Luke 14

¹Nihiku na esaapatu Yesu aahirowa olya owanny'awe mukhulupale a aFarisi. Nto atthu yaari vaavale yaaninwehexexa.

²Aahikhala ohoolo wawe mutthu mmosa oowiipa erukulu.

³Nto Yesu aahaakoha awiixuttihi a Ikano n'afarisi wira: Wannitthuniheriwa onvoniha mutthu nihiku na esaapatu?

⁴Nave awo khiyaakhunle etthu. Vano Yesu aahimukwannya mutth'uwo, khunvoniha, khumuruma orowa.

⁵Numala aahahimeerya wira: Ti pani a nyuwo oniira mwan'awe wala enyompe awe emorenle-ene mulittini khuhiyarowa okumiha naanaanoru nihiku na esaapatu?

⁶Nto awo khiyaawenrye omwaakhula-tho mwaha w'etthu yeeyo.

⁷Yesu aahoona wira atthu yaalattuleliwe yooly'eyo yaathanla mapuro oottittimiheya, tivo aahahimeerya wira:

⁸Okathi munlattuleliw'anyu yoolya ya niira n'othela, muhikilathiki nipuro noottittimiheya, maana vanniira siiso akhanle-ene mukina oottittimiheya wovikanani nyuwo.

⁹Vano aarw'aka ole oolattunleni nyuwo ni mukhw'inyu onowirelani wira: ?Nipuro nlo munvahe ola.? Siiso munookhala oowuliwa muru mwavy'aka nipuro n'okiserya.

¹⁰Nto, mwalattuliwa, mukilaathiki nipuro nookiserya, siiso aarwaaka ole oolattunleni onoowirelani wira: ?Mpatthani mususerye nipuro nla n'ohoolo.? Okathi-ene yoowo munookhala oottittimiheya ohoolo w'atthu ari ni nyuwo va yoolyani.

¹¹Tthiri ole oniisinnuwiha onooyevihiwa n'ule oniiyeviha onimwinnuwihiwa.

¹²Numala aahimuhimeerya ole aamulattunle wira: Mwaatthapelelaka niira nanyu, muhaalattuleleke apatthani anyu, wala axinn'inyu, hata amus'inyu, mwiira siiso awo animoolattulelani eyooly'aya wira okhale tutthuveliwa wanyu.

¹³Nto mwakhalana niira n'anyu, mwaalattuleke alipa-oothoiwa ni oohaawa, n'atthu oorakala ni ootuthunya n'alipa oohoona.

¹⁴Siiso munookhala ooreeriwa, okhala wira awo kharina yowootthuvelani, Muluku tunrowa wotthuvelani nihiku ninhihimuw'aya atthu a xariya.

¹⁵Iiwakaru siiso mutthu mmosa w'ale yaakilanthe enalya aahimuhimeerya Yesu wira: ?Ooreeriwa t'ule onrowa olya mu mweneni mwa Muluku!?

¹⁶Yesu aahimwaakhula wira: Mutthu mmosa aaheteteela niira n'awe nuulupale nto khwaalattula atthu anci-ene.

¹⁷Okathi wa niira aahimuruma namuteko awe orowa waahimeerya atthu yaalattuliwe wira: Murweeke, yoolya yoolikana.

¹⁸Nto othene aya, yaanipacerya mmosa mmosa okhootta nintthyawelelo. Mukina aahihimya wira: Kithumme ematt'aka kihaana orowa oweha, mukilevelele, nkinwerya orowa.

¹⁹Mukina aahiira: ?Kithumme inyompe muloko, kinrowa opacerya ovariha muteko nkinwerya orowa.?

²⁰Mukina-tho aahikhootta ahimyaka wira: ?Kithenle naanaano, tivo nkinwerya orowa.?

²¹Namuteko owo aahihokolowela owaani khumuleela sothene Pwiy'awe. Nto owo aahinanariwa vanci-ene khumuruma amuhimeeryaka wira: ?Mwaakuveke murowe mmawaani mothene n'iphiro sothene sa mmuttettheni. Mwaaruhe alipa-oohaawa ni oothoiwa n'atthu oorakala ni ootuthunya n'alipa-oohoona.?

²²Viiraly'awe siiso namutek'owo aahimuhimeerya pwiy'awe wira: Pwiya kihiira saakirumaly'anyu nto nlelo woohala opuro.

²³Vano Pwiy'awe aahimuruma-tho wira: Murowe iphiro ni miphito sothene mwaakhanyererihe atthu okela-mu wira vasareiwe vate vaka.

²⁴Kinoohimeeryani wira khaavo w'ale yaapacenrye olattuliwa onrowa olawiha yooly'aka.

²⁵Okathi uwo muttitthi muulupale w'atthu w'animutthara Yesu, Owo aahirukunuwa khwaahimeerya wira:

²⁶Akhala mutthu onrwa okitthara miyo khuhiyaanyokha atiithi awe, n'amam'awe, naamwar'awe naan'awe hata ekumi awe khanwerya okhala mwiixutti aka.

²⁷Ole ohinikuxa mwiikimanyo awe onakitthara miyo, khanwerya okhala mwiixutti aka.

²⁸Tthiri t'ani a nyuwo aaphavelaka omuteka namukhatt'awe ahinapaceryaka okilaathi khuupuwela musurukhu orin'awe okumiha wira asuwele w'aphiyeryaka omalihana?

²⁹Wira ahiire siiso athipelaka malitti a namukatth'owo, ooceeleke ommaliha, vano atthu anrowa opaceryaka omutheya yiiraka:

³⁰?Mulopwana ola aahipacerya oteka emp'awe ooceela omaliha.?

³¹Wala mwene t'ani oniira aarowaka owana ekhotto ni mwene mukina, khuhipacerya okilaathi khiyuupuwela oratta-ene wakhala wira orowa n'atthu imiya muloko anophiyerya owanano anakhotto imiya miloko miili anrwa omutuphela yoowo?

³²Owo oona wira khoniwerya onimwaaruma anamitthak'awe orowa ovaanela murettele ni mwene owo akhalaka nlelo ottaiwene.

³³Siiso khula mutthu a nyuwo ohinihiya sothene sirin'awe khanwerya okhala mwiixutti aka.

³⁴Aahihimya-tho wira: Tthiri maakha, etthu yooreera. Nto awo-tho yahiya osiva w'aya ninwerya sayi ohokoloxerya osiva iwo?

³⁵Maakh'awo khanreera-tho nnakhala witthela va tthayani nnakhala opakano eturumo: Anooyeehiwa paahi. Ari ni maaru oowiiwa animwiiwa.