Matthew 27

¹Vaaxiyaya, mukhulupale a anamukuttho ni mahumu a aYuta, yaahithukumana othene aya, evaanelaka mwaha wa Yesu wira emwiivihe.

²Nto yaahimutthuka, khumukuxa emuroihaka wa mwene Pilato.

³Nto Yuta, yoowo anvarihale Yesu, voonaly'awe wira Yesu aahilamuliwa, owo aahirukunuxa murima, khwaahokoloxerya musurukhw'aya wa paratha makhulupale a anamukuttho ni mahumu.

⁴Khwiira: Koottheka, konvariha mutthu oohittheka. Nto awo yaahimwaakhula wira: Hiyo khav'etthu ahu vo! Eyo ti yawinyu.

⁵Yuta aahirihela musuruku ole w'eparatha mpaani mwa Muluku, aahikhuma, khurowa wiihopha.

⁶Nto makhulupale a anamukuttho yaahittottela musurukh'uwo, yiiraka: ?Musurukh'ula esisapo y'ephome; khunreerela otakaniha musurukh'ula ni soovaha sikina, maana esisapo y'ephome.?

⁷Vano awo yaahiiwanana othuma ematta ya mulipa-oowupa myaapu wira evithiweke-mo amalapo.

⁸Tivo ematt'eyo vaniihaniwaya ?ematta y'ephome? mpakha olelo va.

⁹Siiso, yaahimalelihiwa moolumo a profeta Yeremiya anihimya wira: Aakuxa musurukhu miloko miraru wa paratha, esisapo athu Isarayeli yaaiwananny'aya omuthuma yoowo.

¹⁰Khuthuma ematta ya mulipa oowuupa myaapu, ntoko saahimmyaya Apwiya.

¹¹Nto Yesu aahiroihiwa wa mwene, nave mwene owo aahimukoha wira: Nyuwo mwa mwene a aYuta? Nave Yesu aahimwaakhula Pitalo iiraka: ?Nyuwo moohimya.?

¹²Ootheriwaka ni makhulupale a anamukuttho ni mahumu, Yesu khaawaakhunl'etthu.

¹³Nto Pilato aahimukoha wira: Nyuwo khamuniiwa sinoohimyanayani atthu ala?

¹⁴Nave nnakhala nuulumo nimosa, owo khaakhunle,; tivo, mwene Pilato aahitikinihiwa vanci-ene.

¹⁵Okathi wa Paasikha mwene Pilato aahilimalela omutaphula mutthu mmosa w'alipa-otthukeliwa, yoowo atthu yaamutthun'aya.

¹⁶Wa yaawo aahikhala ootthukeliwa aasuwelexiwa, nsina na Parapa.

¹⁷Pilato aahaakoha atthu yaathukumanne, wira: T'uvi va onimphavel'anyu wira kootaphuleleni? Parapa wala Yesu oniihaniwa Kristu?

¹⁸Nave Pilato aanisuwela saana wira Yesu avareliwe nrima.

¹⁹Nto akilaanthe-ene mpwaro mwa milattu, mwar'awe aahaaruma atthu omuhimeerya wira: Muhikele mulattu wa naxariya owo; maana miyo nkireere ohaawa muulohani mwaha wa yoowo.

²⁰Vano makhulupale a anamukuttho ni mahumu yaahaathipeleliha atthu wira envekele Parapa, ni emwiivihe Yesu.

²¹Mwene Pilato ahaakoha-tho atthu awo iiraka: W'atthu ala anli onimphavelanyu wira kootaphuleleni t'uvi? Awo yaahaakhula wira Muntaphulele Parapa.

²²Nto Pilato aahaakoha-tho iiraka: ?Kimwiirihe exeeni Yesu, yoowo oniihaniwa Kristu? Nto othene yaahaakhula wira: ?Akhomeliwe vamwiikimanyo.?

²³Nto mwene Pilato ohithipelela okoha iiraka: Otthenke-ni yoola? Nto awo yaamutepa okhuwela vanci-ene yiiraka: Akhomeliwe.

²⁴Pilato voonaly'awe wira khaawerya wira etthu, ni onyakula wira otepaka, aahiikuxa maasi, khunyawa ohoolo w'atthu othene, iiraka: Miyo nkin'etthu n'iphome ya mulopwan'ola; mwiisoonele mmansinyu.

²⁵Nto atthu othene yaahaakhula wira: Ephome awe enimorele hiyo n'an'ihu.

²⁶Nto Pilato aahaataphulela Parapa ni aahiruma omaniwa Yesu, khwavahererya atthu wira yamukhomele vamwiikimanyo.

²⁷Nto anakhotto a mwene yaahimuroiha Yesu mpwaro mwa milattu, mwiihaniwa Pretorio, othene aya yaahimuthukumanela.

²⁸Awo yaahimurula Yesu ikuwo sawe, khunwariha ekuwo yoxeerya.

²⁹Yaahuupa ekhara ya miiwa, khunwariha mmuruni, ni yaahinvareliha mutatthi ntata noolopwana. Nto ekokhoraka ohoolo wawe, yaanimutheya yiiraka: Ehaali, mwene aYuta?

³⁰Nave-tho yaanimusenyerya, akuxaka mutathi owo wanvahalyaya, yaanimmanela yoowo va muru.

³¹Numala onveehasa, awo yaahimurula ekuwo eyo yooxerya, khunwariha-tho soowara s'awe, nto khumuroiha wira akhomeliwe vamwiikimanyo.

³²Vaakhummyaya vale, yaahimpwanya mulopwana a oKirene, iihaniwa Simoni. Awo, yaahimukhanyereriha omukuxerya Yesu mwiikimanyo.

