Luke 12

¹Okathi-ene yoowo yaahithukumana atthu anci-ene imiya miloko miloko sene mpakha khuyaphunyana mukina ni mukhw'awe. Yesu aahipacerya w'ahimeerya awiixutti awe wira: Mpaceryeke mwiipasoopa ni miropo s'aFarisi, ori woototha.

²Khiivo etthu ekhuneeliwe ehinrowa wuupululiwa, hata khiivo evithiwe ehinrowa osuwelihiwa.

³Tivo, sothene seiye sinihimy'anyu wiiphini, sinimwiiwanyeya vanlakani n'iye sinaapelan'anyu mpaani sinoolaleiwa vasulu vampani.

⁴Kinoohimeeryani nyuwo apatthani aka: Muhiwooveke ale aniiva erutthu numala, ehinawerya-tho wira etthu.

⁵Nto miyo kinimoohimeeryani orin'anyu omoova, mmooveke ole oniiva, numala wiiva onakhalana owerya worihela omooroni. Ayo miyo kinoohimeeryani wira mmooveke yoowo.

⁶Khasintumihiwa mipeleele mithanu n'itoosu piili? Nto siiso Muluku khonimuliyala nnakhala mmosa a axinuni awo.

⁷Hata ikharari sa mmuruni mwanyu sihaalikeliwa sothene. Nto, muhoove okhala wira nyuwo mwaalupale wavikana axinuni anci-ene.

⁸Kinnoohimeeryani-tho wira: Ole anikihimya ohoolo w'atthu nave-tho Mwaana a Mutthu onoomuhimya yoowo ohoolo w'ankelo a Muluku.

⁹Nto ole onikiruma ohoolo w'atthu, nave-tho owo onookhoottiwa ohoolo w'ankelo a Muluku.

¹⁰Othene ale aninveeha Mwaana a Mutthu anooleveleliwa nto ale anveeha Erooho Yooreera khanleveleliwa-tho.

¹¹Okathi munrowaniw'anyu mpaani moothukumana, wala ohoolo wa mamwene ni wa makhulupale, muhivelavele n'itthu sinrow'anyu ohimya wira mwisaakihe;

¹²okhala wira Erooho Yooreera onoowixuttihani okathi-ene yoowo itthu sirin'anyu ohimya.

¹³Mmuttitthini mw'atthu awo, mutthu mmosa aahimuhimeerya Yesu wira: ?Mwiixuttihi mmuleele munn'aka wira akikawele muhakhu ohiyeriw'ahu.?

¹⁴Nto Yesu aahimwaakhula wira: ?Mpatthani, t'ani okikhalinhe mphuki wala mulipa oowokawelani muhakhu anyu??

¹⁵Numala aahihimeerya muttitthi w'atthu wira: Mwiipasoope! Muhikhale atthu oowuunlela muhakhu, okhala wira ekumi ya mutthu khenlipana ni mwaattelo wa mihakhu s'awe.

¹⁶Vano-tho aahahimeerya nlikanyiho nla iiraka: Ematta ya thaaciri mmosa yaahiruwerya vanci-ene.

¹⁷Nto thaaciri owo aahikelela wuupuwela iiraka: ?Miyo kiire exeeni? Nkirina nipuro n'osuka soolya s'aka.?

¹⁸Vano koosuwela: Kinoopwanyula nipiro, na mihakhu saka, kiteke nikina nuulupale, kisukeke memmo etiriku ni s'olya s'aka sothene.

¹⁹Numala kinoohimeerya murim'aka wira: ?Murim'aka w'okhalana eyoolya yinci-ene esukiwe eniphiyerya iyaakha tthaaru. Omumuleke, olyeeke owuryeke ni opuheke.?

²⁰Nto Muluku aahimuhimeerya wira: Nyuwo mulolo ohiyu y'ola enookuxiwa erooho anyu. Vano iye sisukaly'anyu sinrowa okhala sawani?

²¹Vanimwiireya siiso w'ale aniithukumanyerya mihaku nto ehinakhala athaaciri vamaithoni va Muluku.

²²Yesu ahaahimeerya-tho awiixutti awe wira: Tivo kinooleelani wira muhuukhuwe ni makhalelo anyu mphavelaka yoolya nnakhala soowara simphavelel'anyu erutthu anyu.

²³Ekumi ti yuulupale ovikana yoolya nave erutthu ovikana soowara.

²⁴Nkaaweheeni anakhuku khanaala, nnakhala khanihepha, hata kharina matatha nnakhala ntatha, nto Muluku onnaavaha yoolya. Nto nyuwo ti mwaalupale waavikana axipalame.

²⁵T'ani a nyuwo ni wuukhuwa wawe vanci-ene onwerya wacererya vakhaani erakamelo awe?

²⁶Nto muhiweryaka wira itthu sootepaxa oyeva, munuukhuwela-ni n'itthu sikina?

²⁷Nkawehani ithutu, seiyo khasinvara muteko nnakhala khasintthava ikuwo. Nto mwene Salomoni, ninttittimiho nawe nothene khonaware ntoko emosa ya ithutu seiyo.

²⁸Nto Muluku yoowo onwariha siiso miri seiyo olelo siri mutakhwani meelo khupahiwa, onootepa wowarihani nyuwo, atthu oowaamini vakhaani.

²⁹Tivo, muhuukhuweke mukohaka wira kilye exeeni wala kiwurye exeeni.

³⁰Atthu oohaamini a moolumwenkuni t'aneetta ephavelaka itthu iya sothene. Vano nyuwo atiith'inyu annisuwela wira munniphaavela seiyo.

³¹Mpaceryeke ophavela Omwene wa Muluku nto sikina sothene munimwaacereriwa.

