Luke 9

¹Yesu aahaathukumanya arummw'awe muloko nanli khwaavaha owerya n'ikuru soowomola minepa sothene sootakhala n'uvoniha iretta.

²Nave-tho aahaaruma olaleya Omwene wa Muluku ni wavoniha aretta.

³Nto aahahimeerya wira: Mwaarowaka muhikuxe etthu, nnaari ekopo, nnakhala murupa, wala y'olya hata musurukhu, nnakhala soowara piili.

⁴Mwavahiwa opuro mukhaleke ntthoko nenlo mpakha ovenya elapo eyo.

⁵Yakhala etthoko ehinrow'anyu wakheliwa mwaavenyaka vo mutatheke ntthupi na munawuni mwanyu, nenlo nikhale nthoonyeryo nnavirikanya.

⁶Nto awiixutti yaahivenya khuvira mittetthe sothene, elaleyaka Ehapari Yooreera yaavonihaka aretta mipantte sothene.

⁷Mwene Heroti ahiiwa sihimmwaka sothene sakhumelela. Vano anitikhina itthu iya, maana atthu akina yaanihimya wira Yohani oohihimuwa mookhwaani.

⁸Akina yaahimya wira ti Eliya okhumelenle, nave-tho atthu akina yaahimya wira ti mmosa a maprofeta a khalayi ohihimunwe.

⁹Heroti aahiira: Yohani Mpatisa, miyo kaahiruma wiikitthiwa exiko. Nto owo kiniiw'aka ohimmwaka t'ani? Nto aaniphavela omoona Yesu.

¹⁰Okathi vaahokolonw'aya arummwa, yaahimwaalikelela Yesu sothene siiraly'aya, nto Owo aahaakuxa khwaarowana wothakoni muttetthe onitthaniwa Petesaita.

¹¹Nto muttitthi w'atthu, vasuwenlyaya, waahimutthara. Yesu aahiwaakhela atthu awo, analaleerya omwene wa Muluku, anaavoniha ale yaawereiwa.

¹²Nsuwa nihaleelaka vakhaani osama arummwa awo yaahimwaattamela Yesu khumuhimeerya wira: ?Mwaaleele atthu ala emwareyeke, eroweke mmittettheni n'itthoko soowaattamela wira yaphwanye y'olya ni mapuro oorupa maana va nri moothakoni.?

¹³Yesu aahiweirela: ?Mwaavahe yenyu yoolya!? Awo yaahimwaakhula wira: ?Hiyo nrina mikatthe thanu n'ihopa piili paahi. Khino nrowe hiyano, nathume yoolya yo waavaha atthu ala othene!?

¹⁴Nto yaahikhala-vo alopwana waattamela imiya miloko mithanu. Vano Yesu aahahimeerya awiixutti awe wira: ?Mwaahimeerye atthu ekilaathi khula nipuro miloko mithanu.?

¹⁵Awo yaahiira siiso nave khwaakilathiha atthu othene.

¹⁶Nto Yesu aahikuxa mikatthe iyo thanu n'ihopa iyo piili, khuweha wirimu, khureeriha mikatthe ni ihopa iyo. Numala khumeyanya khuwinnya awiixutti awe wira yaakawele atthu.

¹⁷Othene yaahilya mpakha ovona nave-tho yaahittottela mapattuxa yaahanle khusariha ittokwa muloko ni piili.

¹⁸Nihiku nimosa Yesu iira avekelaka meekh'awe, awiixutti awe yaahimwaattamela yoowo. Nto Owo aahaakoha iiraka: ?Atthu anihimya wira miyo ki pani??

¹⁹Awo yaahimwaakhula yiiraka: Akina aaniira mwa Yohani Mpatisa, akina anihimya wira mwa Eliya, akina-tho anihimya wira mwa mmosa a maprofeta a khalayi ohihimuwale.

²⁰Yesu aahaakoha-tho wira: ?Mankhi nyuwo munihimya wira miyo ki pani?? Petru aahimwaakhula iiraka: ?Nyuwo mwa Kristu a Muluku.?

²¹Owo aahaalopola awo muloko nanli khwaaruma wira ahimuleele mutthu rtthu'ila.

