Luke 15

¹Alipa-ooliviha mposito othene n'anatampi yaahimwaattamela Yesu wira emwiiwe.

²Tivo aFarisi n'awiixuttihi a Ikano yaanimwaapa ehimyaka wira: ?Ola onniwaakhela atthu anatampi khiyalya ni yaawo.?

³Vano Yesu aahahimeerya nlikanyiho nla iiraka:

⁴?T'ani a nyuwo akhalana ipwittipwitthi emiya emosa, yamurimeela emosa, ahinahiya iye ikina miloko mithanu na mixexe ni thanu na xexe moothakoni arowaka ophavela ele emurimeenle mpakha ophwanya?

⁵Aphwanya vale onnikapatta epwittipwitth'iyo asareiye-ene otteeliwa murima.

⁶Aphiyakaru owaani onnaahimeerya apatthani awe naanamwattamanani awe wira mutteeliweke murima vamosa ni miyo, maana koophwanya epwittipwitthi aka yaakirimeenle.?

⁷Siiso-tho, miyo kinoohimeeryani wira wirimu onootthampwa-wo, mwaha wa natampi mmosa orukununxe murima wavikana atthu ale miloko mitthanu na mixexe naathanu na xexe a xariya ahimphanelela orukunuxa murima.

⁸Nkhi muthiyana xeeni oniira akhalanne-ene iliivura s'awe muloko s'eparatha, yamurimeela emosa, ahinapattiha muthuko, ahinavela mpaani, khuhiphavela oratta-ene mpakha ophwanya?

⁹Okathi omphwany'awe onnahimeerya apatthani awe n'anamwattamanani awe wira mutteeliweke murima ni miyo, maana koophwanya musurukhu aka w'akirimeenle.

¹⁰Siiso-tho, miyo kinoohimeeryani wira ankelo a Muluku annitthapa mwaha wa natampi mmosa onrukunuxa murima.

¹¹Yesu aahahimeerya tho wira Mulopwana mmosa aahikhalana an'awe anli.

¹²Ole mukhaani aahinvekela tiithi awe wira: Tiithi, mukivahe epantte ya muhakhu aka onrow'anyu okihiyerya. Vano tiithi awe aahikawanya muhakhu waan'awe.

¹³Vaaviraly'aya mahiku vakhaani, mwaan'owo mukhaani aahithukumanya muhakhu awe wothene khuvenya arowaka elapo yoottaiwene, weiwo aahihonona muhakhu awe wothene ni mweettelo woohiloka.

¹⁴Vaahononne awe muhakhu awe wothene, vano elapo eyo yaahivola etala yinci-ene, owo khupacerya othoiwa.

¹⁵Aahirowa onvekela muteko mutthu mmosa a elapo yeeyo nave owo aahinvaha muteko woolyiha ikuluwe mmathalani mwawe.

¹⁶Aaniphavela olya eyoolya sa ikuluwe, nto khaavo aanvaha.

¹⁷Vano ahuupuwela mmurimani mw'awe khwiira: ?Atiithi ahaana anamuteko anci-ene arina yoolya yinci-ene miyo va kinkhwa etala.

¹⁸Miyo kinoorowa kaaphwanye atiithi, kaahimeerye wia: Tiithi koomutthekela Muluku ni kihootthekelani nyuwo.

¹⁹Vano nkimphwanela-tho wiihaniwa mwan'nyu, nto mukikhalihe ntoko namuteko anyu.?

²⁰Naanaanoru aahivenya khuhokolowela w'atiithi awe. Nto atiithi awe yaahimoona arwaaka ottaiwene. Y'ahimmorela ikharari, yaahimutthimakela khumukhupaarela envahaka epeeco.

²¹Mwaan'owo aahahimeerya atiithi awe wira: Tiithi, miyo koomutthekela Muluku, kihootthekelani-tho nyuwo. Vano nkimphwanela-tho wiihaniwa mwaninyu.

²²Nto atiith'awe yaahaaruma anamuteko aya yiiraka: Mwakuveke murowele nlaya nootepaxa oreera munwarihe ola. Munwarihe anela mukathani munwarihe isantaalya.

²³Mmuruuhe mwanyompe ooneneva mmuhite. Nilyeeke nitthapeke.

²⁴Okhala wira mwan'aka ola aahikhwa nto vano ookhala-tho mukumi, aahirimeela vano oophwanyaneya. Vano atthu yaahipacerya niira n'otthapa.

²⁵Okathi-ene yoowo mwaana ole oopaceriwa iira aryeene omatta, ahokolowelaka owaani, aattamelaka vate aahiiwa wiipiwa ni wiiniwa.

²⁶Aahimwiihana murumeyi mmosa khumukoha wira: ?Exeen'iyo??

²⁷Murumeyi uwo aahimwaakhula wira: Muhim'anyu tuhokolonwe. Atiith'inyu aamwiivela mwaanyompe ooneneva, okhala wira aamwaakhela-tho ari mukumi ni owoopowa

²⁸Vaaiwaly'awe siiso aahinanariwa vanci-ene ahinatthuna okela mpaani. Tiithi awe aahirowa omweepesa.

²⁹Nave owo aahiwaakhula atiith'awe wira: ?Soovira iyaakha sinci-ene miyo koorumeelakani kihivaanyaka moolumo nanyu nnakhala nimosa, nto nyuwo khamunakivahe epuri wira kikhoomalihe niira n'axipatthani aka.

³⁰Nto ophiyakaru mwaniny'ule ohononne muhakhu anyu naathiyana, moomwivela mwaanyompe ooneneva.?

³¹Atiithi awe yaahimwaakhula wira: Mwan'aka, nyuwo munkhala ni miyo mahiku othene muhakhu aka wothene ti wawinyu;

³²nto vannireerela opuha n'utthapa, okhala wira muhim'anyu aahikhwa, vano ookhala-tho mukumi, aari oorimeela, vano oophwanyaneya.