Luke 4

¹Yesu asareiye-ene Erooho Yooreera, aahivenya omuro Yortani, nto Erooho eyo y'ahimurowana w'othakoni,

²weiwo aahikhala mahiku miloko mixexe attehattehiwaka ni Satana, mahiku ene yaawo khaalya etthu nto vaamanly'aya mahiku awo aahivoliwa etala.

³Satana aahimuhimeerya wira: ?Nyuwo mwaari Mwaana a Muluku, murume nluku nla wira nithatuwe eyoolya.?

⁴Nto Yesu aahimwaakhula wira: ?Voolempwa wira: Kahiyo eyoolya-ru paahi eninvaha ekumi mutthu. Nave-tho masu othene a Muluku.

⁵Vano Satana aahinweliha Yesu nipuro noorekama, nave okathi uwo aahimooniherya omwene wothene wa mulaponi.

⁶Numala Satana aahimuhimeerya wira: ?Kinimoovahani owerya nno wothene ni nttittimiho nla nothene, maana sothene iya kiroovahereriwa nto ni miyo kinonvaha ole onimutthun'aka.

⁷Sothene sinookhala sawinyu, mwakikokhorela-ru.?

⁸Yesu ahimwaakhula wira: Volempwa wira: ?Mwaakokhoreleke Apwiya Muluku anyu, mwaattittimiheke yaawo paahi.?

⁹Numala Satana aahimurowana Yesu oYerusalemu, aahimweemexa nipuro noorakamexa n'empa ya Muluku nto khumuhimeerya wira: ?Mwaari Mwaana a Muluku, mutuphele vathi vale,

¹⁰maana yoolempwa wira: Muluku onimwaaruma ankelo awe wira y'okaphuleni:

¹¹Awo animookaphulani mmatatani mwaya wira inawu s'anyu sihivulale ni maluku.?

¹²Yesu aahimwaakhula wira: ?Nave-tho yoolempwa wira: Muhaattehattehe Apwiya Muluku anyu.?

¹³Satana vaamalihaliy'awe omwehererya Yesu, aahimuhiya khurowa mpakha okathi woophwanelela.

¹⁴Yesu asareiye-ene Erooho Yooreera aahihokolowela oKalileya, nave w'ahimwareela mittetthe sothene soowattamela.

¹⁵Owo aanixuttiha mpaani moothukumana, vano atthu othene yanimuttottopela.

¹⁶Numala, aahirowa oNasareti, elapo yeyo yaannuwenly'awe. Esaapatu aahirowa mpaani moothukumana ntoko s'alimalenly'awe, nto aaheemela wira asome Soolempwa.

¹⁷Aahinnyiwa eliivuru ya profeta Yesaya, owo aahikhunula nto khuphwanya nipuro n'alempwe wira:

¹⁸Erooho y'Apwiya Muluku, eri mwa miyo, awo aakithanla wira kaalalurye Ehapari Yooreera alipa oohaawa, amasikini; awo aakiruma wira kilaleerye otaphuliwa; alipa-ootthukweliwa ni wira kavonihe alipa-oohoona wira kiwoopole alipa oopuheriwa;

¹⁹ni wira kilalurya nihiku n'Apwiya, nintthun'aya owoopola atthu aya.

²⁰Vano Yesu aahikhunela eliivuru, amunnyererya murumeyi, khukilaathi. Othene ale yaari mpaani mme moothukumana, yaaninwehexexa.

²¹Yesu aahipacerya waaleela iiraka: ?Soolempwa iya siiwaly'anyu, tthiri olelo soomaliheriwa.?

²²Atthu othene yaanimuttottopela Yesu, enathamala mwaha wa masu a mahala yaakhuma mwaano mwawe. Vano yanikohana wira: ?Ola kahiyo mwaana a Yosefe??

²³Nlelo Yesu aahahimeerya wira: Vekeekhayi munikuupuxerya miruku seiye sinihimya wira: Mukulukhana mwiivonihe mmansinyu. Mwiire va mulaponi mwanyu mu sothene siiralyanyu oKafarnawu, siisaale siwaly'ahu.

²⁴Nave ahaahimeerya-tho wira: Kinoohimeeryani n'ekeekhayi yothene wira khaavo profeta onaakheliwa oratta-ene mulaponi mw'awe.

