Matthew 24

¹Yesu akhumakaru mpaani mwa Muluku, awiixutti awe yaahimwaattamela wira emuthoonyerye matekeliwo a empa ya Muluku.

²Nto owo aahahimeerya wira: Nyuwo munnoona itthu iya sothene wala khamunoona? Nto kinooleelani ekhweli wira: Khaninrowa ohala vale nnakhala nluku nimosa vasulu va nikhw'aya; othene anookomowela vathi.

³Yesu aahikilathi vamwaako olivera. Nto awiixutti yaahimwaattamela okhwipi, khumukoha yiiraka: Munihimeerye okathi onrow'aya okhumelela itthu iya; ni ethoonyeryo xeeni y'orwa w'anyu ni y'omala w'olumwenku.

⁴Yesu aahiwaakhula iiraka: Mwiipasoope wira ahikhale oniwootothani.

⁵Maana atthu anci-ene animoorwa mwa nsina naka ehimyaka wira: Kristu ti miyo! Siiso anoowoototha atthu anci-ene.

⁶Munrowa wiiwa silavuliwaka ikhotto ni oruma wa ikhotto. Muhituthuwe! Ikhotto iyo sihaana okhumelela, nto kahiyo t'umalawene olumwenku.

⁷Elapo enoowana ni elapo ekina, omwene onootuphela omwene mukina, nave-tho enookhumelela etala n'itetere ilapo sinci-ene.

⁸Itthu iya sothene sinookhala ntoko ohaawa woopacerya.

⁹Nyuwo munoohaaxiwa ni munimwiiviwa. Maloko othene animoonyokhani mwaha wa nsina n'aka.

¹⁰Okathi yoowo, atthu anci-ene, anootthekihiwa, anoovarihiwa ni anoonyokhana mukina ni mukhw'awe.

¹¹Anookhumelela maprofeta oowootha, awo anoowoototha atthu anci-ene.

¹²Nave mwaha woowuncerereya etampi, ophentana w'atthu anci-ene onoovukuwa.

¹³Nto ole onrowa ovilela mpakha woomaleloni, owo onimoopowa.

¹⁴Nave-tho Ehapar'ila Yooreera y'omwene wa wirimu enoolaleiwa mulaponi moothene wira ekhale namoona ilapo sothene. Vano-nto tunrow'aya omala olumwenku.

¹⁵Moona yootakhala yuulupale yoowuuliha muru, epwehiwe-ene mpaani mwa Muluku, y'eyo yaahimalyawe profeta Tanieli (ole onsoma iiweke).

¹⁶Okathi yoowo, ole ori elapo y'oYuteya, atthyawele omiyaakoni;

¹⁷ole ori vataratoni ahikhuruwe okux'etthu mpa mwawe;

¹⁸Ole ori mmatta ahihokolowele ottuli, wira akuxe mukhumiawe.

¹⁹Mahiku ene yaawo, ootakhaliwa athiyana anrowa ophwanyiwa erupanleele-ene, wala emwaamwihaka mwaana.

²⁰Nvekeleke wira itthu iya sihikhumelele eyiita, wala nihiku na Saapatu.

²¹Tthiri okathi yoowo, onookhala oxanka wuulupale, ohinakhumelele okhuma w'opaceryani w'olumwenku mpakha vano, nnakhala ohinrowa-tho okhumelela.

²²Muluku ahaavukunle mahiku awo, khaavo aawerya woopowa. Nto Muluku onoovukula mahiku yaawo mwaha w'atthu oothanliwa.

²³Nto akhala mutthu onoohimeeryani wira: Kristu t'ula va! Wala ori iwe, muhikupali.

²⁴Anookhumelela aKristu oowootha ni maprofeta oowootha epakaka miiriirya suulupale ni sootikiniha, wira awootothe atthu, hata oothanliwa.

²⁵Tivo mwiiwe saana ele epacenry'aka woohimeeryani.

