Mark 1

¹Opacerya w'Ehapari Yooreera ya Yesu Kristu, Mwaana a Muluku.

²Ntoko silempwaly'aya muliivuruni mwa Profeta Yesaya wira: Kinoomuruma namuhupi aka ohoolo wanyu, wira oolokiheryeni ephiro anyu.

³Ookhala onikhuwela woothakoni iiraka: ?Mulokiherye ephiro y'Apwiya ni mookolole mittaala s'aya.?

⁴Siiso aahikhumelela mulopwana iihaniwa Yohani Mpatisa alaleyaka epatisimu y'orukunuxa murima, wira sileveleliwe itampi.

⁵Atthu othene a elapo y'oYuteya ni a oYerusalemu yaanirowa omwiiwa Yohani Mpatisa. Yaanihimya sottheka s'aya nave owo aanaapatisa mmuro Yortani.

⁶Yohani aawara ikuwo sa manri a ekamelo ni musako w'esapala; yoolya awe yaari isoope ni oravo wa mutakhwani.

⁷Owo aanaalaleerya atthu wira: Ottuli waka onimoorwa mukina oowerya ookivikana miyo, ni hata mano vakhaani nkimpwanela omuuramela ohoolo wawe wira kitaphule mikhoyi sa isantaalya s'awe.

⁸Miyo kinnopatisani ni maasi, nto owo onimoopatisani ni Erooho Yooreera.

⁹Nave-tho mahiku awo aahirwa Yesu akhumaka elapo emosa yiihaniwa Nasareti mmuttettheni mwa oKalileya, nto khurowa opatisiwa ni Yohani mmuro Yortani.

¹⁰Okathi waakhum'awe mmaasini, aahoona erimu ehulen'ye-ene nave Erooho emukhuruwelaka ntoko epompa,

¹¹Naahiiwanyeya nsu naakhuma wirimu naahimya wira: ?Nyuwo mwa mwan'aka onimphent'aka.?

¹²Naanaanoru Erooho yaahimukuxa, khumurowana woothakoni.

¹³Aahikhala woothakoni weiwo mahiku miloko mixexe n'inama soowali sa mutakhwani, eehereriwaka ni Satana. Nave ankelo a Muluku yaanimurumeela.

¹⁴Numala otthukeliwa Yohani Mpatisa, Yesu aahihokolowela oKalileya analaleya Ehapari Yooreera ya Muluku

¹⁵iiraka: Okathi woophiya! Ni omwene wa Muluku woophiya. Nto murukunuxe mirima s'anyu ni mwaamini Ehapari Yooreera.

¹⁶Aviraka muxerexere mwa nratta n'oKalileya, aahiwoona atothi anli a ihopa yaarihela ntthavi n'aya mmaasini. Aari Simoni Petru ni Antere munn'awe Simoni

¹⁷nto khuwiirela: Murwe-va mukitthare nto kinimookhalihani atothi a atthu.

¹⁸Naanaanoru awo yaahihiya matthavi aya khumutthara

¹⁹Avikanakaru vakhaani, aahimoona Yakopo ni Yohani, muhim'awe Yakopo, yaari aana a Sepeteyo, enari mukalawani elokihasaka matthavi

²⁰Yesu aahiwiihana awo naanaanoru yaahaahiya atiithi aya vamosa n'anamuteko aya mukalawani n'awo-tho khumutthara.

²¹Yesu n'awiixutti awe numala yaahirowa oKafaranawu. Esaapatu Yesu aahikela mpaani moothukumana nto khupacerya owiixuttiha atthu.

²²Ale yaamwiiwa yaanitikinihiwa ni inamuna saawiixuttih'awe, maana aawiixuttiha ntoko mulipa onlamulela nto khunavirikana ni awiixutti a Ikano.

²³Vano, aahirwa mpaani moothukumana mulopwana mmosa aavariwe ni munepa wootakhala, yoowo akhuwelaka

²⁴aahiira: ?Exeeni erin'anyu ni hiyo, nyuwo Yesu muNasareti? Murweenle onipwetexa? Miyo koosuwela oratta-ene wira nyuwo mwa mutthu ooreera murima murummwe ni Muluku.?

