Luke 8

¹Vahoolo vaya, Yesu anivira mittetthe sothene n'ilapo sothene, alaleyaka Ehapari Yooreera y'omwene wa Muluku. Yanimutthara awiixutti awe muloko nanli,

²n'athiyana akina yaakumihiwe minepa sootakhala ni yaavonihiwe iretta saya. Maria Matalena, yoowo aakumihiwe minepa mithanu namili sootakhala,

³Yowana mwar'awe Khusa murumeyi awe Heroti, Susana, n'akina anci-ene yaanimurumeela Yesu n'awiixutti awe emukhaliheryaka ni mihakhu saya.

⁴Atthu anci-ene a mittetthe sothene yaahirwa emphavelaka Yesu. Okathi muttitthi muulupale waamuthukumanenly'awe, owo aahahimeerya nlikanyiho nla iiraka:

⁵Mutthu mmosa aahivenya arowaka omisa epyo awe. Amisaka siisale, epyo ekina yaahimorela mphironi, nto eyo yaahinyakeliwa, nave axipalame yaahithupasa yothene.

⁶Epyo ekina yaahimorela vamasoro-soroni nto okathi v'amenly'aya yaahuuma maana khivaanaanela-vo.

⁷Epyo ekina yaahimorela variyari va miiwa, nto miiwa iyo sinnuwaka saahivuvurya epyo eyo.

⁸Nto yaahikhala epyo ekina yaamorenle vathayani vooreera. Epyo eyo yaahinnuwa khurelana mpakha miloko muloko wa khula epyo. Amalihaka aahihimya wira: ?Ari ni maaru oowiiwa animwiiwa!?

⁹Numala awiixutti awe yaahimukoha Yesu yiiraka: Nnihimya ni nlikanyiho nla?

¹⁰Yesu aahiwaakhula wira: ?Nyuwo moovahiwa osuwela mitikiniho sa omwene wa Muluku. Nto atthu akina annilaleeriwa ni malikanyiho wira ewehaka ehooneke, yiiwaka ehisuweleke.?

¹¹Nlikanyiho nla nnihimya wira: Epyo ti Masu a Muluku.

¹²Epyo yaamorenle mphironi, atthu y'ale aniiwa masu a Muluku nto onarwa Satana onakumiha masu mmurimani mwaya wira ehaamini, yoopowe.

¹³Epyo yaamorenle vamasoro-soroni, atthu y'ale aniiwa Masu a Muluku enaakhela n'utteeliwa murima, nto okhala wira awo kharina mitathaari, anaamini okathi vakhaani. Nto okathi wo wehereriwa annihiya waamini waya.

¹⁴Epyo yaamorenle va miiwani, atthu y'ale aniiwa Masu a Muluku, nto mwaha sooxankiha ni mihakhu n'upuha w'ekumi aya. Siiso awo annivuvuriwa ahinaima muhokorokho wooreera.

¹⁵Nave epyo yaamorenle etthaya yooreera, atthu ale aniiwa Masu a Muluku eneettela ni murima wooreera ni wowiwelela, nave anakhala oororomeleya mpakha wiima mihokorokho.

¹⁶Khaavo ompattiha muthuko awe khiyakhuneela ni mwaapu wala anaiyaathi mukulukutheleni. Onipweha nipuro n'ottukhuwa wira aamwaleeleke oratta-ene ale anikela-mo.

¹⁷Khiivo etthu yoovithiwa ehinrowa wooniheriwa, hata eniiriwa wiiphini ehinrowa osuwelihiwa ni ehinrowa wuupululiwa.

¹⁸Tivo mwiiwe oratta-ene ele miyo enooleelakani wira: Ale orina, Muluku onimwaavaha-tho, ale ahirina etthu, hata ele enuupuwelaya okhalana animwaakhiwa.

¹⁹Amam'awe n'axihim'awe Yesu yaahirwa okumana ni yoowo: Vano khiyaawerya omwattamela mwaha w'atthu yahareere.

