Matthew 25

¹Nto omwene wa wirimu onlikana ntoko imwali muloko saakunxe ixamaniya saya, khurowa omwaakhela mutheli.

²Mwa seiyo, thanu saahikhalana ankhili, ni thanu saari alolo.

³Alolo awo ekuxaka ixaminiya saya, sahihiya okuxa makhura.

⁴Nto iye saarina ankhili, ekuxaka ixamaniiya saahikuxa-tho makhura mmirinkini.

⁵Mutheli apisaka orwa, sothene saahipacerya ohisila inarupa.

⁶Nto ohiyu eriyari vahikhuweliwa wira: Mutheli oophiya! Nvenye mmutthimakele.

⁷Naanaanoru, imwali iyo sothene saahivenya, inareherya ixamaniya s'aya.

⁸Vano alolo ale yaahiwiirela akhw'aya aankhili wira: ?Nivaheeni makhur'anyu vakhani: Ixamaniiya sahu sinoottipha.?

⁹Nto imwali s'ankhili saahiwaakhula wira: ?Khanintthuna: Maana noovahani khanniphiyerya hiyo nnakhala nyuwo. Fataari murowe mwathume awinyu.?

¹⁰Okathi waarow'aya othuma makhura, mutheli aahiphiya. Ale y'ari oohikana-ene yaahikela ni yoowo mpaani mwa niira, khuwaliwa mukhora.

¹¹Numala, saahiphiya-tho imwali iye silolo khwiira: ?Pwiya, Pwiya, Munihulele!?

¹²Nto owo aahiwaakhula iiraka: Kinoohimeeryani ekhweeli wira miyo nkinoosuwelani.

¹³Tivo mulipeleleke maana khamunsuwela nihiku nnakhala okathi onrw'awe Mwaana a Mutthu.

¹⁴Siiso-tho mulopwana mmosa aarina mukwah'awe, aahiwiihana arumeyi awe khwaahiyerya muhakhu awe.

¹⁵Mmosa aahimunnya musurukhu wa italento thanu mukina musurukhu wa italento piili, aneeraru musurukhu wa etalento emosa. Khula mutthu ntoko saawery'awe. Khuvenya arowaka, voohilekela.

¹⁶Murumey'ule aakhenle musurukhu wa italento thanu aahimweetta nakoso, khuphwanya italento sikina thanu.

¹⁷N'ule aakhenle musurukhu wa italento piili, aahira-tho siiso, khuphwanya italento sikina piili.

¹⁸Nto ole aakhenle musurukhu wa etalento emosa, aahithipa nlitti, khuvitha-mo etalento ile y'Apwiy'awe.

¹⁹Vaaviraly'aya mahiku manci-ene, pwiy'aya aarumeyi awo aahihokolowa, khwiira ikontha n'awo.

²⁰Nto aahimwaattamela murumeyi ule aakhenle italento thanu, aruuhaka italento sikina thanu, khwiira: ?Pwiya, mwaakinnyale italento thanu: Vano-nto mooneke-tho iya thanu kiphwany'aka.?

²¹Pwiy'awe aahimwaakhula wira: Vareera siiso, murumeyi oorumeya ni oororomeleya. Nyuwo muroromelen'ye n'itthu sikhaani, kinoowinnyereryani itthu sinci-ene. Murwe, mutteeliweke murima vamosa ni pwiy'anyu.

²²Ni aahirwa murumeyi ule aakhenle italento piili khwiira: ?Pwiya, mwaakinnyale italento piili. Nto mooneke-tho iya piili siphwanny'aka.?

²³Pwiya'awe aahimuhimeerya wira: Vareera saana murumeyi oorumeya ni oororomeleya. Nyuwo muroromelen'ye n'itthu sikhaani kinoowinnyereryani itthu sinci-ene. Murwe, mutteeliwe murima vamosa ni pwiy'anyu.

²⁴Nave aahirwa murumeyi ule aakhenle etalento emosa paahi, khuhimya wira: Pwiya, miyo kaanoosuwelani wira nyuwo mwa mutthu oolipa murima, nyuwo munnihepha memmo muhaalaly'anyu-mo, munnithukumanya memmo muhiphatteiyanyu-mo.

