Luke 11

¹Okathi mmosa Yesu aari nipuro nimosa anavekela amalihakaru mwiixutti awe mmosa aahimuhimeerya wira: ?Pwiya, munixuttihe ovekela, ntoko Yohani Mpatisa siwixuttihaly'awe awiixutti awe.?

²Yesu aahahimeerya wira: Mwaavekelaka muhimyeke wira: Tiithi, nsina nanyu nreerihiwe Omwene anyu orwe.

³Munivahe eyoolya emphavel'ahu khula nihiku.

⁴Munlevelele soottheka s'ahu maana hiyo-tho ninnaalevelela othene ale annitthekela. Nave muhinihiye nimorelaka moottehiwani.

⁵Yesu ahaahimeerya-tho wira: Ti pani a nyuwo, akhalana mpatthani awe, arowa omphwanya ohiyu eriyari khumuhimeerya wira: ?Mukikophihe yoolya,

⁶okhala wira orwiye mpatthani aka ori ni mukwah'awe nto miyo nkirina etthu yoonvaha.?

⁷Nto muupuwele wira mukhw'awe owo ari-ene mpaani memmo onamwaakhula wira: ?Muhikuukhule! Mukhora woowaliwa, miyo n'an'aka nihimmaathi. Nkinwerya ovenya wira koovaheeni yoolya.?

⁸Yesu aahihimya wira: Tthiri miyo kinoohimeeryani wira: Naari owo ahivenyaka wira anvahe yoolya, mwaha wokhala mpatthani awe onimuthipelela, onoonvaha sothene simphavel'awe.

⁹Nto miyo kinoohimeeryani wira: Munvekeleke Muluku onimoovahani, mphaveleke munoophwanya, mmane mukhora munoohuleliwa.

¹⁰Tthiri othene ale anvekela, annivahiwa, ale amphavela anniphwanya; n'ale animana mukhora, annihuleliwa.

¹¹Tiithi xeeni mwa nyuwo oniwerya onvaha mwan'awe enowa owo anvekelaka ehopa.

¹²Wala onvaha eyaalaala owo anvekelaka nooce?

¹³Nto, munaamwi nyuwo muri ootakhala murima, munnisuwela waavaha an'inyu, khantepa-tho Atiith'inyu ari wirimu waavaha Erooho Yooreera ale anaavekela?

¹⁴Nihiku ni mosa Yesu aahoomola munepa wotakhala wahaalavula. Okathi waakhumaly'awe munepa wotakhala mutth'uwo ahaalavula aahipacerya olavula nto atthu yaahitikinihiwa.

¹⁵Vano akina yaahihimya wira: ?Oniira n'uwerya wa Satana, mukhulupale a minepa sootakhala tunoomolan'awe minepa iyo.?

¹⁶Atthu akina ephavelaka omwehererya, yaahinvekela mutikihino wokhuma wirimu.

¹⁷Nto Yesu asuwelaka suupuwel'aya, aahahimeerya wira: Omwene mmosa wakawanyeya yooworu, onoopweteya, nave empa omosa yakawanyeya yeeyoru, enoomora.

¹⁸Nave-tho Satana aakawanyeyaka, omwene awe ontthuna okhala sayi? Munihimya wira miyo kinoomola minepa sootakhala n'uwerya wa Satana.

¹⁹Miyo koomolaka n'uwerya wa Satana, anki an'inyu anoomola n'uwerya waani? Tthiri an'inyu yaawo t'anrowa woolamulani.

²⁰Nto wakhala wira kinoomola minepa sootakhala n'uwerya wa Muluku, musuweleke wira omwene wa Muluku woophiya eriyari anyu.

²¹Okathi mutthu a ikuru ni oowiilipiha onikhapelel'awe etthoko awe, muhakhu awe wothene onnikhala wokhapeleleya,

²²nto arwa mukina ootepexa wiilipiha onvikana owo khumuxintta, onnimwaakha itthu sawe s'ekhotto saaroromel'awe ni onnikawa itthu simwiiyenry'awe.

²³Ole ohinkhala ni miyo onnikivirikanya ni ole ohinthukumanya ni miyo onnimwarexa.

²⁴Yesu nlelo aanilavula iiraka: Okathi munepa wotakhala onimukhum'awe mutthu, onnirowa moothakoni ophavelaka nipuro noomumula. Aahiphwanyeke onnihimya wira: ?Kinootthikela owanny'aka weiwo kikhumaly'aka.?

²⁵Nto waaphiyakaru onniphwanya emp'eyo eveliwe-ene ni ereerihiwe-ene oratta-ene.

²⁶Vano onnirowela minepa sikina mithanu ni miili sootepaxa otakhala ovikana yoowo, nave sinnikela inakhala mpaani memmo. Nto siiso makhalelo a mutth'uwo annitepa onanara ovikana akhalayi.

²⁷Yesu n'umala olavula itthu iya, muthiyana mmosa aari mmuttitthini memmo aahimukhuwelela iiraka: ?Ooreeriwa muthiyana ooyanreni ni khuwaamwihani.?

²⁸Nto Yesu aahimwaakhula wira: Ootepexa oreeriwa t'ale aniiwa Masu a Muluku ni khuyeettela.