²⁰Vano Yesu aahileeliwa wira: ?Amam'inyu n'axinn'inyu ari vate vale, amphavela woowehani.?

²¹Nto Yesu aahaakhula iiraka: Amam'aka n'axin'aka t'ale aniiwa moolumo a Muluku khiyeettela.

²²Nihiku nimosa, Yesu aahikela mukalawani vamosa n'awiixutti awe khwaahimeerya wira: Nrowe nilapuwele ekhopela ekina ya nratta. Khuvenya vale.

²³Nto okathi waalapuw'aya Yesu aahirupa. Vano yaahikhumelela epheyo yuulupale varattani nave yaanikela maasi manci-ene mukalawani khiyahaha vakhaani osama.

²⁴Awiixutti yaahinvenxa Yesu emuhimeeryaka wira: ?Mwiixuttihi, Mwiixuttihi, nnimookhwa!? Owo aahivenya khuruma epheyo ni mawimpi, vano epheyo yaahimaala ni mawimpi yaahiikhalela.

²⁵Vano Yesu aahahimeerya awiixutti awe wira: ?Waamini wanyu ori vayi?? Nto awiixutti yaahitikinihiwa ni woova, n'uthamala, enahimeeryana wira: Mano, mutth'ula ti pani? Ola onniruma epheyo ni mawimpi, khiyamwiiwelela!

²⁶Nuulapuwa, Yesu n'awiixutti awe yaahiphiya elapo y'oKerasa enkhala oluluwana n'oKalileya.

²⁷Okathi Yesu vaakhurunw'awe mukalawani, aahitthimakeliwa ni mutthu mmosa aakhuma omuttettheni, aavariwe minepa sootakhala. Okhuma khalayi khaawara etthu, khaakhala vate, akhala omahiye.

²⁸Okathi vaamoonaly'awe Yesu, aahikokhora ohoolo wawe anakhuwela vanci-ene iiraka: ?Murina-ni ni miyo nyuwo Yesu Mwaana a Muluku a wirimu-rimu? Kinnovekelani wira muhikihaaxe!?

²⁹Yesu aahiruma munepa wootakhala omukhuma mutth'uwo, okhala wira imaara sinci-ene waanimuhaaxa mutth'uwo, naari atthu amutthukwaka matata n'inawu n'ikwirinti wira amukhapelele, owo aanikhwasa sothene nave munepa owo waanimukuxa omurowanaka woothakoni.

³⁰Yesu aahimukoha iiraka: ?Nsina nawo t'ani?? Owo aahaakhula wira: Kiniitthaniwa muttitthi. Okhala wira aavariwe ni minepa sinci-ene sootakhala.

³¹Minepa iyo s'ahinvekela Yesu wira sihoomoleliwe nipuro n'owixa.

³²Nave vakhiviru vaavo naahikhala nikoto nuulupale na ikuluwe naalya omwaako. Minepa iyo saahinvekela Yesu wira ahiye sikele mukuluweni, Yesu aahitthuniherya.

³³Minepa iyo sootakhala saahimukhuma mulopwana owo khukela mukuluweni, nto nikoto nlo na ikuluwe naahikelela otthyawa irowaka oneri, khumorela varattani nto khusama memmo.

³⁴Amakampusi voonaly'aya etthu ele, yaahitthyawa erowaka omuttettheni ni mapuro oowattamela khulaleya sothene saakhumelenle.

³⁵Vano atthu anci-ene yaahirowa woona yiiraneiye. Ephiyakaru v'ary'awe Yesu tthiri yaahimphwanya mulopwana, yoowo saamukhumme minepa sootakhala, akilanthe-ene vakhiviru va Yesu, awanre-ene ni arina ankhili, atthu awo yaahoova.

³⁶Nto anamoona yaahiwaalikelela enamuna yoopoliw'awe mutth'uwo aavariwe minepa sootakhala.

³⁷Nto atthu othene a elapo y'oKerasa yaahinvekela Yesu wira akhume mulaponi mwaya, maana yaanoova vanci-ene. Yesu aahitthikela mukalawani khuhokolowa.