³²Yesu aahimuhimeerya-tho wira: Muhoove nyuwo nikoto namukhaani! Atiith'inyu wahaasivela wovahani Omwene aya.

³³Mutumihe sirin'anyu vano musurukhu-ene mwaavahe alipa'oothoiwa. Mwiipakele mirupa soohithaala ni mwiithukumanyerye wirimu muhakhu ohinhononeya, weiwo nawiiye ohimphiy'awe hata oweexe ohinly'aya.

³⁴Tthiri vaavo vari muhakhu anyu, vaavo-tho onookhala-vo murim'anyu.

³⁵Yesu ahaahimeerya-tho wira: Mukhale oolikana-ene ovara muteko mpattinhe-ene mithuko sanyu.

³⁶Mukhaleke ntoko arumeyi aninwehererya pwiy'aya onhokolowa oniirani n'othela, yaawo ani aphiyakaru ni amanakaru mukhora, enamuhulela naanaanoru.

³⁷Ooreeriwa t'ale aniira Pwiy'aya arwaaka onaaphwanya enwehereryaka kinoohimeeryani ekhweeli wira: Owo onimwiilikanyiherya ni onimwaaruma okilaathi elyeeke nave owo mwaneene tunrowa worumeelakani eyoolya.

³⁸Pwiya yoowo arwaaka ohiyu eriyari wala vasiisu-ene, khwaaphwanya siiso, aareeriwa arumeyi awo.

³⁹Musuweleke oratta-ene wira: Mwaneene etthoko aari wira aanisuwela okathi w'arw'awe nawiiye, khaamuhiyererya apwexaka emp'awe.

⁴⁰Nave-tho nyuwo mukhaleke oolikana-ene, okhala wira Mwaana a Mutthu onrwa okathi ohinuupuwel'anyu.

⁴¹Nto Petru aahimukoha Yesu wira: Pwiya nlikanyiho nla munnilavula hiyo paahi, wala munaahimya atthu othene?

⁴²Apwiya yaahimwaakhula yiiraka: Vano t'uvi murumeyi oororomeleya ni aakhili onrowa othanliwa ni pwiy'awe wira aweettiheke anamuteko awe akina aakaweleke yoolya okathi woophwanelela.

⁴³Ooreeriwa t'ule oniira pwiy'awe arw'aka, khumphwanya iiraka siiso.

⁴⁴Kinoohimeeryani ekhweeli wira owo onoovahiwa muteko woweettiherya muhakhu awe wothene.

⁴⁵Nto murumeyi uwo aihimeerya mmurimani mwawe wira: ?Pwiy'aka onnipisa orwa khupacerya waamana arumeyi akina alopwana n'athiyana apacerya olya n'uwurya nuuhapaliwa.

⁴⁶Pwiy'awe onoophiya nihiku nihininweherery'awe n'ukathi ohinsuwel'awe, onoomoomola muteko awe amutakaniherye n'arumeyi oohiroromeleya.

⁴⁷Murumeyi yoowo onsuwela sintthun'awe pwiy'awe, nto khuheteteela hata ohiniira etthu attharihelaka w'ile entthun'awe pwiy'awe onoohukhummwa amaniwaka vanci-ene.

⁴⁸Nto murumeyi ule ohisuwenle sintthun'awe pwiy'awe khwiira itthu sinreerela mirepettho onomaniwa vakhaani. Ole ovahereriwe sinci-ene, onoovekeliwa sinci-ene.?

⁴⁹Yesu ahaahimeerya-tho wira: Miyo kirwenle opattiha mooro moolumwenkuni-mu, nto kaatthuna wira ovire opattaka paahi.

⁵⁰Kihaana tthiri ovira moohaawani wuulupale. Nto murima wookiriipa vanci-ene mpakha ohaawa iwo omalelihiwa.

⁵¹Munuupuwela wira miyo kiruuhale murettele mulaponi! Nnaari: Miyo kiruuhale ohiiwanana.

⁵²Nto okhuma olelo okela ohoolo, ntthoko nimosa yakhala atthu athanu anookawanyeya, araru animwaavirikanya anli, anli animwaavirikanya araru.

⁵³Tiithi onrowa owanaka ni mwan'awe, mwaana ni tiithi awe, maama onrowa owanaka ni mwan'awe mwamuthiyana, mwaana mwaamuthiyana ni maam'awe, piya-mwaana onrowa owanaka ni maathi awe, maathi ni piya-mwaan'awe.

⁵⁴Yesu aahihimeerya-tho muttitthi w'atthu wira: Okathi munoon'anyu meeku ekhumaka onikela nsuwa, nyuwo naanaanoru munnihimya wira: ?Epula ehanle orupa.? Siiso vanniraneya.

⁵⁵Vano yoopaka epheyo y'okusini munnihimya wira: Onookhala oviha vanci-ene, siiso vanniiraneya.

⁵⁶Anawoothe! Mwaasuwelaka otaphulela makhalelo a elapo ni a wirimu, nto muhinsuwela sayi otaphulela makhalelo a okathi ula?

⁵⁷Vano nto muhinsuwelelani othanla mmansinyu etthu ya xariya?

⁵⁸Tthiri okathi nwanan'inyu onoorowanaaweni ohoolo wa makhulupale, mphaveleke omaliha mulatt'uwo mphironi wira muhiroihiwe ohoolo wa mphuki nave mphuki uwo oovahereryeni wa makhulupale a ekaliposo wira ootthukweleni mukaliposo.

⁵⁹Kinoohimeeryani wira: Khamunkhuma-mo muhilinve toko mpakha enoota yookiserya.