Luke 7

¹Vaamalihaly'awe waalaleerya atthu itthu iya sothene, Yesu ahikela muttetthe w'oKafarnawu.

²Vano aahikhala weiwo mukhulupale mmosa aanakhotto a oRooma, aarina murumeyi awe amphentexawe, aawereiwa vanci-ene, anahala okhwa.

³Okathi mukhulupale owo vaaiwaly'awe aromolasiwaka Yesu aahaaruma mahumu makina a aYuta orowa okumaana n'uwo, wira anvekele orowa onvoniha murumeyi awe.

⁴Atthu awo yaahirowa omphwanya Yesu, khunvekela emuthipelelaka wira: ?Owo onniphwanela wira mmukhaliherye.

⁵Okhala wira owo onniphenta nloko n'ahu nave ti yoowo orumme otekiwa emp'ahu yothukumana.?

⁶Vano Yesu aahirowa ni yaawo, nto ehalaka ophiya etthoko eyo, mukhulupale owo aahaaruma apatthani awe orowa omuleela Yesu wira: Pwiya, muhuukhuwe, maana miyo nkiniphwanela wira mukele mpa mw'aka.

⁷Tivo nnakhala miyo nkiisoonne ophwanela wi kirwe kikumane ni nyuwo. Nto mulavule paahi nave murumeyi aka onoovona.

⁸Maana ni miyo-tho ka mutthu kiniwiiwelela makhulupale ni kookhalana asurutaato aka y'awo kinaarum'aka. Kinnimwiirela mmosa wira: ?Murowe?, owo onnirowa. Kamwiirela mukina wira: Murwe, owo onnorwa. Kamwiirela murumeyi aka wira: Nvare mutek'ola, owo onnivara.

⁹Iiwakaru siiso, Yesu aahitikinihiwa ni mulopwana owo. Aahirukunuwela muttitthi w'atthu yaamutthara khwahimeerya wira: Kinooleelani wira nnakhala mw'atthu a Isaraayeli nkiphwannye waamini nno wuulupale.

¹⁰Okathi vaatthikenly'aya owaani atthu ale yaarummwe yaahimphwanya murumeyi owo aawereiwa ari mukumi.

¹¹Numala, mmeeloni mwaya Yesu aahirowa muttetthe wiihaniwa Nayini. Awiixutti awe yaanimutthara vamosa ni muttitthi muulupale w'atthu.

¹²Ehalaka ophiya vamukhora wa muttetthe yaahikumana n'atthu yaakunxe murutthu, erowaka ovitha. Owo aari mmiravo, mwaana mmos'ene a anamukhweli. Muthiyana'owo aaniveleliwa n'atthu anci-ene a muttetthe ole.

¹³Apwiya okathi vaanwehahy'aya naamukhweli uwo, yaahimoonela othunku khumuhimeerya wira: ?Muhinle!

¹⁴Vano aahaattamela nrepa vaataleliwaya murutthu khuvara. Atthu yaathata nrepa yaaheemela. Vano Yesu ahiira: ?Mmiravo! Ti miyo kinoorumani: Nvenye!?

¹⁵Ole aakhwiye aahivenya akilathi, khukelela olavula. Yesu aahavahererya mmirav'owo ame awe.

¹⁶Atthu othene yaahisareya woova, enamuttittimiha Muluku yiiraka: ?Oonikhumelela hiyo profeta muulupale.? Awo yaanihimya-tho wira: ?Muluku ooxekurya nloko nawe.?

¹⁷Nto ehaali ela yaahimwareela mulaponi mothene n'ilapo s'owaattamela.

¹⁸Awiixutti awe Yohani Mpatisa yaahirowa omwaalikelela itthu iya sothene. Vano Yohani uwo ahaathanla anli mwa yaawo,

¹⁹khwaruma w'Apwiya omukoha wira: ?Ti nyuwo ole ontthuna orwa, wala nimmwalitteke mukina??

²⁰Okathi vaaphiyaly'aya wa Yesu, atthu awo yaahimuhimeerya wira: ?Yohani tonirumme orwa va, wira nookoheeni wira ti nyuwo ole ontthuna orwa wala nimulipeleleke mukina.?

²¹Okathi, yoowo, Yesu aahaavoniha aretta anci-ene n'uhaawa waya, naale yaavariwe minepa sootakhala, ni aahaatthukula maitho alipa-oohoona.

²²Nto Yesu aahiwaakhula atthu ale yaarummwe iiraka: Murowe mwamwaalikelele Yohani itthu iya soonaly'anyu n'iya siiwaly'anyu: Alipa-oohoona annoona, alipa oorakala anneetta anamakuttula annivonihiwa, alipa oohiiwa anniwa, atthu akwiiye annihihimuxiwa, alipa-oohaawa annilaleeriwa Ehapari Yooreera.

²³Ooreeriwa t'ule ohinihiya waamini wawe wa miyo.

²⁴Okathi atthu ale yaarummwe ni Yohani yaahokolonw'aya arowaka, Yesu aahikelela olavula sa Yohani iiraka: Mwaaronwe woona-wo exeeni? Woothakoni? Mutthu oohilipalipa ntoko Mutathi onttikinyiwa ni epheyo?