²⁹Muttitthi w'atthu waahithukumana, Yesu khupacerya ohimya wira: Atthu a vano tootakhala murima. Awo anikivekela nthoonyeryo, nto khanvahiwa nthoonyeryo nikina nihikhanle na profeta Yona paahi.

³⁰Tthiri siiso Yona saakhanly'awe nthoonyeryo n'atthu anikhala oNinive, siiso-tho Mwaana a Mutthu onookhala ethoonyeryo w'atthu a vano.

³¹Nihiku noolamuliwa piyamwene a elapo y'okuusini onoovenya aaphuke atthu a vano nave onimwaatthukela, okhala wira owo okhumme wokiseryani w'elapo arwaaka wiiwa miruku sa Salomoni.

³²Nave-tho atthu a oNinive anoovenya wira yaalamule atthu a vano, animwaatthukela, okhala wira awo aattharuwa soottheka saya, okathi vaiwaly'aya olaleya wa Yona. Vano vaava ookhala-vo muulupale oonvikana Yona.

³³Khaavo ompattiha muthuko khiyapweha nipuro n'ovitheya wala mukulukuthelani. Nto oniphweha nipuro noottukhuwa wira ale ankela-mo yooneke okokola.

³⁴Muthuko w'erutthu anyu ti maitho anyu, awo yakhalaru ooreera, erutthu anyu yothene enoomaleliwa, nto maitho anyu yakhalaru oonanara, nave-tho erutthu anyu enookhala mweepiphini.

³⁵Tivo mwiipasope, wira muthuko orin'anyu ohikhale epiphi.

³⁶Nto erutthu anyu yothene yaamwaleeliwaka ni muthuko ehinakhalana epiphi, sothene sinikhala soowooneya ntoko waarya wa muthuko onoomwaleelayani.

³⁷Yesu alavulaka, siisaale, nFarisi mmosa aahimulattula orowa ni yoowo olya owanny'awe. Yesu aahikela mpaani khukilaathi analya.

³⁸Nfarisi uwo aahitikinihiwa vanci-ene vaamoonaly'awe Yesu ahittharihenle mwiixuttiho w'onyawa ohinatthi olya.

³⁹Nto Apwiya yaahimuhimeerya wira: ?Nyuwo aFarisi, munirapiha ikoopho n'iparatho otaru, nto muhina mwanyu musareiyene-mo soowiyiva ni sootakhala.

⁴⁰Nyuwo mw'alolo! Nto khamunsuwela wira ole opanke epantte y'ota nave-tho oopaka ya muhina?

⁴¹Mpaceryeke wavaha alipa-ootthoiwa anlola iye sirin'anyu, siiso sothene wa nyuwo sinookhala sooreera.

⁴²Mootakhaliwa nyuwo aFarisi! Muninvaha Muluku ya namuloko ya soowiima sa mmatta mwanyu: Cincili ni mathaapa, nto munathanya exariya hata omphenta Muluku. Nyuwo mwaatthuna okhapelelaka sothene, muhihiyaka sikina.

⁴³Mootakhaliwa nyuwo aFarisi! Munsiveliwa okilaathi mapuro opacerya a mpaani moothukumana n'okhomasiwa eriyari y'atthu.

⁴⁴Mootakhaliwa nyuwo munlikana ni mahiye yaawo ahinooneya, vano atthu annivira vasulu vaya khuhisuwela.?

⁴⁵Nto mwiixuttihi mmosa a ikano aahimuhimeerya Yesu wira: ?Mwiixuttihi mwaalavulaka siiso nave-tho munniniveha hiyo-tho.?

⁴⁶Yesu aahaakhula wira: Mootakhaliwa nyuwo-tho awiixuttihi a ikano, munaareya akhw'inyu miritti soolemela nto nyuwo hata n'ekath'anyu khamunvara.

⁴⁷Mootakhaliwa nyuwo munaatekela okuttho maprofeta, yaawo axitiith'inyu awivaly'aya.

⁴⁸Siiso nyuwo munnooniherya oratta-ene wira munnaakhulela siiraly'aya axitiith'inyu, okhala wira awo aawiiva maprofeta nave nyuwo munnaatekela okuttho.

⁴⁹Tivo miruku sa Muluku soohimya wira: ?Kinimwaaveleeliha maprofeta ni arummwa, nto awo akina anoowiva akina-tho animwaalupattha.?

⁵⁰Tivo atthu ala a vano anookumiheriwa mulattu mwaha w'ephome ya maprofeta othene, emwarexiwe okhuma woopaceryani w'olumwenku.

⁵¹Opacerya ephome y'Apeli mpakha ephome ya Sakariya, yoowo iiviwe eriyari y'altaari ni empa ya Muluku. Ayo, kinoohimeeyani wira Muluku onimwaahukhumu atthu a vano.

⁵²Mootakhaliwa nyuwo awiixuttihi a Ikano nyuwo munkuxa mihulelo s'akhili nto nyuwo khamunkela-mo ni munniwoceliha ale y'aphavela okela-mo.

⁵³Yesu vaahimeeraly'awe moolumo ala, awiixuttihi a Ikano n'aFarisi yaahikelela onvaanya n'ikuru n'omuharahara emukohaka itthu sinci-ene soomulupattha,

⁵⁴emureyaka miraakho wira emphwanyane ekiiswa ya moolumo awe wira emuhimyane.