Matthew 26

¹Yesu numala wiixuttiha itthu iya sothene, owo aahahimeerya awiixutti awe wira:

²?Nyuwo moosuwela wira ahanle mahiku manli ophiya Paasikha, nave Mwaana a Mutthu onrowa ovahereriwa wira akhomeliwe vamwiikimanyo.?

³Nto makhulupale a namukuttho ni mahumu aYuta ni awiixuttihi a ikano yaahithukumana owannyawe mukhulupale a anamukuttho aaihaniwa kaifa,

⁴khwiiwanana onvara Yesu ni mwiitiho n'ulavilavi aya, wira emwiive.

⁵Awo yaanihimya wira: Nihinvare nihiku na niira wira ohikhumelele onyakulihana w'atthu.

⁶Yesu anari oPetaniya, owany'awe Simoni, namakuttula,

⁷muthiyana mmosa aahimwaattamela, akunxe-ene murinki: Wa makhura oowunkhela, ni ooreera, khwitthela makhur'awo vamuru wa Yesu, owo iira aly'aka.

⁸Awiixutti awe voonaly'aya etthu ila, awo yaahinanariwa khwiira: Makhur'ala anihononeliwa-ni?

⁹Tthiri makhura ala yaahaana otumihiwa ni musurukhu woosuwanyeya, nto musurukhu-ene ekaweliwa alipa-ohaawa.

¹⁰Yesu aiwaka malavulelo ale, aahahimeerya wira: Munimuukhulelani muthiyan'ola? Ola ookiirela etthu yooreera.

¹¹V'ekeekhayi alipa-oohaawa mookhalana eriyari anyu mahiku othene: Nto miyo khamunkikhalana mahiku othene.

¹²Nto ola attikitthelaka makhura erutthu aka, onreerihela ovithiwa waka.

¹³Kinoohimeeryani ekhweeli wira: Mapuro othene anrowaya olaleiwa Ehapar'ila Yooreera, mulaponi mothene, ela-tho muthiyan'ola yiiraly'awe enrowa olaleiwa, uupuweliwaka yoola.

¹⁴Vano mmosa aawiixutti muloko nanli, yoowo iihaniwa Yuta Isikaryoti, ahirowa okumana ni makhulupale anamukuttho,

¹⁵khwiira: Muntthuna okivaha exeeni, koovahereryani Yesu? Nave awo yaahimuliva musuruku miloko miraru wa paratha.

¹⁶Okhuma nihiku nenlo, Yuta aaniphavela okathi wooreerela onvariiha Yesu.

¹⁷Nihiku noopacerya na niira na mikatthe soohiheliwa miropo, awiixutti a Yesu yaahimukoha wira: ?Muntthuna noolikanyihereni vayi yoolya ya Paasikha??

¹⁸Nto Yesu aahiira: Murowe omuttettheni weiwo munoomphwanya mutthu mmosa, mwamuhimeerye wira: Mwiixuttihi onihimya wira okathi aka ohanle ophiya. Owannyu t'onrowaka omulya Paasikha n'awiixutti aka.

¹⁹Awiixutti yaahiira ntoko saarummy'awe Yesu, yaahilikanyiha yoolya ya Paasikha.

²⁰Vaakelaly'aya nsuwa, Yesu aahikilaathi n'awiixutti muloko nanli analya;

²¹Nto elyaaka siisaale, Yesu aahahimeerya wira: ?Kinooleelani ekhweeli wira mmosa a nyuwo onookivariha.?

²²Nto awo yaahiriipiwa murima vanci-ene, khupacerya khula mutthu wira: ?Pwiya! Khino ti miyo?

²³Yesu aahimwaakhula wira: ?Ole onreryan'aka vamosa mparathoni, yoowo t'unrowa okivariha.

²⁴V'ekeekhayi Mwaana a Mutthu onoorowa, ntoko silempwaya sa Yoowo, nto ootakhaliwa mutthu onrowa onvariha Mwaana a Mutthu! Fataari mutth'uwo ahaayariwe.

²⁵Yuta, yoowo aarowa onvariha, aahimukoha wira: ?Mwiixuttihi khino ti miyo?? Yesu khumwaakhula wira: ?Nyuwo moohimya.?

²⁶Nto ely'aka, Yesu aahikuxa mukatthe, khureeriha, khukawanya mukatthe owo, khwaavaha awiixutti iiraka: Kuxakani, mukhuureke; ela erutthu aka:

²⁷Siiso-tho aahikuxa ekoopho y'evinhu, khureeriha, khwavaha awiixutti iiraka: Nwuryeke ela othene anyu.

