Luke 17

¹Yesu aahahimeerya awiixutti awe wira: Khivanweryaneya ohikhala itthu sinitthekiha nto ootakhaliwa mutth'ule onaatthekiha akhw'awe!

²Oreera waya mutth'uwo atthukweleliwe nxilo n'ulupale muxikoni ariheliwe mphareya eriyari ohikhanle omutthekiha mmosa a atthu ala acikhaani.

³Mwiipasoope! Akhala munn'inyu onootthekelani mmuttaruxe, owo attharuwa, mmulevelele.

⁴Owo ooveehani imaara thanu na piili nihiku nimosa, vano owo khurwa-tho imaara thanu na piili. Siiso khuhimeeryani wira: ?Koottharuwa, muhaana omulevelela.?

⁵Vano arummwa yahaavekela Apwiya wira: ?Munaacererye waamini wahu.?

⁶Nave Apwiya yahiwaakhula wira: Mwaarina waamini ntoko enuku y'amukhaani mwaamwiirela mwir'ula mwiiphele-vo, orowe waiphatteye mphareya, mwiri owo waanwiwelelani.

⁷T'ani a nyuwo oniira akhalanne murumeyi awe alimaka mmatta, wala akhapelelaka inama, ahokolowaka omatta khurowa omuhimeerya wira: Murwe va mwakuveke mukilaathi nilyeeke?

⁸Nnaari, ompacerya omwiirela wira: Mpacerye weetetela yooly'aka, nware nlaya nooreera mukirumeele kily'aka, kiwuryaka. Numala nyuwo munaamoolya ni munaanwurya.

⁹Munuupuwela wira owo ohaana omuxukhuru murumeyi mwaha wo wira sothene s'amurumme awe? Nnaari.

¹⁰Siiso-tho nyuwo mwavara miteko sothene sirummw'anyu ni Muluku, mwireke: Hiyo naarumeyi oohimuteko, okhala wira nivanre miteko saarin'ahu ovara.

¹¹Vano Yesu arowaka oYerusalemu, aahivira elapo y'oKalileya ni oSamariya.

¹²Avolowakaru muttetthe mmosa, aahitthimakeliwa n'aretta muloko y'awereiwa makuttula awo yeemenle ehinatthi omwaattamela Yesu

¹³enakhuwela yiiraka: ?Yesu, Mwiixuttihi, munimorele ikharari!?

¹⁴Yesu awoon'aka yaawo aahiwiirela wira: ?Murowe mwaisooniherye w'alipa a mukuttho wira awo y'oweheeni.? Awo khurowa nto erowasaka siiso, yaahivona.

¹⁵Mmosa a yaawo, vaaisoonaly'awe wira oovonihiwa aahihokolowa akhuwelaka amuttottopelaka Muluku.

¹⁶Aahikokhora vakhiviru va Yesu, uuramaka mpakha vathi amuxukhurelaka. Nave owo aari muSamariya.

¹⁷Nto Yesu aahimukoha iiraka: Khamwaakhanle atthu muloko avonihiwe? Akina athanu na xexe ari vayi?

¹⁸Khaavo ohokolonwe amuxukhuru Muluku, ahikhanle namurwi ula?

¹⁹Numala aahimuhimeerya wira: Nvenye murooke. Waamini wanyu wo woopolani.

²⁰Afarisi akina yahimukoha Yesu okathi onrw'aya omwene wa Muluku. Yesu aahiwaakhula wira: Omwene wa Muluku khunrwa ntoko etthu enooneya.

²¹Khaavo onrowa ohimya wira: ?Ola va?, wala ?ole vale.? Vekeekhayi, Omwene wa Muluku ori variyari vanyu.

²²Numala aahahimeerya awiixutti awe wira: Onoophiya okathi oniir'anyu mphavele woona nnakhala nihiku nimosa mano na Mwaana a Mutthu mooceele woona.

²³Akina onimooleelani wira: ?Ola va? wala ?ole vale.? Nto muhaatthare anawoothe awo.

²⁴Okhala wira Mwaana a Mutthu onrwa ntoko overunya weiwo onimwaleela erimu yothene okhuma mpantte mukina mpakha mukina.

²⁵Nto opacerya wene owo ohaana ohaawa vanci-ene n'ukhoottiwa ni nloko n'atthu ala.

²⁶Ntoko siiraneiyaya okathi wa Noowe, sinimwiiraneya-tho siiso mahiku onrw'awe Mwaana a Mutthu.

²⁷Yaanilya, yaaniwurya, yaanithela, yaanitheliha mpakha nihiku Noowe n'akenly'awe mmwattiyani. Numala yaahirwa epula esamiha elapo, khwapwetexa atthu othene.

²⁸Vanimwiiraneya-tho siiso ntoko viiraneiy'aya okathi wa Lotthi: Yaanilya, yaaniwurya, yaanithuma, yaanitumiha, yaanaala ni yaaniteka.

²⁹Vano nihiku Lotthi n'akhummy'awe oSotoma, Muluku aahimorihela malumi ni maluku a mooro, khwapwetexa atthu othene.

³⁰Vanimwiiraneya siiso nihiku Mwaana a Mutthu nintthun'awe wiisooniherya.

³¹Nihiku nenlo ale ari vampani ahikhuruwe akelaka mpaani wira yakuxe-mo itthu sirin'aya, siiso-tho ale ari omatta ahihokolowele ottuli.

³²Mmuupuwele-ke mwar'awe Lotthi!

³³Ole ontthuna woopola ekumi awe, enoompweteya, vano ole ontthuna opweteiwa ekumi awe onimoopola.

³⁴Kinoohimeeryani wira ohiyu yoowo yakhala atthu anli erupasaka voolilini, mmosa onookuxiwa mukina onoohiya.

³⁵Yakhala athiyana anli nipuro nimosa exilaka: Mmosa onookuxiwa mukina onoohiya.

³⁶Yakhala alopwana anli mmatta mmosa onookuxiwa mukina onoohiya.

³⁷Nto awiixutti awe yaahimukoha wira: Pwiya sinrowa wiiraneya vayi itthu iya? Owo aahiwaakhula wira: Nipuro nri murutthu anakhuku anthukumana vaavo.