Luke 6

¹Nihiku na esaapatu Yesu vamosa n'awiixutti awe eviraka mmatta, awiixutti yaanivurula makala a etriku enattikintta ni matata enakhuura.

²Nto aFarisi akina yaahaakoha yiiraka: ?Xeeni nyuwo muniir'anyu nihiku n'esaapatu etthu ekhoottihiwe n'Ikano??

³Yesu aahiwaakhula iiraka: ?Khamunasome etthu Taviti yaapakaly'awe nihiku nimosa, okathi owo vamosa n'atthu awe yaavolinw'aya etala??

⁴Owo aahikela mpaani mwa Muluku, aahikuxa mikatthe sooveleelihiwa Muluku, khukhuura, khwaavaha ale yaarinaawe. Vano mikatthe iyo saakhuuriwa n'alipa a mukuttho paahi.

⁵Aahahimeerya-tho wira: Mwaana a Mutthu hata esaapatu ti Pwiya.

⁶Esaapatu ekina, Yesu aahivolowa mpaani moothukumana anawiixuttiha atthu. Aahikhala-mo mulopwana aarakanle ntata n'olopwana.

⁷Nto awiixuttihi a Ikano n'aFarisi yaaninwehexexa Yesu wira emoone aatthunaka onvoniha nihiku na esaapatu, wira ephwanye mulattu w'omootherya.

⁸Nto okhala wira Yesu aanisuwela oratta-ene itthu suupuwel'aya, aahimwirela oorakala owo wira: ?Nvenye murwe eriyari va.? Owo aahivenya khweemela.

⁹Yesu aahahimeerya atthu awo wira: Kinimookohani etthu eneemiheriwa nihiku na esaapatu t'ivi? Wiira sooreera wala sootakhala? Omoopola mutthu, wala ompwetexa?

¹⁰Nto aawehexexaka atthu othene, aahimwirela mutth'uwo wira: ?Mookole ntata.? Owo aahookola nave ntata nlo khukhala nikumi.

¹¹Awo yaahinanariwa vanci-ene enavaanela yaaworu etthu yaakel'aya omwiiriha Yesu.

¹²Mahiku awo Yesu aahirowa omwaako ovekela, khuviriha ohiyu wothene amuvekelaka Muluku.

¹³Vaxiy'aya, aahiwiihana awiixutti awe, khwaathanla eriyari aya muloko nanli, yaawo yaawihanalyawe-tho Arummwa.

¹⁴Simoni yoowo aanvahaly'awe nsina na Petru; Antere, muhim'awe Petru; Yakopo, Yohani, Filipe, Partolomeu;

¹⁵Matewu, ni Tome, Yakopo, mwaana a Alfeu; Simoni, yoowo iihaniwa Seloti;

¹⁶Yuta, mwaana a Yakopo ni Yuta Isikariyoti yoowo anvarin'he Yesu.

¹⁷Yesu aahikhuruwa vamwaako vamosa n'awo aaheemela nipuro noowataleya waahikhala vaavo muttitthi muulupale wa awiixutti awe ni muttitthi muulupale w'atthu waakhumme elapo yothene y'oYuteya n'oYerusalemu, ni mittetthe s'ophareya s'oTiro n'oSitoni.

¹⁸Atthu awo yaarwenle omwiiwa n'ovonihiwa iretta s'aya. Nave-tho yaavariwe minepa sootakhala yaanivonihiwa.

¹⁹Atthu othene yaaniphavela omukwannya Yesu, maana mwa yoowo waaninkhuma owerya waavoniha atthu othene.

²⁰Yesu aawehaka awiixutti awe aahahimeerya wira: Mooreeriwa nyuwo, alipa-oohaawa, okhala wira Omwene wa Muluku ti wawinyu.

²¹Mooreeriwa nyuwo, munvoliwa etala Vano, okhala wira munrowa ovonihiwa Mooreeriwa nyuwo muninla vano, okhala wira munrowa otheya.

²²Mooreeriwa ti nyuwo mwanyokhiwaka, ni mwaakhoottiwaka ni mwaattanyiwaka ni mootheriwaka mwaha woomuttharaka Mwaana a Mutthu.

²³Mutteliweke murima, mutthapeke nihiku nlo, okhala wira otthuveliwa wanyu wirimu onookhala wuulupale. Ti siiso axitiithi aya saawiirelaya maprofeta.

²⁴Nto mootakhaliwa nyuwo, athaaciri, okhala wira muhakhela vathi va otthuveliwa wanyu.

²⁵Mootakhaliwa nyuwo, muhireerano yoolya vano, okhala wira munrowa ovoliwa etala. Mootakhaliwa nyuwo, muntheya vano, okhala wira munrowa wiikhupanyerya ni wunla.

²⁶Mootakhaliwa nyuwo, mwaattottopeliwaka n'atthu othene. Okhala wira ti siiso axitiithi aya s'awirelaya maprofeta oowootha.

