Luke 5

¹Nihiku nimosa Yesu aari mukherekhere mwa nratta n'oXenesare nave atthu anci-ene yaanimphunyererya, okhala wira yaaphavela wiiwa masu a Muluku.

²Yesu ahoona ikalawa piili mmaasini vakhiviru vaavale. Alipa-oototha ihopa yaakhumme mukalawani-mmo, yiira erapihaka matthavi aya.

³Yesu aahikela ekalawa emosa yeeyo yaari ya Simoni Petru, nto aahimwirela wira asuserihe vakhaani mukherekhere. Aahikilaathi mukalawani aniixuttiha muttitthi w'atthu.

⁴Vamanlyawe olavula, ahimwirela Simoni wira: ?Murowe eriyari, eri maasi manci-ene, murihele matthavi anyu mmaasini, mutotheke.?

⁵Simoni aahaakhula iiraka: ?Mwiixuttihi, n'ototha ohiyu wothene khuhivara etthu, vano okhala wira nyuwo moohimya, kinoorihela mathavi mmaasini.?

⁶Yaahirihela matthavi mmaasini, nto yaahivara ihopa sinci-ene iyo saanaanyula matthavi.

⁷Yaahiwiihana akhw'aya yaari ekalawa ekina wira erowe yaakhaliherye. Awo yaahirowa nave yaahisariha ikalawa s'opiili ihopa sinci-ene inahala vakhaani osamiha ikalawa iyo.

⁸Okathi vaawehaly'awe siisaale Simoni Petru, aahikokhora ohoolo wa Yesu, khumuhimeerya wira: ?Pwiya nvenye va, maana miyo ka natampi.?

⁹Tthiri Simoni vamosa n'atthu othene yaarin'awe yaahitikinihiwa mwaha wa ihopa sinci-ene saavanre aya.

¹⁰Nave-tho Yakopo ni Yohani, an'awe Sepeteyo, yaavara muteko ni Simoni, yawo-tho yahitikinihiwa. Vano Yesu aahimuhimeerya Simoni wira: Muhoove! Okhuma olelo vaava munookhala mutothi a atthu.

¹¹Awo yaahipurulela ikalawa saya ota, yaahihiya sothene khumutthara Yesu.

¹²Okathi Yesu aary'awe muttetthe mukina weiwo aahikhala-wo mulopwana mmosa asareiye makuttula. Okathi vaamoonaly'awe Yesu aahikokhora khuurama mpakha vathi khunvekela wira: ?Pwiya, nyuwo mwatthuna munoowerya okireeriha.?

¹³Yesu aahookola ntata, ahimukwannya iiraka: ?Kinnitthuna: Murerihiwe! Naanaanoru makuttul'awe yaahimmalela.?

¹⁴Vano Yesu aahimuhimeerya wira ohimuleele mutthu etthu ila, nto murowe mwaisooniherye wa namukuttho nveleele yovaha yoreerihiwa wanyu, ntoko saarumaly'awe Monse, wira ekhalele onamoona w'atthu.

¹⁵Nto, ovuwa wa Yesu waanitepa omwaramwareya, vaavo nto atthu anci-ene yaanithukumana wira emwiiwe ni wira avonihiweke iretta saya.

¹⁶Nto Yesu aahikhuma arowaka woothakoni weiwo aahikhala avekelaka.

¹⁷Nihiku nimosa Yesu iira iixuttihaka, nto yaahikhala-vo akilanthe-ene aFarisi n'awiixuttihi a Ikano yaakhumme mittetthe sothene s'oKalileya ni s'oSamariya n'oYerusalemu. Nto owerya w'Apwiya waari ni Yesu wira aavonihe aretta.

¹⁸Vano yaahirwa alopwana akinaku, emuthataka vanrepani mulopwana mmosa oorakala. Awo yaaniphavela omukeliha mpaani n'umwiixathi ohoolo wa Yesu.

¹⁹Nto khiyaaphwannye opuro woonviriha mwaha w'atthu yahaareere, nto yaahiwela vampani akhunula nipatho khunviriha oorakala owo vaphakani amukuruxerya variyari v'atthu ohoolo wa Yesu.