²⁵Tivo kiwoovakani, kaahithipela etalento anyu. Ela va ekhanle yawinyu.

²⁶Pwiy'awe aahimwaakhula, iiraka: Nyuwo mwa murumeyi ootakhala ni oonnyoonyiwa! Mwaanisuwela wira kinnihepha memmo muhaalalyaka-mo kinnirukula memmo muhiphatteiyaka-mo.

²⁷Nto mwahaana orowana opanko wira kaahokolowaka kiphwanye musurukhu aka wuncereriwe-ene.

²⁸Mmwaakhe etalento eyo erinawe, mmwinnye ole orina italento muloko.

²⁹Veekhayi ole orina onoovahiwa-tho, ni onookhalana vowaatta: N'ule ohirina etthu, hata ele erin'awe onimwaakhiwa.

³⁰Nto mmurihele murumeyi uwo ohinifayi vate vooriipa, iwo onookhala-wo wunla n'ulumanyiha maino.

³¹Nave nihiku Mwaana a Mutthu ninrw'awe ni nttittimiho nawe vamosa n'ankelo oreera othene, onookilaathi veehiceni vawe y'ottittimiheya.

³²Nave atthu a maloko othene anoothukumanyiwa ohoolo wawe, nto owo onimwaavalanya atthu ooreera murima, ntoko makampusi sinvalany'awe ipwittipwitthi n'ipuri.

³³Owo onookhaliha ipwittipwitthi moono awe woolopwana n'ipuri moono awe woothiyana.

³⁴Nto Mwene onimwaahimeerya ale a moono awe woolopwana wira: ?Murweeke va, nyuwo mureerihiwe n'Atiithi. Mwaakhele omwene olokiheriw'anyu okhuma w'opaceryoni w'olumwenku.

³⁵Okhala wira miyo kaahivoliwa etala, nyuwo mukivaha yoolya; kaahivoliwa ntthona, nyuwo mukivaha maasi; kaahikhala muletto, nyuwo mukivaha opuro;

³⁶kaahithaaleliwa, nyuwo mukivaha ikuwo; kaahiwereiwa nyuwo mukixekurya kaahitthukiwa, nyuwo mukithotola.?

³⁷Vano anaxariya anoomukoha wira: Pwiya naawoonneni liini nvoliwe-ene etala, noovahani yoolya; wala nvoliwe ntthona, noovahani maasi?

³⁸Naawoonneni liini muri muletto, noovahani opuro; wala muthaaleliwe-ene, noovahani ikuwo?

³⁹Naawoonneni lini nwereiwaka wala mutthukeliwe-ene nooxekuryani?

⁴⁰Mwene onoowakhula wira: V'ekeekhayi kinooleelani wira imaara sothene samwiirelanyu mmosa a axikhaani ala, ari axinn'aka mwaakiirela yoomi.

⁴¹Nto onoowirela-tho ale a moono awe woothiyana wira: ?Mukhumase va vary'aka, nyuwo atakhali, murowe omooroni ohinimala, opakeliwe Satana ni ankelo awe ootakhala.

⁴²Maana miyo kaahivoliwa etala, nyuwo muhikivaha yoolya; kaahivoliwa ntthona, nyuwo muhikivaha maasi.

⁴³Kaahikhala muletto, nyuwo muhikivaha opuro; kaahithaaleliwa, nyuwo muhikivaha ekuwo; kaahiwereiwa ni kaahitthukeliwa, nyuwo muhirwa okixekurya.?

⁴⁴Vano awo-tho anoomukoha wira: ?Pwiya! Nawoonneni liini nvoliweene etala ni ntthona, wala muri muretta nnakhala mutthukeliweene, nihookhaliheryani??

⁴⁵Mwene owo onoowaakhula wira: ?Kinooleelani ekhweeli wira imaara sothene sahamwiirelanyu itthu iya nnakhala mmosa a axikhaani ala, mwahaakirela miyo.?

⁴⁶Siiso atakhali anoorowa woohaawani woohimala, nave-tho anaxariya anoorowa weekumini ehinimala.