Luke 13

¹Okathi yoowo, atthu akina yaahirwa omuleela Yesu mwaha w'atthu a oKalileya, yaawo Pilato yaarummy'awe wiiviwa okathi wahelaya mukuttho.

²Yesu aahiwaakhula wira: Munuupuwela wira atthu awo yaari ootepexa ottheka wavikana aKalileya akina mwaha woowivakasiwa siiso.

³Tivo, kinoohimeeryani wira mwaahirununuxeru murima, othene munimookhwa.

⁴Wala munuupuwela-tho wira atthu ale muloko n'athanu n'araru yaamoreliwe exiri y'oSilowe ekhwaasa yaahitthekaxa wavikana atthu othene oYerusalemu?

⁵Nave, kinoohimeeryani tho wira mwaahirukunuxeru murima anyu othene munimookhwa.

⁶Yesu aahahimeerya nlikanyiho nla iiraka: Aahikhala mutthu mmosa aaphatteiye mwiri wa mpheera mmatta mw'awe. Aahirowa oweha waimale-ene khuhiphwanya muhokorokho nnakhala mmosa,

⁷vano aahimwirela mutthu aalima mmatta mw'awe wira: Soovira iyaakha tthaaru kirw'aka ophavela mihokorokho mumpheerani mu nto khuhiphwanya nnakhala mmosa. Tivo, mwiikitthe. Xeeni nlelo onvuvury'awe mahala ematt'ela?

⁸Nto namutek'owo aahimwaakhula Pwiy'awe wira: Pwiya muhiye mitano va, miyo kinoothipa mmukhitte mw'aya kiitthele ikokhola.

⁹Vano waima onookhala nto waahiime murumihe-ke wikitthiwa.

¹⁰Nihiku nimosa na esaapatu Yesu aixuttiha mpaani moothukumana.

¹¹Aahikhala memmo muthiyana aavirinhe iyaakha muloko n'ithanu na tthaaru awereiwaka, aavariwe munepa wotakhala eetta ekhupa-khupa ahiweryaka wiisookolola.

¹²Yesu vaamoonaly'awe aahimwiitthana khumuhimeerya wira: Muthiyana moovona eretta anyu.

¹³Aahimwiixatherya matata, naanaanoru muthiyana owo aahookololowa, khupacerya omuttottopela Muluku.

¹⁴Vano mukhulupale a mpaani moothukumana aahinanariwa, maana Yesu aanvonihale mutthu nihiku na esaapatu ni aahahimeerya atthu wira: Aakhala mahiku mathanu na mosa oovara muteko. Murweeke va mahiku yaawo wira nvonihiweke iretta sanyu, kahiyo nihiku na esaapatu.

¹⁵Yesu aahaakhula iiraka: Anawootothe! Khamuntaphula enyompe anyu wala puuru anyu munly'aya khiyarowa owuriha nihiku na esaapatu?

¹⁶Vano muthiyan'ola mwaana a Aparahaamu ovirinhe iyaakha muloko n'ithanu na tthaaru atthukiwe-ene ni Satana, khaakhanle ootaphuliwa ohaawa nno nihiku na esaapatu?

¹⁷Yesu awaakhulakaru siiso awanani awe yaahuuliwa muru. Nave atthu yaanitteeliwa murima mwaha wa mitikiniho. Sothene Yesu siir'awe.

¹⁸Yesu aahihimya wira: Omwene wa Muluku onlikana n'ixeeni? N'itthu xeeni entthun'aka olikanyiha?

¹⁹Onlikana n'inuku yamukhaani yeeyo mutthu onaal'awe mmatta mwawe. Mwiri aya onninnuwa mpakha okhala mwiri muulupale, nto axipalame anniteka ipuuru saya mmirittani mwaya.

²⁰Aahahimeerya-tho wira: ?Omwene wa Muluku kilikanyihe-tho n'ixeeni??

²¹Onlikana ni miropo muthiyana sinkux'awe khutakaaherya otthu miphimo miraru mpakha weela wothene.

²²Yesu arowaka oYerusalemu aanivira mmittettheni ni mmawaani owixuttihaka atthu.

²³Mutthu mmosa aahimukoha iiraka: ?Pwiya khino ale anrowa woopowa ari vakhaani? Nto Yesu aahimwaakhula wira:

²⁴Mwiikhanyereriheke okela mukhora woophunyeya, tthiri kinooleelani wira atthu anci-ene animweererya okela nto animooceela.

²⁵Okathi mwaneene etthoko ontthun'awe ovenya n'utthukwa mukhora, nyuwo munrowa ohala vate mmanaka mukhora muhimyaka wira: Pwiya Pwiya munihulele. Nto owo onoowakhulani wira: Nkinsuwela onkhum'anyu.?

²⁶Nto nyuwo munrowa ohimyaka wira: Hiyo nihoolya, noowurya ni nyuwo nave-tho nyuwo mwaanixuttiha mmawannyihu.

²⁷Nave owo onoowaakhulani wira: Kinoohimeeryani wira nkinsuwela onkhum'anyu. Mukhumase va othene anyu, muniira sootakhala!

²⁸Weiwo onookhala wunla n'okhuriha maino, mmoonaka Aparahaamu n'Isakhi ni Yakopo ni maprofeta othene moomweneni mwa Muluku: Nyuwo othene moomoleliwaka ota.

²⁹Nto aniimoorwa atthu evenyaka onikhuma nsuwa n'okusini n'unikela nsuwa, n'unikela epheyo anookilaathi, elyeeke moomweneni mwa Muluku.

³⁰Vano atthu ari ookiserya, anrowa okhala oopacerya, yaari oopacerya anrowa okhala ookiserya.

³¹Okathi yoowo aFarisi akina yaahimwaattamela Yesu khumuhimeerya wira: ?Nvenye mukhume elapo ela, maana Heroti omphavela owiivani.?

³²Nto Yesu aahiwaakhula wira: Miyo kinoomola minepa sootakhala ni kinaavoniha aretta olelo ni meelo murotto kinoomaliherya muteko aka.

³³Tthiri miyo wannikisivela wira wa mahiku yaala mararu kitthare ephiro aka, okhala wira khivanreerela profeta okhwa elapo ekina ohikhanle oYerusalemu.

³⁴Yerusalemu! Yerusalemu! Nyuwo munniwiiva maprofeta munaavonyakasa maluku atthu a Muluku oorumihenlyaaweni! Imara sinci-ene kaaphavela wathukumanya an'inyu, ntoko mwalyakhu onaapuramwela axaan'awe mmapuphani, nto nyuwo khuhitthuna.

³⁵Nto vano emp'anyu enrowa okhala milepe. Nave-tho kinoohimeeryani wira khamunikoona-tho mpakha ophiya okathi onrow'anyu ohimya wira: Attottopeliwe owo onrwa ni nsina n'Apwiya.