³³Vaaphiyaly'aya nipuro naihaniwa ?Kolkota?;

³⁴yaahinwuriha Yesu eviinyu yootakanxeriwa wamwe; nto Yesu aahilawiha, khuhitthuna owurya.

³⁵Vaamukhomenly'aya vamwiikimanyo, yaahikawanasa soowara sawe, yaavyaaka eparakha.

³⁶Numala yaahikilaathi vaavo, enamulipelela.

³⁷Osulu wa muru awe yaahipweha nipawe n'ahimya mulattu awe wira: ?OLA YESU MWENE A YUTA.?

³⁸Vaavo yaahikhomeliwa-tho vamosa ni Yesu alopwana anli, atakhali; mmosa aari moono woolopwana, mukina aari moono woothiyana.

³⁹Nave atthu yaavira vaavale yaaninveha ettikinyaka muru.

⁴⁰Yiiraka: Weyo, mulipa-oopwexakasa empa ya Muluku n'uteka ekina mahiku mararu, wiisoopole mmansawo! Waari Mwaana a Muluku, okhuruwe vamwiikimanyo vo!

⁴¹Siiso-tho makhulupale a anamukuttho, n'awiixuttihi a ikano, ni mahumu yaaninveeha ehimyaka wira:

⁴²Ole oowoopola atthu akina, nto khanwerya wiisoopola mmansawe. Aary-ene Mwene a Isarayeli, akhuruwe naanaano vamwiikimanyo vale: Ti vanrowaahu omwaamini;

⁴³ole onimuroromela Muluku. Muluku yoowo amoopole naanaano-va, amphentaka, maana aanihimya wira: ?Miyo ka Mwaana a Muluku.?

⁴⁴Nave-tho atakhali yaakhomeliwe poromosa ni Yesu, yaaninveha yoowo.

⁴⁵Okhuma othana eriyari mpakha iwoora tthaaru sa nxekuwa, mulaponi moothene yaahikhumelela ewiriphi.

⁴⁶Nto iwoora tthaaru sa nxekuwa Yesu aahikhuwela ni wiilipiha iiraka: ?Eloi, Eloi Lama Sapathani.? Eyo p'iyo, Muluku aka, Muluku aka, Mukinyanyalenleni?

⁴⁷Atthu akina yaari vaavale, emwiiwaka wiihana yaaniira: ?Ola onimwiihana Eliya.?

⁴⁸Nto naanaanoru mmosa a yaale aahitthimakela exiponxa, khunaaniha n'ivinyu yoonyuunya, nave khutthukelela vamutathini, ananwuriha Yesu.

⁴⁹Nave akina yaanimwirela wira: ?Mmuhiye, nimoone Eliya aatthunaka orwa omoopola.?

⁵⁰Nto Yesu aahikhuwela-tho vanci-ene, khukhwa.

⁵¹Nave okathi-ene yoowo, ekuwo ya mpaani mwa Muluku, yaahikhereya eriyari, opacerya osulu mpakha vathi. Elapo yaahitetereya, miyala saahiphweeyasa.

⁵²Mahiye yaahuuhuwasa, ni atthu oreera murima yaakhwiye khalayi, yaahihihimuwa;

⁵³Ekhumansene mmahiye, numala ohihimuwa wa Yesu, atthu awo yaahikela muttetthe wooreera, khwisooniherya w'atthu anci-ene.

⁵⁴Nto mukhulupale a anakhotto n'atthu awe yaamulipelelan'awe Yesu, voonaly'aya elapo etetereyaka ni sothene saakhumelela, yaahoova vanci-ene, khwiira: Tthiri ola aari Mwaana a Muluku.

⁵⁵Vaavo yaahikhala-vo athiyana anci-ene. Yemenle ottaiwene, enawehasa. Yaawo yamutthanre Yesu okhuma oKalileya, emurumeelaka.

⁵⁶Mwa yaawo aari Maria Matalena, ni Maria mam'awe Yakopo ni Yosefe, ni mam'aya an'awe Sepeteyo.

⁵⁷Nihinatthi okela nsuwa, aahirwa mulopwana mmosa thaaciri iihaniwa Yosefe, a elapo ya waarimateiya. Mwiixutti a Yesu.

⁵⁸Owo aahirowa wa Pilato onvekela murutthu wa Yesu. Nto Pilato aahiruma wira avahiwe.

⁵⁹Yosefe aahikuruxa murutthu wa Yesu, khuphapa n'isanta esya,

⁶⁰Khuvitha munikhukuni nawe nsya naathimpwe vamwala. Numala aahipirikixa nluku nuulupale, khuttiyela nikhuku nlo, khurowa.

⁶¹Vaavale aahikhala vo Maria Matalena ni Maria mukina yaakilantte ohoolo wa nikhuku.

⁶²Mmeeloni mwaya, yaari esaapato, yaahithukumana owanyawe Pilato makhulupale a anamukuttho, n'aFarisi.

⁶³Yiiraka: ?Pwiya, nihupuwela wira nawootthe ole ari mukumi aahihimya wira yavira mahiku mararu, kinoohihimuwa mookhwaani.?

⁶⁴Tivo, murume wira nikhuku nle nalipeleliwe volipiherya-vo, mpakha nihiku naneeraru. Vannikhala wira awiixutti awe orowaka wiiya murutthu wa Yesu ohiyu, numala yaahimeerye atthu wira: ?Yesu ohihimuwa mw'alipa ookhwa.? Nto wootha wookiserya, onrowa otepa ovikana iwe woopacerya.

⁶⁵Pilato aahahimeerya wira: Mookhalana alipeleli anyu. Murowe mwalipeleleke ntoko sintthunanyu.

⁶⁶Awo yaahirowa, olipelela nikhuku nlo evarelelaka nluku nlo.