²⁵Vekeekhayi kinoohimeeryani wira okathi wa profeta Eliya, vahaarumpy'aya epula mpakha iyakha tthaaru ni miyeri mithanu na mosa, khukhalaka etala yuulupale mulaponi mothene, khiyaathowa elapo ya Isarayeli athiyana aanaamukhweli.

²⁶Vano, Muluku khaamurumme Eliya orowa w'athin'awo a Isarayeli: Aamurumme orowa wa namukhweli ule a oSarepta w'oSitoni.

²⁷Siiso-tho, okathi wa profeta Eliseyo, khiyaathowa anamakuttula elapo ya Isasayeli: Vano khaavo avonihiwe a weiwo. Ahikhanle Nahamani paahi mmalapo a oSiria, t'avonihiwe.

²⁸Othene aya yaari mpaani moothukumana vaamwiiwaly'aya Yesu olavulaka moolumo awo yaahinanariwa vanci-ene.

²⁹Yaahivenya enamukakhela Yesu ota wa muttetthe. Yaahimurowana vasulu vamwaako weiwo waatekiwe muttetthe, wira amukakhele oneri,

³⁰Nto Yesu aahivira eriyari-aya onarowa.

³¹Yesu aahikhuruwela oKafarnawu, muttetthe w'oKalileya; weiwo aaniwiixuttiha atthu mahiku a Saapatu.

³²Ale yaamwiiwa yaanitikinihiwa ni miixuttiho sawe, okhala wira aalavula n'uwerya

³³Aahikhala mpaani moothukumana, mulopwana mmosa aavariwe munepa wootakhala.

³⁴Owo aahikhuwela vanci-ene iiraka: ?Nyuwo Yesu muNasareti, murina-ni ni hiyo? Murwenle onipwetexa? Miyo kinnoosuwelani: Nyuwo mwa mutthu ooreera murima a Muluku.?

³⁵Yesu aahiruma munepa wootakhala owo n'ikuru, iiraka: ?Omaale we, omukhume mutth'uwo!? Munepa owo wootakhala waahimurihela mulopwan'ole vathi, eriyari v'atthu othene, numala waahimuhiya, ohimwiirinhe yootakhala.

³⁶Atthu othene yaahitikinihiwa vanci-ene, nto yanihimeeryana yaaworu wira: ?Nsu xeeni nla? Ola onniruma minepa sootakhala, n'uwerya wa mwaneene: Vano iyo khunamwiiwelela!?

³⁷Nto ovuwa wa Yesu waanimwareela mittetthe sothene soowattamela.

³⁸Yesu akhumakaru mpaani moothukumana aahirowa owanny'awe Simoni Petru. Okhala wira amaathi awe Petru yaanwereiwa ettekuxa, Yesu aahivekeliwa mwaha wa yaawo.

³⁹Owo aahiwuuramela amaathi awe Simoni khuruma wira ettekuxa eyo ekhume, eyo yaahikhuma. Awo yaahivenya ninaanoru khupacerya waarumeela atthu.

⁴⁰Nsuwa nikelakaru, othene ale yaarina aretta yaawereiwa mithinto sinci-ene sa iretta y'anaarowana wa Yesu. Owo aaniwiixaatherya matata khula mmosa nave aanaavoniha.

⁴¹Nave-tho, minepa sootakhala sanaakhuma atthu anci-ene ekhuwelaka wira: Nyuwo mwa Mwaana a Muluku! Vano Yesu anipwapwela, akhoottiheryaka olavula, maana yaanisuwela wira owo ti Moopoli.

⁴²Vaaxiyaya, Yesu aahivenya owaani, arowaka woothakoni. Vano muttitthi w'atthu w'animuhaavya. Ephiyakaru waaryawe, atthu yaanimukhanyereriha wira ahaahiye-tho.

⁴³Nto Yesu aahahimeerya wira: Vannireerela wira miyo kirowe kalaleerye Ehapari Yooreera ya Omwene wa Muluku mittetthe sikina-tho. Maana eyo t'itthu erummw'aka.

⁴⁴Nave aanilaleya mpaani moothukumana oYuteya.