²⁸Tthiri ela ephome aka, ephome yo waataana wa naanaano, yeeyo emwarexeliwe atthu anci-ene, wira eleveleliwe itampi.

²⁹Kinooleelani wira: Okhuma olelo, nkinwurya-tho eviinyu ila, mpakha nihiku ninrowaka owurya ni nyuwo eviinyu esya moomweneni mw'Atiithi.

³⁰Vano, yaahipa isipo sa Paasikha, numala yaahivenya enarowa omwaako Olivera.

³¹Yesu aahahimeerya awiixutti awe wira: Nyuwo othene anyu munookihiya ohiy'ula, maana volempwa wira: ?Kinoomwiva makampusi, nto ipwittipwitthi sinoomwareya.?

³²Vano-nto kahihimuwa mookhwaani, kinimohoolelani kirowaka oKalileya.

³³Nto Petru aahimwaakhula wira: Hata atthu othene yoohiyakani miyo nnakhala mano nkinoohiyani.

³⁴Yesu aahimuhimeerya wira: Kinooleelani ekhweeli wira ohiyu-ene yoola, muthupi ohinatthi wiipa, nyuwo munookiruna imaara tthaaru.

³⁵Petru aahimuhimeerya wira: Hata ekhumelelaka etthu entthuna okiiva, miyo nkinoorunani. Nave awiixutti akina othene yaahihimya siiso-tho.

³⁶Yesu aahirowa n'awiixutti awe nipuro naihaniwa Ketisimani, khwaahimeerya wira: Mukilathi va, miyo kinrowa iwe ovekela.

³⁷Nto aahimukuxa Petru n'ana anli a sepeteyo, okathi yoowo aahipacerya oriipiwa murima, n'uhaawa,

³⁸Nave aahahimeerya wira: Murim'aka wooriipiwa, mpakha okhwa; muhale vaava, mulipelelaka.

³⁹Eettaka vakhaani, arowaka ohoolo vakhaanene, aahikokhora, khuuramela vathi anavekela iiraka: Tiithi vaweryaneyaka, mukakiherye ohaawa nno. Nto ehiireye ntoko sintthun'aka nto yiireye ntoko sintthun'anyu.

⁴⁰Numala aahihokolowela w'awiixutti awe, khwaaphwanya erumpe-ene; nto aahimwirela Petru wira: Nto nnakhala okathi mmosa khanwenrye owehererya ni miyo?

⁴¹Mulipeleleke, ni nvekeleke wira muhehereriwe. V'ekeekhayi Erooho ennitthuna, nto erutthu khilimpe.

⁴²Yesu aahirowa-tho ovekela emaara yanenli iiraka: Tiithi ohaawa nno waahiwerye okivira, wiireye otthuna w'anyu.

⁴³Nto nuuhokolowa, aahaaphwanya-tho erupaka okhala wira ikhove saahaaveliha.

⁴⁴Yesu aahaahiya khurowa-tho ovekela vaneeraru, ahimyaka moolumo mamosa-ru.

⁴⁵Numala aahihokolowela w'awiixutti awe, khwaakoha wira: Nlelo munoorupa? Nlelo munoomumula? Paahi! Okathi aka woophiya. Mwaana a Mutthu onoovahereriwa mmatatani mw'alipa ootakhala.

⁴⁶Nvenye, nrowe; ole onrowa okivariha oophiya.

⁴⁷Nto alavulaka nlelo, aahiphiya Yuta, mmosa a muloko nanli, aari vamosa n'atthu anci-ene yakunxe-ene axoowa ni ikopo, yaarummwe ni makhulupale a anamukuttho, ni mahumu a maloko atthu.

⁴⁸Nave owo aarowa onvariha Yesu, aahaavaha atthu awo ethoonyeryo iiraka: Ole onrowaka onvaha epeeco, ti yoowo, Munvareke.

⁴⁹Naanaanoru aahimwaattamela Yesu khwiira: Muhiileliwa Pwiya, Mwiixuttihi. Nto khunvaha epeeco.

⁵⁰Nto Yesu aahimuhimeerya wira: Mpatthani! Exeeni murwenly'anyu? Naanaanoru atthu ale yaahimwaattamela Yesu, khunvara, ni khumutthuka.

⁵¹Vano mmosa a atthu yaari ni Yesu, aahimutholola xoow'awe khumuthikila naaru murumeyi a mukhulupale a anamukuttho.

⁵²Nto Yesu ahimwiirela wira: Mmwiixaathi xoow'anyu mwaaryawe, maana atthu othene yale anwana ni xoowa, anoopwetexiwa ni xoowa.