²⁰Okathi v'onaly'awe waamini w'alopwan'ale, aahimwirela muretta owo wira: ?Mulopwana itampi s'anyu sooleveleliwa!?

²¹Nto awiixuttihi a ikano n'aFarisi yaahipacerya olavula yaaworu yiiraka: ?Ti pani mutth'ula oninveeha Muluku? T'ani onwerya olevelela itampi, ahikhanle Muluku paahi??

²²Yesu asuwelaka siiso etthu yuupuwel'aya, aahaakoha wira: ?Munuupuwela exeeni mmurimani mwanyu??

²³Yokhweya-xa piivi? Omwiirela oorakala ola wira: ?Itampi s'anyu sooleveleliwa, wala omwiirela wira: Nvenye mweetteke??

²⁴Nto musuwelexe wira Mwaana a Muluku ookhalana vathi-va owerya woolevelela itampi. ?Vano aahimwirela oorakal'owo wira: ?Kiniwiirelani nyuwo, nvenye, mukuxe nrepa nanyu murooke owaani.

²⁵Naanaanoru owo aaheemela atthu amoonaka, aahikuxa nrepa naattaleliw'awe onarowa owaani omuttottopelaka Muluku.

²⁶Atthu othene yaahitikinihiwa anamuttittimiha Muluku esareiye-ene woova yaanihimya wira: Olelo nihoona yotikiniha!?

²⁷Numala itthu iya, Yesu aahivenya-vo, vano aahimoona namaliviha mposito mmosa iitthaniwa Levi, akilanthe-ene nipuro n'aliviwa mposito. Owo Aahimuhimeerya wira: ?Mukitthare.?

²⁸Levi uwo aahihiya sothene, khuvenya onamutthara Yesu.

²⁹Numala Levi uwo aahipaka niira nuulupale owanny'awe nave waahikhala weiwo muttitthi muulupale w'alipa ooliviha mposito n'atthu akina yaalya n'uwo.

³⁰Nto aFarisi n'awiixuttihi a ikano yaahikelela owaapa awiixutti a Yesu nave yaanaakoha yiiraka: ?Xeeni nyuwo munly'anyu ni munwury'anyu n'anamaliviha mposito n'atthu ootakhala murima??

³¹Nto Yesu aahiwaakhula iiraka: Kahiyo atthu akumi amphaveleliwa mukulukhana, nto aretta tamphaveleliwa.

³²Miyo nkirweenle owitthana anaxariya, nto karweenle anatampi wira arukunuxe mirima.

³³Awo yaahimukoha yiiraka: ?Xeeni awiixutti a Yohani Mpatisa anitthukw'aya mahiku manci-ene, annivekela, awiixutti a aFarisi anniira siiso-tho, vano awiixutti anyu animoolya ni anoowurya??

³⁴Yesu aahiwaakhula iiraka: ?Munoowerya waakhanyereriha atthu alattuleliwe niira n'othela wira atthukweke ariki mutheli orye-ene n'awo?

³⁵Onoophiya okathi aniir'aya yaakhiwe mutheli, okathi yoowo tanrow'aya otthukwaka.?

³⁶Yesu ahaahimeerya-tho nlikanyiho nla iiraka: ?Khaavo onkhera ekuwo esya, wira attotthele ekuwo ya khalayi. Iira siiso onihonona mahala ekuwo ele esya, maana esaaph'ele esya khinataana n'ikuwo eyo ya khalayi.

³⁷Nave khaavo oniitthela eviinyu ya naanaano mmattonkani mwa khalayi okhala wira eviinyu eyo enoophula mattonk'awo. Siiso eviinyu eyo enooyeeheya nave mattonka anophuleya.

³⁸Tivo eviinyu esya ehaana eheliwaka mmattonkani masya, siiso sothene sinoosukeya.

³⁹Siiso-tho, khaavo oniira awunrye eviinyu ya khalayi khiyaphavela eviinyu ya naanaano, maana onoohimya wira eviinyu ya khalayi t'insiva!?