Matthew 28

¹Vaaviraly'aya esaapatu, oxaaka wa nihiku noopacerya na esumana, Maria Matalena ni Maria mukina yaahirowa oxekurya nikhuku naavithiwe Yesu.

²Naanaano-ru, yaahikhumelela etetere yuulupale, maana munkelo a Apwiya aahikhuruwa wirimu, khupirikixerya nluku ota, khukilaathela.

³Ekhalelo ya munkel'owo yaari ntoko overunya, ni ikuwo sawe saari sootteela ntoko nxotte.

⁴Alipa-oolipelela yaahituthuwa vanci-ene, khupacerya othukumela ni woova, enakhala ntoko atthu ookhwa.

⁵Nto munkelo aahiwiirela athiyan'awo wira: Muhoove! Miyo koosuwela wira munimphavela Yesu, Yoole aakhomeliwe va mwikimanyo.

⁶Owo khaavo-mu, oohihimuwa ntoko saahimyaly'awe. Murwe, mooneke nipuro naaixaathiw'awe.

⁷Nto mwaakuveke naanaano va, murowe mwaaleele awiixutti awe wira: ?Owo oohihimuwa mwa alipa-ookhwa. Nave-tho Owo onimohoolelani orowa oKalileya; weiwo t'unrowanyu omoona. Siiso-tho ela piitthu yaarinaka wooleelani.?

⁸Vano athiyan'awo yaahivenya naanaanoru onikhukun'iwe, yoovaka nave etteeliwaka murima vanci-ene, khutthimakela waaleela ehal'ila awiixutti a Yesu.

⁹Etthimakasaka siisaale, Yesu ahirwa okumana ni yaawo, khwaahimeerya wira: ?Murettele okhale ni nyuwo!? Awo yaahimwattamela, yaahinvara inawu, khumukokhorela.

¹⁰Nto Yesu aahahimeerya wira: Muhoove! Murowe mwaaleele axinn'aka wira evenye erowe oKalileya, anokoona weiwo.

¹¹Athiyan'ale arowaka siisaale, alipa oolipelela nikhuku, yaahirowa omuttettheni waaleela makhulupale a anamukuttho sothene iye saakhumelenle.

¹²Nto makhulupale awo yaahithukumana ni mahumu, khwiiwanana waavaha anakhotto awo musurukhu munci-ene, yiiraka:

¹³Nyuwo muhimyeke wira yaahirwa awiixutti awe ohiyu, hiyo nirupaka, khwiiya murutthu awe.

¹⁴Nto etthu ila mwene aiwaru hiyo nnoomukupaliha, nave-tho hiyo nnoolipiherya owakihani.

¹⁵Siiso anakhotto yaahaakhela musurukh'uwo, khwiira ntoko sixuttihiw'aya. Wootha nno woomwaramwareya eriyari y'ayuta mpakha olelo va.

¹⁶Nto awiixutti muloko ni mmosa yaahivenya arowaka oKalileya, omwaako Yesu waahimeenryaawe.

¹⁷Okathi vaamoonaly'aya Yesu, awiixutti akina yaahimukokhorela, nave-tho akina a yaawo yaahimuhoverya.

¹⁸Nto Yesu owaattamelaka, aahahimeerya wira: Koovahiwa owerya wothene wirimu ni vathi va.

¹⁹Vano murowe mwawiixuttiheke atthu a maloko othene, mwaapatisaka ni nsina n'Atiithi ni na Mwaana ni Erooho Yooreera.

²⁰Mwawiixuttiheke weettela sothene soorumalyakani. Nto miyo kinookhala ni nyuwo mahiku othene, mpakha olumwenku omala. Amen!