⁵³Wala nyuwo munanyiherya wira nkaawerya wavekela Atiithi aka naanaano va, nto awo khiyaakivaha ankelo anci-ene, mittitthi soovikana muloko ni miili?

⁵⁴Tthiri siiso saarowa omaliheriwa sayi soolempwa, sinihimya wira: Siiso saahaana wiiraneya?

⁵⁵Okathi yoowo, Yesu aahihimeerya muttitthi uwo w'atthu wira: Mukirwelaka okivara, murwiye n'ixoowa n'ikopo, ntoko wira ka nawiiye! Nihiku ti nihiku miyo kaanikilaathi mpaani mwa Muluku, kiwixuttihaka atthu, muhikivara.

⁵⁶Sothene iya sikhumelenle wira simaliheriwe iye silempwe ni maprofeta. Nto awiixutti othene yaahimuhiya, khutthyawa.

⁵⁷Atthu yaanvanre Yesu yaahimuroiha owanny'awe Kaifa, mukhulupale a anamukuttho, weiwo awiixuttihi a ikano ni mahumu wathukumanalyaya.

⁵⁸Nto Petru aanimutthara ottuli, mpakha vate owanny'awe mukhulupale a anamukuttho, khukela-mo, khukilaathi eriyari y'arumeyi, wira oone woomaleloni w'aya.

⁵⁹Nto makhulupale a anamukuttho ni mahumu, n'alipa-oophuka milattu othene aya, yaaniphavelasa mulattu w'omootherya Yesu, wira emulamule wiiviwa.

⁶⁰Nave khuhiyaaphwanya, enamwi yaakhumme anamoona anci-ene owootha vokiserya, yaahirwa anli,

⁶¹khuhimya wira: ?Ola on'himya wira: Miyo kinniwerya opwexakasa empa ya Muluku, nave kiteke-tho mahiku mararu paahi.?

⁶²Mukhulupale a anamukuttho aahemela, anamukoha Yesu iiraka: Khamunaakhula etthu, ela, enoohimyanaayani atthu ala?

⁶³Nto Yesu khaakhunle etthu. Tivo, mukhulupale a anamukuttho aahimwirela: Kinoolaphelihani ni nsina na Muluku mukumi, wira munleele mwaari Kristu, Mwaana a Muluku.

⁶⁴Yesu aahimwaakhula iiraka: Nyuwo moohimya, nave munomoona Mwaana a Mutthu akilaanthe-ene moono woolopwana, wowerya ni arwaaka mmeekuni wirimu.

⁶⁵Nto mukhulupale a anamukuttho aahikhera ikuwo s'awe, iiraka: Ola oonveeha Muluku; ninrowa waphavelelani-tho anamoona? Nyuwo moomwiiwa ola naanaano vaava, oveeha wawe.

⁶⁶Nyuwo munoona sayi? Nto awo yaahaakhula wira: Ola omphwanela omwiiva.

⁶⁷Nto yaahimusenyerya owiitho ni yaanimmana owiitho nave akina yaanimmana n'ikopo,

⁶⁸yiiraka: Haya mmuhimye oomanneni ti paani weyo Kristu.

⁶⁹Nto Petru akilanthe-ene ota, mpwaro, murumeyi mmosa mwamuthiyana, aahimwaattamela, khumwiirela wira: ?Nyuwo-tho mwaari ni Yesu, muKalileya.?

⁷⁰Nto Petru aahiruna ohoolo w'atthu othene iiraka: ?Nkinsuwela enihimy'anyu.?

⁷¹Nto vaavenyaly'awe vo, murumeyi mukina muthiyana aahimoona vamukhora, khwaahimeerya atthu yaari vaavale wira: ?Ola-tho aari ni Yesu muNasareti.?

⁷²Petru aahiruna-tho, khulapha iiraka: ?Nkinimusuwela mulopwan'ole.?

⁷³Nto oviraka okathi vakhaani, atthu yaari vaavale yaahimwiirela Petru wira: Veekeekhayi-ene, nyuwo-tho mwa mmosa a yaawo, hata elavulelo anyu ennosuwelihani.

⁷⁴Nto Petru aahipacerya olapha ni wiilaphela sootakhala, ahimyaka wira: Nkinimusuwela mulopwan'ole; naanaanoru, muthupi waahiipa.

⁷⁵Vano-nto Petru aahuupuwela moolumo aahimyaly'awe Yesu, iiraka: ?Muthupi ohinatthi wiipa, nyuwo munookiruna imaara tthaaru.? Nto aahikhumela ota, khunla vanci-ene ariipiwe-ene murima.