wothene ohiniima mihokorokho sooreera onimwiikitthiwa oriheliwe vamooroni.

¹⁰Nto atthu anci-ene yaanimukoha Yohani wira: ?Vano-nto niireke-ni?

¹¹Nave owo aahiwaakhula wira: ?Ole orina ikamisa piili, emosa anvahe ole ohirina, nave ole orina y'olya aakawele akhw'awe.?

¹²Nave yaahirwa weiwo alipa ooliviha mpoosito wira epatisiwe nto yaahimukoha Yohani wira: ?Mwiixuttihi, niireke-ni hiyo??

¹³Nto owo aahiwaakhula wiira: ?Muhiliviheke ovikana sirummwaly'anyu.?

¹⁴Yaahikhala-wo asurutaato nave-tho awo yaahimukoha yiiraka: ?Mankhi hiyo niireke-ni?? Yohani aahiwaakhula wira: Muhimuhaaxe mutthu murumeelaka ikuru s'anyu hata muhimootherye mutthu, nto mutteeliweke murima w'ile enaakhel'anyu.

¹⁵Atthu othene yaanimulipelela Moopoli. Tivo, yanaanyiherya mmurimani mwaya wira: ?Khino Yohani ula ti Kristu??

¹⁶Nto Owo aahahimeerya atthu othene wira: ?V'ekeekhayi miyo kinoopatisani ni maasi, nto onnoorwa ole orina owerya wuulupale okivikana miyo, yoowo miyo nkiniphwanela otaphula mikhoyi sa isantaalya sawe. Owo onimoopatisani ni Erooho Yooreera ni mooro.

¹⁷Owo ookuxa ethokwa mmatatani mwawe wira aveerele epyo yooreera akhupele mmuruttuni mwawe. Vano mivelo onoopahavamooroni ohinttipha.?

¹⁸Siiso aanatumererya atthu ni moolumo makina manci-ene, aalaleeryaka Ehapari Yooreera.

¹⁹Vano Mwene Heroti yoowo aapapweliwe ni Yohani mwaha woomuthela Herotiya mwaara a muhim'awe, ni mwaha wa itthu sikina sinci-ene soonanara seiyo siiraly'awe,

²⁰Aahincererya-tho, owo aahimutthukwela Yohani mukhatteya.

²¹Vano, atthu othene vaapatisiw'aya ni Yohani, nave-tho Yesu aahipatisiwa. Nto avekelaka, erimu yaahihuleya.

²²Vano Erooho Yooreera y'ahimukhuruwela y'oneyaka ntoko epompa. Nave n'ahiwanyeya nsu wirimu nihimyaka wira: ?Nyuwo mwa Mwan'aka onimphent'aka. Kinnisiveliwa ni nyuwo vanci-ene.?

²³Okathi Yesu aapacenrya'awe miteko s'awe, aarina iyaakha wattamela miloko miraru. Aari mwaana a Yosefe ntoko suupuweliw'aya. Yosefe mwaana a Heli

²⁴Heli mwaana a Matati. Matati mwaana a Levi. Levi mwaana a Malikhi. Malikhi mwaana a Yanayi. Yanayi mwaana a Yosefe.

²⁵Yosefe mwaana a Matatiya. Matatiya mwaana a Amosi. Amosi mwaana a Nahumi. Nahumi mwaana a Esili, Esili mwaana a Nakayi, Nakayi mwaana a Mathe.

²⁶Mathe aari mwaana a Simeyi, Simeyi aari mwaana a Yosekhi, Yosekhi aari mwaana a Yota, Yota aari mwaana a Yoanani.

²⁷Yoanani mwaana a Resa, Resa mwaana a Soropapeli, Soropapeli mwaana a Salatiyeli, Salatiyeli mwaana a Neri.

²⁸Neri mwaana a Malkhi, Malkhi mwaana a Ati, Ati mwaana a Kosami, Kosami mwaana a Elmatami, El, atami mwaana a Eri.

²⁹Eri mwaana a Yesua, Yesua mwaana a Eliyeser, Eliyeser mwaana a Yorimi, Yorimi mwaana a Matati, Matati aari mwaana a Levi.

³⁰Levi mwaana a Simeyoni, Simeyoni mwaana aYuta, Yuta mwaana a Yosefe, Yosefe mwaana a Yonami, Yonami mwaana a Eliyakhimi.

³¹Eliyakhimi mwaana a Meleya, Meleya mwaana a Mena, Mena mwaana a Matata, Matata mwaana a Naxoni, Naxoni mwaana a Taviti.

³²Taviti mwaana a Yese, Yese mwaana a Yopeti, Yopeti mwaana a Poosi, Poosi mwaana a Sala, Sala mwaana a Naxoni,

³³Naxoni mwaana a Aminatapi, Aminatapi mwaana a Atmini, Atmini mwaana a Anri, Anri mwaana a Hesironi, Hesironi mwaana a Peresi, Peresi mwaana aYuta.

³⁴Yuta mwaana a Yakope, Yakope mwaana a Isaakhi, Isaakhi mwaana a Aparahaamu, Aparahaamu mwaana a Tera, Tera mwaana a Nahori.

³⁵Nahori mwaana a Serukhi, Serukhi mwaana a Rewu, Rewu mwaana a Pelekhi, Pelekhi mwaana a Eperi, Eperi mwaana a Xela.

³⁶Xela mwaana a Khenani, Khenani mwaana a Arpaxati, Arpaxati mwaana a Semi, Semi mwaana Noowe, Noowe mwaana a Lamekhi.

³⁷Lamekhi mwaana a Matusalemi, Matusalemi mwaana a Henokhi, Henokhi mwaana a Yareti, Yareti mwaana a Malaliyeli, Malaliyeli mwaana a Khenani.

³⁸Khenani mwaana a Enokhi mwaana a Sethi, Sethi mwaana a Atamu, Atamu mwaana a Muluku.