Luke 18

¹Yesu aahahimeerya nlikanyiho nla wira awooniherye wira yaahaana ovekelaka okathi wothene, ehooceyaka,

²ahimyaka wira: ?Muttetthe mmosa aahikhala mphuki mmosa aahaamoova Muluku nave khamuttittimiha mutthu.?

³Muttetthe yowo-tho aahikhala n'amukhweli mmosa muthiyana, owo imaara sinci-ene aanirowa wa mphuki anvekelaka wira: ?Mukiphukele mulattu aka ni mutthu onwanan'aka.?

⁴Owo aahimukhoottela mahiku manci-ene, nto nihiku nimosa aahuupuwela khwiira: Nnaari miyo nkinimoova Muluku hata nkinaattittimiha atthu,

⁵nto kinrowa omwiirela exariya naamukhweli ula, wira ahitthikele-tho orwa okuukhula.

⁶Nto Apwiya yaahihimya-tho wira: ?Nwiriyane etthu enihimy'awe mphuki ootakhala murima.

⁷Ankhi Muluku khaniwiirela exariya ale aathanlaly'awe yaawo animwitthana yoowo othana n'uhiyu? Munuupuwela wira onoopisa oowaakhula?

⁸Tthiri miyo kinoohimeeryani wira Muluku onoowiirela exariya naanaanoru. Nto okathi Mwaana a Mutthu onihokolowel'awe vathi va nlelo onimwaaphwanya atthu oowaamini??

⁹Yesu aahihimya-tho nlikanyiho nla aahimyaka atthu akina yaathanya akhw'aya yiisoonaka okhala anaxariya:

¹⁰Alopwana anli yaahirowa ovekela mpaani mwa Muluku. Mmosa aari nFarisi nave mukina aari namaliviha mposito.

¹¹Nfarisi eemenle-ene aanivekela ni murim'awe iiraka: ?Muluku kinnooxukhuruni mwaha woohilikanaka n'atthu akina, akhanle anawiiye, atthu ahinaxariya ni anamararuwa nnakhala nkinlikana nnamaliviha mposit'ola ori va,

¹²kinnitthukwa mahiku manli khula esumana, ni kinnivaha ya namuloko wa itthu sothene sirin'aka.?

¹³Vano namaliviha mposito eemenle-ene ottai-wene khaatthuna hata ottukhula maitho awehaka osulu; Aamana etthirim'awe paahi ahimyaka wira: ?Muluku aka mukimorele ikharari miyo ka natampi.?

¹⁴Nto Yesu amalihaka aahihimya wira: Miyo kinooleelani wira namaliviha mposito aahirowa owaani aleveleliwe-ene. Nto Nfarisi uwo khaaleveleliwe, tthiri othene ale aniisinnuwiha anooyevihiwa nave othene ale aniiyeviha animunnuwihiwa.

¹⁵Atthu akina yaanimuroihela Yesu anamwane wira owo aakwannye, nto awiixutti yoonaly'aya siiso yaanaakhoottiherya atthu awo.

¹⁶Vano Yesu aahiwiihana anamwane awo ahimyaka wira: Mwaahiye anamwane ekirweeleke miyo. Muhaakhoottiherye, maana omwene wa Muluku ti wawaya ale ari ntoko anamwane ala.

¹⁷Kinooleelani ekhweeli wira mutthu ohinaakhela omwene wa Muluku ntoko mwanamwane, khankela-mo.

¹⁸Mukhulupale mmosa a aYuta aahimukoha Yesu, wira: ?Mwiixuttihi ooreera murima, kiireke-ni wira kiphwanye ekumi ehinimala.?

¹⁹Yesu aahimwaakhula wira: Munikiirelelani ooreera murima? Muluku paahi tukhanle ooreera murima ni khaavo-tho mukina.

