Luke 16

¹Yesu aahahimeerya awiixutti awe wira: Aahikhala mutthu thaaciri aarina namuteko eettiha muhakhu awe. Aahirowa oleeliwa wira namutek'owo aanihonona muhakhu.

²Owo aahimwiihana khumuhimeerya wira: ?Exeen'ila eniiw'aka ehimmwaka yawinyu? Mukiruuhele ipaphelo sa musurukhu wettih'anyu okhala wira khamunwerya-tho wettiha.?

³Murumeyi uwo aahihimya mmurimani mwawe wira: ?Vano kiire exeeni, mwaneene akikumiha muteko? Olima, nkinwerya; nave nkinwerya olola etthu mmawaani okuuliha muru.

⁴Nto koosuwela entthun'aka wira, koomoliwa muteko wira atthu akaakhele.

⁵Nto aahiwiihana atthu yaamukophenle pwiy'awe khumukoha mmosa, mmosa iiraka: Mmukophenle kavi pwiy'aka?

⁶Nave owo aahaakhula wira: Kikhomphe miphimo miloko muloko sa makhura. Murumeyi uwo aahimuhimeerya wira: ?Mukuxe epaphelo anyu ela mwaakuveke, mukilaathi mulepe-vo miphimo miloko mithanu paahi.?

⁷Numala aahimukoha mukina-tho wira: Khi nyuwo mukomphe kavi? Owo aahaakhula wira: ?Kikomphe isaakho emiya emosa sa etriku.? Murumeyi uwo aahimuhimeerya wira: ?Mukuxe epaphelo anyu nave mulepe-vo isaakho miloko mithanu na miraru.?

⁸Pwiya owo aahimuttottopela murumeyi uwo oohiroromeleya maana aahiira etthu ya miruku. Okhala wira ale aneeteteya n'itthu sa moolumwenkuni annivahana ankhili mukina ni mukhw'awe, wavikana atthu oowaamini.

⁹Yesu aahahimeerya-tho wira: ?Nave-tho kinnootumereryani wira:? Muhakhu woohiloka mwiiphavelelaneke apatthani wira owo woomalelani, apatthaninyu awo ewaakhelekeni mpaani mwa Muluku.

¹⁰Ole onroromeleya n'itthu sikhaanixa nave, toororomeleya n'itthu suulupale. Ole ohinroromeleya n'itthu sikhaani khonroromeleya n'itthu suulupale.

¹¹Mwaahiroromeleye ni muhakhu omphwany'anyu mootakhalani, nto ti pani orowa woororomelani ni muhakhu wa ekeekhayi?

¹²Nto mwaahikhale oororomeleya ni muhakhu waaneene, t'ani ontthuna wovahani wawinyu?

¹³Khaavo namuteko onwerya warumeela mapwiya manli, maana onoomunyokha mmosa, amphenteke mukina paahi, wala onoomurumeela mmosa, amuthanyeke mukina. Khamunwerya omurumeela Muluku vamosa ni musurukhu.

¹⁴Afarisi yaawo yaari a milili, yaaniiwa moolumo ala othene. Nto khunamutheya.

¹⁵Vano Yesu aahahimeerya wira: Nyuwo mumphavela wiisooniherya okhala anaxariya vamaithoni v'atthu, nave Muluku onnisuwela mirima sanyu. Tthiri itthu sinttittimihiwa n'atthu ti soothanyeya vamaithoni va Muluku.

¹⁶Ikano sa Monse ni sa maprofeta saahikhala mpakha okathi wa Yohani. Okhuma vaavo ennilaleiwa Ehapari Yooreera y'Omwene wa Muluku, nave othene anniilipiha wira akele-mo.

¹⁷Nto ti yookhweyaxa omala erimu n'ilapo ya vathi ohikhanle orimeela nlepa nimosa namukhaani na ikano.

¹⁸Ole onimwalana ni mwar'awe ni onamuthela muthiyana mukina, owo onooraruwa, nave ole onimuthela muthiyana oomwalaniwa ni iy'awe nave-tho owo onooraruwa.

¹⁹Aahikhala mutthu mmosa thaaciri aawara ikuwo s'oreeraxa soowaatta musurukhu, nave mahiku othene aaniilikanyiherya soolya sinci-ene ni soosivexa.

²⁰Nave-tho aahikhala masikhini mmosa iihaniwa Lasaru aasareiye makhwatta owo aanimmaathi va mukhora va thaaciri uwo,

²¹wira awehe aatthunaka olya itathela saamora va meesa v'awe. Vano-tho alapw'awe thaaciri uwo yaanirowa olata makhwatt'awe.

²²Nto masikhini uwo aahikhwa, khukuxiwa n'ankelo arowaniwaka okhala vamosa n'Aparahaamu. Nave-tho aahikhwa thaaciri khuvithiwa.

²³Nipuro n'alipa ookhwa naary'awe thaaciri uwo, aanoopopimwa vanci-ene. Vano ahivenxa muru khumoona ottai-wene Aparahaamu vamosa ni Lasaru.

²⁴Nto aahimukhuwelela Aparahaamu iiraka: ?Tiithi Aparahaamu! Mukoonele othunku, mmurume Lasar'uwo anaanihe ekath'awe mmaasini, arwe ariirihe nlumi naka, okhala wira kinnihaawa vanci-ene mmooroni-mu!?

²⁵Nto Aparahaamu aahimwaakhula wira: Mwan'aka, muupuwele saana wira mwaahakhela itthu sooreera vathi vaary'anyu mukumi, Lasaru aakhenle ohaawa paahi. Vano owo onoohakalalihiwa, nyuwo muhaawaka.

²⁶Ohiya vo, eriyari ya hiyo ni nyuwo nookhala nlitti n'owiixa n'ulupale, akhala ontthuna ovenya va alapuwelaka iwo ory'anyu khanwerya, hata ovenya iwo arw'aka nno khanwerya.

²⁷Vano thaaciri uwo aahiira: ?Kihoovarani metto, tiithi Aparahaamu, mmurume Lasaru orowa owannyaya atiithi aka.

²⁸Kookhalana weiwo axinn'aka athanu, arowe aalopole wira awo mano ehirwe nipuro nla noohaawa.?

²⁹Aparahaamu aahimwaakhula wira: ?Awo aakhalana Monse ni maprofeta ewiweleleke yaawo.

³⁰Nto thaaciri uwo aahiira: Nnaari tiithi Aparahaamu. Akhala mutthu ookhwa onrowa wahimeerya anoorukunuxa murima.

³¹Nave Aparahaamu aahimwaakhula wira: Yaahimwiiweleleke Monse ni maprofeta khanrowa omwiiwelela hata mutthu onhihimuwa mwaalipa-ookhwa.?