²²Aahahimeerya-tho wira: ?Mwaana a Mutthu ohaana ohaawa itthu sinci-ene n'ukhottiwa ni mahumu n'anamukuttho, n'awixutthi a ikano, ohaana wiiviwa n'uhihimuwa mookhwaani mmurottoni mwaya.

²³Vano aahahimeerya atthu othene wira: ?Akhala mutthu ontthuna okitthara, aikhootte mwanene, akapatteke nihiku ti nihiku mwiikimanyo awe akitthareke.?

²⁴Maana ole ontthuna woopola ekumi awe, onoopwetexa; vano ole onkupali orimeeliha ekumi awe mwaha wa miyo, owo onimoopola yeeyo.

²⁵Mutthu oniphwanya-ni okhala mwaneene olumwenku wothene arowaka wiipwetexa n'urimeela mmansawe?

²⁶Akhala mutthu onuliwa muru mwaha wa miyo ni masu aka, nave-tho Mwaana a Mutthu onimuuleliwa muru yoowo okathi ontthun'awe orwa munttittimihoni mwawe ni mw'Atiithi awe ni mw'ankelo aya ooreera murima.

²⁷Kinooleelani ekhweeli wira vaava ahaavo akina ahinrowa okhwa ehoonne toko omwene wa Muluku.

²⁸Vaaviralyaya mahiku mathanu na mararu ahimmye-ene moolumo ala, Yesu aahimukuxa Petru ni Yohani ni Yakopo, Khuwela omaako wira avekele.

²⁹Avekelaka siis'ale, ekhove awe aahirukunuxa mukhalelo awe, soowara sawe saahikhala sootteelaxa sinatutha.

³⁰Vano alopwana anli yaanilavula ni yoowo: ?Monse ni Eliya,?

³¹erukureriwe-ene ninttittimiho, yaanilavulasa okhwa wa Yesu, waarowa wiiraneya oYerusalemu.

³²Petru naakhw'awe yiira erupaka, nto vaavenyaly'aya yaahoona nttittimiho na Yesu naalopwana anli yaari vaavale ni yoowo.

³³Alopwan'awo okathi vaakhumaly'aya wa Yesu, Petru ahisuwelaka etthu yoohimya aahiira: ?Mwiixuttihi, vareerenle hiyo okhala vaava! Nrowe nteke iheema tthaaru, emosa yawinyu, ekina ya Monse ni ekina-tho y'Eliya.?

³⁴Alavulaka siiso, naahirwa neeku khwaakhuneela. Ekelaka muneekuni mmo, awiixutti ale yahoova vanci-ene.

³⁵Vano naahiiwanyeya nsu nikhumaka muneekuni memmo, niiraka: ?Ola Mwan'aka omuthanlaly'aka; mmwiiweleleke yoola.?

³⁶Nsu nle niiwanyeyaka, yahoona wira Yesu aahanle mekhaawe. Awiixutti ale araru khiyaahimmye etthu; mahiku-ene yaawo khaavo aamuleenly'aya itthu iye soonaly'aya.

³⁷Mmeloni mwaya, ekhuruwaka vamwaako, waahirwa okumaana ni Yesu muttitthi muulupale w'atthu.

³⁸Nto mmuttitthini memmo, mulopwana mmosa aahimukhuwelela Yesu iiraka: ?Mwiixuttihi, kinnovekelani wira munwehe mwan'aka maana kirina yoola paahi.

³⁹Wookhala munepa wootakhala oninvara owo, wanvara vale naanaanoru onnimukhuweliha; munepa owo onnimmoroxela vathi onamuripithula n'ikuru omukumihaka nipheru mwaano, owo khummuhiya ohimuhaaxale vanci-ene.

⁴⁰Kihavekela awiixutti anyu wira yoomole munepa owo nto awo khuhiwerya.?

⁴¹Yesu aahahimeerya atthu wira: Nyuwo, atthu oohaamini ni oorimeela: Mpakha lini kiniiraaka kikhale ni nyuwo, koovilelakani? Kiruuheleni va mwan'inyu.

