Luke 10

¹Numala, Apwiya yaahathanla awiixutti akina miloko mithanu na miili, khwaaruma orowa anli-anli mittetthe ni mapuro othene yaarow'awe ovira.

²Nto aahahimeerya wira: ?Ematta yuulupale nto anamuteko ari vakhaani. Munvekele mwaneene ematta wira aarumihele anamuteko mmatta mwawe.?

³Murowaseke, nto nwehe wira kinoorumani ntoko ipwittipwitthi soolopwana eriyari ya miici.

⁴Muhikuxe murupa, hata esaakho, nnakhala isantaalya, nave mphironi muheemele mmukohaka mutthu ihaali.

⁵Khula etthoko enkel'anyu omaka, mpaceryeke wira: ?Murettele okhale etthoko ela.?

⁶Akhala weiwo mutthu omphwanela murettele, mwa yoowo onookhala murettele anyu aahikhale mutthu siisa, murettele onimoohokolowelani.

⁷Mukhaleke etthoko yeeyo, mulyeke, nwuryeke envahiwaanyu, okhala wira namuteko oniphwanela oliviwa. Muhivire etthoko t'itthoko.

⁸Muttetthe ti muttetthe munrow'anyu ophiya, atthu yawaakhelani mulyeeke y'ele envahiw'aanyu.

⁹Mwaavoniheke aretta a weiwo; mwaalaleeryeke wira: ?Omwene wa Muluku woophiya wa nyuwo.?

¹⁰Vano, mittetthe sinrowanyu ophiya, mwahaakheliwe, nvenye, mweemele nipuro nowooneya, mwaahimeerye axineene wira:

¹¹Hata ntthupi na muttetthe anyu, n'attweelelihale inawu sahu nihootathelani nyuwo. Vano nto musuwele wira Omwene wa Muluku woophiya wa nyuwo.

¹²Yesu ahaahimeerya-tho wira: Kinooleelani wira nihiku noolamuliwa atthu a oSotoma anoomoreliwa ikharari waavikana atthu a muttetthe owo.

¹³?Mootakhaliwa nyuwo Khorasini! Mootakhali nyuwo Petisaita! V'akhanle wira sootikiniha siireliw'anyu siiriwe mittetthe W'aTiro ni W'oSitoni, saano atthu a weiwo arukununxe-ene murima khalayi, ni awanre-ene ikuwo s'onipiwa murima, yaamuttharuwa sootakhala saya.

¹⁴Tivo, nihiku n'olamuliwa atthu a oTiro ni a oSitoni anrowa omoreliwa ikharari wovikanani nyuwo.

¹⁵Khi nyuwo Kafarnawu, munimunnuwihiwa mpakha wirimu? Munooyevihiwa mpakha oriheliwa omooroni!?

¹⁶Numala aahahimeerya awiixutti awe wira: Ole oniwiiwelelani onikiiwelela miyo ole onookhoottani onikikhootta miyo, nave onimukhootta ole okirumme.

¹⁷Awiixutti ale miloko mithanu na miili n'anli yaahihokolowa etteeliwe-ene murima nave yaanihimya wira: ?Pwiya, hata minepa sootakhala sinniniiwelela mwa nsina nanyu!?

¹⁸Yesu aahiwaakhula iiraka: ?Miyo kaanimoona Satana omoraka wirimu ntoko overunya.?

¹⁹Mwiiwe! Miyo kihoovahani owerya w'onyakatta inowa ni makharnace n'uxintta ikuru sa nwanani, khiivo enwerya owiirihani yootakhala.

²⁰Nto muhitteeliwe murima mwaha wo wiweleliwa ni minepa sootakhala. Mutteeliweke murima, mwaha woolempwa masin'anyu wirimu.

²¹Okathi-ene yoowo, Yesu aahisareya otteeliwa murima mwa Erooho Yooreera khuhimya wira: ?Kinnooxukhuruni, Tiithi, Mwaneene erimu ni elapo ya vathi okhala wira moowoniherya atthu ahinooneliwa vatthu itthu s'avithenry'anyu atthu oosuwela ni a miruku. Ayo, Tiithi kinnooxukhuruni.