³⁸Mulopwana owo aavonihiwe aahinvekela wira amuhiye wi akhale ni yoowo. Nto Yesu aahimuruma orowa, amuhimeeryaka wira:

³⁹?Muhokolowele owannyu mwalaleye sothene Muluku siwiirenlyaweni.? Mulopwana owo aahirowa, khweetteetta muttetthe wothene alaleyaka sothene Yesu saamwiirenly'awe.

⁴⁰Muttitthi w'atthu waahimwaakhela n'utteeliwa murima, okhala wira atthu othene yaanimulipelela.

⁴¹Okathi yoowo, aahiphiya mutthu mmosa iitthaniwa Xairo mukhulupale a mpaani moothukumana. Owo aahikokhora ohoolo wa Yesu anvekelaka wira arowe owanny'awe.

⁴²Okhala wira aarina mwan'awe mmosa-ene mwamuthiyana aarina iyaakha muloko ni piili aahanle okhwa. Okathi waarow'awe, muttitthi w'atthu waanimphunya Yesu mipantte sothene.

⁴³Muttitthi uwo aahikhala-vo muthiyana mmosa aavinre iyaakha muloko ni piili ephome awe ehononeyaka. Aamalihale muhakhu awe wothene awaveryaka akhulukana: Nto khaavo aawenrye onvoniha.

⁴⁴Owo aahaattamela ottuli wa Yesu, khukwata mukerekhere mwa nlaya n'awe. Naanaanoru ephome yaahimuxeya.

⁴⁵Nto Yesu aahikoha iiraka: ?T'ani okikwannyale?? Othene yaamuruna. Nto Petru aahimuhimeerya wira: Mwiixuttihi muttitthi ula onnoophunyani wookakhakani mipantte sothene! Nto munikoha wira t'ani yookwannyaleni.

⁴⁶Yesu aahithipelela, iiraka: Ookhala okikwannyale. Kihoona wira owerya waka wookhuma wa miyo.

⁴⁷Nto muthiyana owo voonaly'awe wira aahisuweliwa, aahimwaattamela Yesu athukumelaka, aahikokhora vakhiviru vawe. Vano, vamaithoni v'atthu othene aahimuhimeerya Yesu mwaha waamukwannyenry'awe ni enamuna saavonihiw'awe naanaanoru.

⁴⁸Vano Yesu aahimuhimeerya wira: ?Mwan'aka, waamini wanyu wowoopolani. Murooke ni murettele!?

⁴⁹Nlelo alavulaka siis'ale aahiphiya mutthu a vate va mukhulupale a mpaani moothukumana, khwiira: ?Mwaninyu ohookhwa. Muhimuukhule-tho Mwiixuttihi ula.?

⁵⁰Nto Yesu aahiiwa moolumo ala khumuhimeerya Xairo wira: ?Muhoove mwaamini paahi, mwaninyu onookhala mukumi.?

⁵¹Aahikela mpaani mwa Xairo, nave khaatthunihenrye atthu akina okela ni yoowo mpaani, ahikhanle Petru, Yakopo ni Yohani vamosa n'atiithi awe, n'amam'awe mwali uwo.

⁵²Atthu othene yaaninla emukhupanyeryaka. Nto Yesu aahiwiirela wira: ?Muhinle, mwali ola khokhwiiye onoorupa.?

⁵³Atthu yaanimutheya Yesu maana yaanisuwela wira oohookhwa tthiri.

⁵⁴Nto Yesu anvarelaka ntata mwali uwo aahimwiihana aituperyaka iiraka: ?Mwali, nvenye!?

⁵⁵Owo aahihihimuwa, nave khuvenya naanaanoru. Yesu aahiruma wira avahiwe eyoolya.

⁵⁶Atiithi awe n'ame awe mwali uwo yaahitikinihiwa. Vano Yesu aahaaruma wira ehimuleele mutthu etthu y'akhumelenle.