⁴²Okathi mmiravo owo wamwaattamelawe Yesu, munepa wotakhala owo waahimurihela vathi khumuripithula n'ikuru. Yesu aahoomola munepa owo, khunvoniha mmiravo owo nave khunvahererya tiithi awe.

⁴³Othene yaahitikinihiwa n'uwerya wuulupale wa Muluku. Nave etikinihiwaka siiso n'itthu sothene siir'awe Yesu, owo aahahimeerya awiixutti awe wira:

⁴⁴?Mwiiwe saana etthu enrow'aka wohimeeryani: ?Mwaana a Mutthu ohanle ovahereriwa mmatatani mw'atthu.??

⁴⁵Awo khiyaasuwela moolumo awo, okhala wira yahikhuuwa. Tivo vahaasuwel'aya, nave yaanoovelela omukoha Yesu itthu seiyo.

⁴⁶Nihiku nimosa awiixutti yaahikelela ovaanyihana mwaha wa ti pani a yaawo aarowa okhala muulupale.

⁴⁷Yesu aahisuwela suupuwel'aya mmurimani mwaya nto aahimukuxa mwanamwane mmosa aahimweemexa ohoolo wawe.

⁴⁸Khwahimeerya awiixutti awo wira: Ole onimwaakhela mwanamwane ola mwa nsina naka onikaakhela miyo. Vano ole onikaakhela miyo, onimwaakhela ole okirumme. Okhala wira ole ori mwamukhaanixa mwa nyuwo othene, yoowo t'uri muulupale.

⁴⁹Yohani aahimuhimeerya Yesu wira: ?Mwiixuttihi, noomoona mutthu oomolaka minepa sootakhala ni nsina n'anyu nto noomukhoottiherya, okhala wira khaneetta ni hiyo.?

⁵⁰Vano Yesu aahahimeerya wira: ?Muhimukhoottiherye okhala wira ole ohinnivirikanya t'awihu.?

⁵¹Vano-nto vahalaka vakhaani ophiya mahiku Yesu aarow'awe okuxiwa elapo ela ya vathi, Yesu aahilakela orowa oYerusalemu.

⁵²Aahaahooliha anamitthaka akina nto awo vaarowaly'aya yaahiphiya muttetthe w'oSamariya wira elokiherye nipuro n'omaka.

⁵³Nto atthu a muttetthe owo khiyaatthunne omwaakhela Yesu maana aarowa ephiro y'oYerusalemu.

⁵⁴Vonalyaaya siiso, awiixutti awe anli Yakopo ni Yohani, yaahimukoha wira: Pwiya munnitthuna wira nirume okhuruwa mooro wirimu, waapwetexe atthu ale?

⁵⁵Nto Yesu aahirukunuwa khwaapwapwela iiraka: Nyuwo khamunsuwela munepa xeeni orin'anyu;

⁵⁶okhala wira Mwaana a Mutthu kharweenle opwetexa iroho s'atthu, nto orweenle woopola. Nto yaahikhuma khurowa muttetthe mukina.

⁵⁷Yeettaka siisaale mutthu mmosa aahimuhimeerya Yesu wira: ?Pwiya kinimoottharani khula nipuro ninrow'anyu.?

⁵⁸Yesu aahimwaakhula iiraka: ?Akhwatte aakhalana mittupha saya, axipalame aakhalana ipuru saya, nto Mwaana a Mutthu kharina nipuro n'omumula.

⁵⁹Numala aahimwirela mukina wira: ?Mukitthareke.? Nto owo aahimwaakhula wira: ?Pwiya mukihiye kipacerye orowa wavitha atiithi.?

⁶⁰Yesu aahimuhimeerya wira: ?Mwaahiye alipa-ookhwa y'avithe alipa-ookhw'aya nto nyuwo murowe mwalaleye Omwene wa Muluku.?

⁶¹Aahikhala mukinaku aamuhimenrye wira: ?Pwiya miyo kinnitthuna orowa ni nyuwo, vano kimpacerya orowa waalaxerya amusi aka.?

⁶²Yesu aahimwaakhula wira: Ole oniira alimaka khuyaweha ottuli khaniphwanela moomweneni mwa Muluku.