²²Atiithi aka aakivahererya sothene. Khaavo onimusuwela Mwaana, ehikhanle a Tiithi, nave khaavo onaasuwela a Tiithi ohikhanle Mwaana n'ale Mwaan'owo ontthun'awe wasuweliha.

²³Nto Yesu aarukunuwelaka awiixutti awe aahahimeerya wiphiini wira: ?Ooreeriwa maitho anoona itthu sinoon'anyu.?

²⁴Kinoohimeeryani wira maprofeta ni mamwene manci-ene yaaniphavela woona itthu sinoon'anyu, nto khuhoona, nave yaaniphavela wiiwa itthu siniiwanyu, khuhiiwa.

²⁵Mutaphuleli mmosa a Ikano aphavelaka omwehererya Yesu ahimukoha wira: ?Mwiixuttihi, kiireke-ni wira kiphwanye ekumi ehinimala??

²⁶Yesu aahimwaakhula wira: ?Soolempwa sa ikano sinihimya ni, nyuwo muntaphulela sayi??

²⁷Owo aahaakhula wira: ?Mwaaphente Apwiya Muluku anyu ni murim'anyu wothene n'iroho anyu yothene n'ikuru s'anyu sothene n'usuwela wanyu wothene. Ni mumphente mukhw'inyu ntoko siniiphent'anyu.?

²⁸Yesu aahimwirela: Muhaakhula oratta-ene. Mwiireke siiso munoophwanya ekumi?

²⁹Nto owo aphavelaka wiihimya saana, aahimukoha Yesu wira: Nto mukhw'aka ti pani?

³⁰Yesu aahimwaakhula wira: Aahikhala mulopwana aakhuma oYerusalemu arowaka oYeriko. Anawiiye yaahinvara, khumwaakha ikuwo s'awe sothene saarin'awe, yaahimmana khumuhiya ahaleelaka vakhaani okhwa.

³¹Okathi uwo, aahivira ephiro y'eyo namukuttho mmosa. Vamoonaly'awe mutth'uwo aahimuxerema.

³²Siiso-tho aahivira vaavo muLevi mmosa nave-tho owo aahimoona mutth'uwo khumuxerema.

³³Vano aahivira vaavo muSamariya mmosa aarowa ekwah'awe, amoonakaru mutth'uwo aahimmorela ikharari.

³⁴Khumwaattamela khumuloola makhwatt'awe ahelaka makhura ni eviinyu khutthuka ni ntapwata, numala aahimukuxa vapuruuni vawe amurowanaka vatthokoni vaamak'aya aletto, khunamukhapelela.

³⁵Mmeeloni mwaya aahikumiha musurukhu miili wa eparatha khunvaha mwaneene etthoko, khumuhimeerya wira: ?Mmukhapelele mulopwana ola, nto waahiphiyerye musurukh'ula kaahokolowaka kinimoolivani.?

³⁶Vano Yesu aahimukoha mwiixuttihi a ikano owo wira: ?W'atthu ale araru t'uvi ommon'anyu okhala mukhw'awe mutth'uwo aatupheliwe n'anawiiye.?

³⁷Nto owo aahimwaakhula wira: T'ule aamureerenle murima. Yesu amalihaka aahimwirela wira: Ni nyuwo muroweke mwiireke siiso.

³⁸Yesu n'awiixutti awe yaahirowa, khuphiya muttetthe mmosa, muthiyana mmosa nsina nawe Marta aahimwaakhela Yesu vate vawe.

³⁹Owo aahikhalana munn'awe nsina nawe Maria, yoowo aakilanthe vakhiviiru va Yesu ananwiriyana mixuttiho sawe.

⁴⁰Nto Marta aaneeteteya vanci-ene n'uvara miteko sa vate. Aahimwaattamela Yesu khumuhimeerya wira: ?Pwiya, khamunoona wira munn'aka onikihiyerya mekhaka keeteteyaka ni miteko iya? Mmuleele wira arwe okikhaliherye.?

⁴¹Nto Yesu aahimwaakhula wira: Marta, Marta, munneetta owuukhuwa ni munnivelavela n'itthu sinci-ene,

⁴²vano etthu emosa paahi teniphavelexiwa. Maria oothanla epantte yooreera ehinrowawe waakhiwa.