²⁵Nanso mwaaronwe woona exeeni? Mutthu owanre sooreeraxa? Munnisuwela oratta-ene wira mutthu onwara ikuwo sooreeraxa ni onipuha anikhala itthoko sa mamwene.

²⁶Nto mukihimeerye mwaaronwe woona exeeni? Omoona profeta? Ayo, nave miyo kinnohimeeryani wira: Owo ti muulupale onvikana profeta;

²⁷owo ti y'ole ohimmwe mwa Soolempwa wira: Kinoomuruma munkelo aka ohoolo w'anyu, wira alokihe ephiro anyu.

²⁸Nave miyo kinnooleelani wira: Mw'atthu othene ayariwe ni muthiyana khaavo muulupale onvikana Yohani Mpatisa. Nto ole ori mwaamukhaani moomweneni mwa Muluku t'uri muulupale onvikana Yohani.

²⁹Atthu othene yaamwiiwa, hata alipa ooliviha mpoosito yaahaamini exariya ya Muluku, khupatisiwa ni yoowo.

³⁰Nto aFarisi n'awiixuttihi a ikano yaahikhootta otthuna wa Muluku ni yaahikhootta opatisiwa ni Yohani.

³¹Yesu ahaahimeerya-tho wira: Nto kini kaalikanyihe n'ani atthu ala a vano? Awo anlikana n'ani?

³²Anlikana n'anamwane anrukuneya muramphani ekhuwelelanaka mukina ni mukhw'awe yiiraka: ?N'owoopelani ikoma sootteeliha murima nto nyuwo khuhiina, Noowiipelani masipo oowikhupanyerya nto nyuwo khuhinla.?

³³Vekeekhayi ohoorwa Yohani Mpatisa ohinlya yoolya ni ohinwurwa eviinyu nto nyuwo munihimwa wira ola ori ni munepa wa Satana.

³⁴Numala ohoorwa Mwaana a Mutthu onlya ni onwurya, nto munihimya wira: ?Mmooneke mutth'ula! Namulya ni namuhapaliwa, mpatthani a anamaliviha mposito n'atthu ootakhala murima.?

³⁵Vano ale aneettela miruku sa Muluku annooniherya wira ti sooloka.

³⁶Nihiku nimosa nFarisi mmosa aahimulattula Yesu olya owanny'awe. Yesu aahikela khukilaathi analya.

³⁷Nto muttetthe ole aahikhala muthiyana mmosa namuttompe. Vaasuwenly'awe wira Yesu aamoolya owanny'awe nFarisi ule, aahirwa akunxe-ene, murinki w'osareya makhura oowunkhela.

³⁸Ahikokhora aattamenle-ene inawu sa Yesu, khupacerya wunla: Ni maithori awe aaninaaniha inawu sa Yesu; vano aanipuputtha n'ikharari sawe, anaavaha epeecu, ni anaattikitthela makhura yaawo.

³⁹Nfarisi uwo aamulattunle Yesu, voonaly'awe aahihimya mmurimani mwawe wira: ?Mulopwana ola aari mwa profeta aamusuwela makhalelo awe muthiyana ola oninvarakasa munawuni, okhala wira natampi.?

⁴⁰Nto Yesu aahimwaakhula wira: ?Simoni kihaana etthu yoowohimeeryani.? Owo khwaakhula wira: ?Muhimyeke mwiixuttihi.?

⁴¹Mutthu mmosa aahikopheliwa n'atthu anli, mukina aamukophenle imiya thanu, mukina aamukophenle ilivura muloko.

⁴²Nto okhala wira oowanli aya khiyaari yomulivana, aahaalevelelela, nto w'atthu awo anli t'ani onrowa omphentexa yoowo?

⁴³Simoni aahaakhula wira: Kinoona wira t'ule aaleveliwe imiya thanu! Yesu aahimuhimeerya wira: ?Muhaakhula oratta-ene.?

⁴⁴Nto arukunuwaka anwehaka muthiyan'ole, aahimuhimeerya Simoni wira: ?Munnimoona muthiyana ola? Kookela mpaani mwanyu nyuwo khamukivanhe maasi oorapihela inawu, nto ola oorapiha inawu s'aka ni maithori awe khupuputtha n'ikharari sawe.

⁴⁵Nyuwo Khamukivan'he epeecu: Vano ola akelakaru-mu, khahiyerenrye ovaha epeecu inawu saka.

⁴⁶Nyuwo khamukittikitthenle makhura mmuruni: Vano ola ookittikitthela makhura oowuunkhela munawuni.

⁴⁷Tivo vanooleelakani wira: Itampi sawe, sirookhalaru sinci-ene sothene sooleveleliwa. Tivo ola omphentawe vanci-ene. Maana ole onleveleliwa vakhaani, oniphenta vakhaani siiso.

⁴⁸Numala aahimuhimeerya muthiyana owo wira: ?Itampi sanyu sooleveleliwa.?

⁴⁹Nto atthu yaakilatthany'awe vaavo yaahipacerya wiikoha mmirimani mwaya wira: ?Ti pani ula onwerya olevelela hata itampi??

⁵⁰Nto Yesu aahimuhimeerya muthiyana owo wira: Waamini wanyu wowoopolani. Murooke ni murettele.