²⁰Vekeekhayi munnisuwela Sooruma sa Muluku wira: ?Muhiraruwe, muhimwiive mutthu, muhiiye, muhimootherye mukhw'inyu nave mwattittimihe atiith'inyu n'ame anyu.?

²¹Owo aahaakhula wira: ?Okhuma enamwane aka kinneettela Sooruma iya sothene.?

²²Yesu amwiiwakaru siiso aahimuhimeerya wira: Yoohala etthu emosa enoohaleelani nlelo: Murowe mwatumihe sothene sirin'anyu, musurukhu-ene mwakawele alipa-oothoiwa. Siiso munookhalana muhakhu wirimu. Numala murwe mukitthareke.

²³Nto owo aahiriipiwa murima vanci-ene mwaha wa moolumo awo, okhala wira khaareereno mihakhu.

²⁴Okathi Yesu vaamoonaly'awe ariipiwe-ene murima siiso, aahiira orikarika athaaciri okela moomweneni mwa Muluku;

²⁵tivookhweya ovira ekamelo va phakani va nttottho ovikana thaaciri okela moomweneni mwa Muluku.

²⁶Ale yaiwale masu awo naanaanoru yaahiira: Nto siiso t'ani onwerya woopowa?

²⁷Vano Yesu aahiwaakhula wira: Etthu enaarikela atthu, Muluku khinimurikela.

²⁸Vano Petru aahimuhimeerya Yesu wira: ?Hiyo nri, va noohiya saarin'ahu nnoottharani nyuwo.?

²⁹Yesu aahahimeerya wira: Tthiri miyo kinoleelani ekhweeli wira akhala onihiya emp'awe wala onaahiya amwaar'awe, n'axinn'awe, n'atiithi awe, n'ame awe, wala an'awe, mwaha w'omwene wa Muluku,

³⁰owo onoovahiwa soowattexa vathi va ni woomaleloni onimwaakhela ekumi ehinimala.

³¹Yesu aahakuxa awiixutti awe muloko nanli khwaahimeerya wira: Mwiiwe saana! Vano ninrowa oYerusalemu, weiwo sinoomalelihiwa sothene silempwe ni maprofeta mwaha wa Mwaana a Mutthu.

³²Onoovahereriwa mmatatani mw'atthu oohaamini, yaawo anrowa omutheya, amuruwana n'umusenela,

³³n'ummana numala anomwiiva. Nto mmurottoni mwaya ahihimuweke mookhwaani.

³⁴Awiixutti awe khiyaasuwenle moolumo awo yaahimy'awe, nave moolumo awo yaahiwiipitha, khuhiyasuwela etthu yaahimy'awe Yesu.

³⁵Yesu aattamelaka muttetthe w'oYeriko aahimphwanya mulopwana mmosa oohoona akilanthe-ene mphironi avekelaka etthu yoolola.

³⁶Iiwakaru muttitthi w'atthu yaavira, mulipa-oohoona owo aahikoha wira exeen'iyo?

³⁷Vaaleeliw'awe wira ti Yesu muNasareti aavira.

³⁸Nto owo aahikhuwela iiraka: ?Yesu, Mwaana a Taviti mukimorele ikharari!?

³⁹Atthu yaahoonle yaanimwiirela wira omaale, nto owo aanithipelela okhuwela iiraka: ?Mwaana a Taviti mukimorele ikharari!?

⁴⁰Yesu aaheemela khuruma wira aruuheliwe mulopwana owo. Aphiyakaru aahimukoha wira:

⁴¹?Mumphavela wira kiwiireleni exeeni?? Nave owo aahaakhula wira: ?Pwiya miyo kimphavela wira kitthikele woona.?

⁴²Yesu aahimwirela wira: ?Mooneke! Waamini w'anyu wo woopolani.?

⁴³Naanaanoru aahoona, khumuttharaka Yesu, amuttittimihaka Muluku. Vano atthu othene voonaly'aya etthu ila, yaanimuttottopela Muluku.