²⁷Yesu aahiira-tho: Vano kinooleelani nyuwo othene munikiwiriyana wira: Mwaaphenteke awanan'inyu ni nwiireleke s'oreera ale anonyokhani.

²⁸Mwaphaveleleke murettele ale anoophavelelani sootakhala ni mwavekeleleke ale aniwootheryani.

²⁹Onoomanani nlaku nimosa, mmutheteerye oomaneeni nikina-tho. Oniwaakhani mukhumi muhimukhottiherye okuxa nlaya.

³⁰Mwaavahe ale anoovekelani etthu ni akhala onikuxa etthu anyu muhimukhanyererye ottikiha.

³¹Etthu enosivelani wiireliwa n'atthu nave-tho nyuwo nwiireleke y'eyo akhw'inyu.

³²Mwaaphentaka yaale anoophentani paahi otthuveliwa xeeni munrow'anyu ophwanya wa Muluku? Hata alipa-ootakhala murima annaphenta ale anaphenta.

³³Mwaawiirelaka sooreera ale aniwiirelani sooreera, otthuveliwa xeeni onwehereryanyu, hata alipa-ootakhala murima anniira siiso.

³⁴Ankhi mwawoolihaka ale paahi anaakupalinyu wohokoloxeryani, ophenta xeeni iwo? Hata alipa ootakhala murima annolihana aroromelaka waakhela voolikanela.

³⁵Mwaaphenteke awanan'inyu. Nwiireleke sooreera akhw'inyu nwooliheke muhilipelelaka ohokoloxeriwa. Siiso otthuveliwa wanyu onookhala wuulupale, munrowa okhala aana a Muluku a wirimu-rimu tthiri Muluku onnareerela murima ale ahinxukhuru n'ale ootakhala murima.

³⁶Mukhaleke oomoriwa ikharari ntoko Muluku Tith'inyu siry'awe oomoriwa ikharari.

³⁷Muhaalamuleke Akhw'inyu, nave Muluku khonoolamulani. Muhaahukhumu akhw'inyu nave Muluku khonoohukhumuni. Mwaleveleleke akhw'inyu nave-tho Muluku onimoolevelelani.

³⁸Mwaavaheke akhw'inyu nave-tho Muluku onimoovahani. Muluku onimoovahani ni mphimo wooreera, w'osarya, wokhitteliwa mpakha ovakareya. Nave-tho Muluku onimoophimelani mphimo onrow'anyu waphimela akhw'inyu.

³⁹Yesu ahaahimeerya-tho nlikanyiho nla iiraka: Khino mulipa-oohoona onniwerya omuhoola mukhw'awe ohinoona? Iira siiso oowanli aya khanrowa omorela mulittini?

⁴⁰Ole onxuttihiwa khaninvikana ole onimwiixuttiha: Mwiixutti ooleleya oratteene onoolikana n'ule onimwiixuttiha.

⁴¹Munoona sayi ekokhola eri mmaithoni mwa mukhw'inyu, nto khohinoona muritta ori mmaithoni mw'anyu?

⁴²Wala munwerya sayi omwiirela munn'inyu wira: ?Murwe va, nkani kookumiheni ekokhola eri mmaithoni mw'anyu?, nyuwo muhiweryaka woona ele eri mmaithoni mwanyu? Nawoothe! Mpacerye okumiha muritta ori mmaithoni mwanyu nto numala mooneke oratta-ene wira mukumihe ekokhola eri mmaithoni mwa munn'inyu.

⁴³Khuuvo mwiri wooreera oniima mihokorokho s'ohiloka, nnakhala mwiri woohiloka oniima mihokorokho s'oloka.

⁴⁴Khula mwiri onsuwanyeya ni mihokorokho s'aya. Ipheera khasinrukuliwa mmiiwani nnakhala ikhacu khenrukuliwa mmarokani.

⁴⁵Mutthu ooreera murima onikumiha sooreera mmuhakhuni mooreera ori mmurimani mwawe; mutthu ootakhala murima onikumiha sootakhala mmuhakhuni mwawe mootakhala. V'ekeekhayi, eyano ya mutthu enlavula itthu-Isareiye mmurimani mwawe.

⁴⁶?Munikiirelela-ni.? Pwiya! Pwiya! Muhettelaka itthu sinoorumaakani?

⁴⁷Ole onrwa wa miyo ni oniiwa masu aka, khuyeettela, miyo kinoomooniherya mutthu onlikanan'awe.

⁴⁸Owo onlikana ni mulopwana aatenke emp'awe aahithipa malitti oowiixa, siiso aahemexa emp'awe vamwala. Vano, yaahirupa epula yuulupale, maasi a mmuro yaahiphwanya emp'eyo, masi khiyaawenrye ophela, maana yaahitekiwa orattene.

⁴⁹Vano mutthu onwiriyana moolumo aka, ahineettela, onlikana ni mulopwana atenke emp'awe vamihaavani, ahithimpe malitti. Vano muro waahisarya maasi, khuphwanya emp'eyo; naanaanoru emp'eyo yaahinttuwa, khuhihala etthu yeemenle.