²⁵Yesu aahipwapwela munepa ole iiraka: Omaale we, okhume mwa mutth'uwo.

²⁶Munepa wootakhala waahimuxekexa n'ikuru mulopwan'ole, aahikhuwela vanci-ene munep'ole khumuhiya.

²⁷Atthu othene yaahitikinihiwa khunakohana mutthu ni mukhw'awe yiiraka: ?Exeniila?? Akina yahimya wira: ?Ola mwiixuttiho wa naanaano, nave oniiriwa n'uwerya! Tthiri owo onniruma minepa sootakhala, nave iyo khiyamwiiwelela!?

²⁸Nave ovuwa wa Yesu waahimwareela naanaano-ru muKalileya mothene.

²⁹Vano awo vaakhumaly'aya mpaani moothukumana yaahirowa ni Yakopo vamosa ni Yohani owanny'awe Simoni n'Antere.

³⁰Okhala wira amaathi awe Petru yaari mummaathi maana yaan'wereiwa erutthu, naanaano-ru aahileeliwa Yesu.

³¹Owo aahiwaattamela khwaavarela ntata nto akhaliherya ovenya. Ettekuxa yaahaamalela khukelela waarumeela atthu.

³²Nikelaka-ru nsuwa anammwaani anci-ene a muttetth'ole yaahithukumana ohoolo wa mukhora w'empa mwaary'awe Yesu.

³³Yaanimuruuhela aretta, namukhuluwiru n'ale-tho yaavariwe minepa sootakhala.

³⁴Yesu aahaapenuxa othene awo ni akina yaarina iretta iretta sene nave aahoomola minepa sootakhala. Hata khaatthuniherya minepa iyo olavula maana iyo saanimusuwela wira ti Moopoli.

³⁵Vakelaka nuuxa nsuwa nihinatthi okhuma, Yesu aahikhuma arowaka woothakoni, weiwo aahanly'awe avekelaka.

³⁶Simoni Petru aahirowa n'akw'awe omwaavya

³⁷Nave okathi yaamphwannyaaya yaahimuhimeerya wira: ?Atthu othene animoophavelani!?

³⁸Nto Yesu khwaahimeerya wira: ?Nrowe mittetthe mikina sorukurerya wira weiwo-tho kalaleye Ehapari Yooreera voowi piitthu kirweenly'aka yeeyo.?

³⁹Yesu aaneetta oKalileya wothene, alaleyaka mpaani moothukumana nave oomolaka minepa sootakhala.

⁴⁰Numala mulopwana mmosa aarina eretta ya makuttula aahimwaattamela Yesu, nto akokhonre-ene aahinvekela iiraka: ?Mwatthuna vale munoowerya okivoniha.?

⁴¹Yesu aahimoonela othunku vanci-ene, aahimookolela ntata khumwiixatherya nto khumwiirela: ?Kinnitthuna ayo! Nvone.

⁴²Nto okathi-ene yoole mulopwan'ole aahivona.

⁴³Vano Yesu aahimpwapwela ni moolumo ooviruwa, khumwiirela muroweke.

⁴⁴Nto khumuhimeerya wira: ?Nwiriyane! Muhimuhimeerye mutthu etthu ene yeela. Vopacerya murowe wa namukuttho, wira owo ooweheeni, nto mwaha w'ovonihiwa w'anyu nvahe yooveleel'anyu ntoko saarumaly'awe Monse wira osuweliwe ovona w'anyu.?

⁴⁵Vano nto mulopwan'owo, akhumakaru vale aahipacerya olaleya n'uvuwiha ehaal'ile. Nto ehaal'ile yaahivuwa wa enamuna Yesu vahaawery'awe-tho tho okela mmittettheni ooniwaka. Aakhala woothakoni, nto iwo yaanirowa-wo atthu ipantte sothene omphavela.