²⁶Vano mwaleeliwa wira: Owo ori mothakoni! Muhirowe. Wala mwaleeliwa wira: ?Owo ori mpaani! Muhikupali.?

²⁷Vekekhayi, ntoko overunya ompaceryaya onikhuma nsuwa khunaarya mpakha onikelaya nsuwa, siiso-tho t'unrow'aya wireya orwa wa Mwaana a Muluku.

²⁸Vari murutthu, vaavo t'anthukuman'aya axawawe.

²⁹Mahiku yaawo, wamalakaru ohaawa iwo, nsuwa nnoottipha, mweeri onoohiya waarya, itheneeri sinoomorasa wirimu: Vano owerya wa wirimu onoottikinyeya.

³⁰Nto ethoonyeryo ya Mwaana a Mutthu enookhumelela osulu; nave atthu a maloko othene a vathi va animwiikhupanyerya, ni anoomoona Mwaana a Mutthu arwaaka mmeekuni wirimu, n'uwerya ni nttittimiho nuulupale.

³¹N'uruma wa nlope nulupale, Muluku onimwaruma ankelo awe, wira yaathukumanye atthu aathanlaly'awe, okhuma woopaceryani w'erimu ni w'elapo mpakha wookiseryani waya.

³²Tthiri mwiixutte nlikanyiho na mwiri wa mpheera: Okathi iritta s'aya simpacery'aya ovaruwa n'uphuwela makukhu aya, munnisuwela wira eyiita ehaattamela.

³³Siiso-tho, moonakaru sikhumelelaka itthu iya sothene, musuweleke wira Mwaana a Mutthu ohanle orwa.

³⁴Vekekhayi kinooleelani wira khanvira atthu a vano, itthu iya sothene sihiiranen'ye.

³⁵Erimu n'ilapo ya vathi sinoomala; nto moolumo aka khammala.

³⁶Nto nihiku hata okathi sinrow'aya okhumelela itthu iya, khaavo onsuwela; nnakhala ankelo a wirimu, nnakhala Mwaana. Atiithi paahi tansuwela.

³⁷Ntoko viiranen'yaaya mahiku a Noowe, siiso-tho vanimwiiraneya okathi onrw'awe Mwaana a Mutthu.

³⁸Tthiri ntoko mahiku awo avirale a epula ya mutaaseke, atthu yaanilya, yaaniwurya, yaanithela, ni yaanitheliha mpakha nihiku Noowe naakenly'awe mukalawani

³⁹Awo ehisuwelaka etthu, mpakha ophiya epula ya mutaaseke, khuwiiva atthu othene. Siiso-tho vanimwiiraneya okathi onrw'awe Mwaana a Mutthu.

⁴⁰Nto yakhala alopwana anli mmatta, mmosa onookuxiwa, mukina ahiiwe.

⁴¹Nave yakhala athiyana anli exilaka vanlukuni, mmosa onookuxiwa, mukina ahiiwe.

⁴²Tivo, mulipeleleke maana khamusuwenle nihiku ninrw'awe Pwiy'anyu.

⁴³Nave musuwele saana etthu ila: Mwaneene etthoko aasuwela okathi w'ohiyu onrw'awe nawiiye, khaarupa; aamulipelela ni khaahiyererya mpaani mw'awe mutupheliwaka.

⁴⁴Tivo-tho, muhale mulikanneene, okhala wira Mwaana a Mutthu onimoorwa okathi ohinuupuwelanyu.

⁴⁵Murumeyi oororomeleya ni a ankhili t'uvi; t'ule aathanliwe ni pwiy'awe, wira awettiheke anamuteko akina, aakaweleke yoolya okathi aya?

⁴⁶Ooreeriwa murumeyi ule, oniira Pwiy'awe arwaaka, anaphwanya avaraka muteko.

⁴⁷Kinooleelani ekhweeli wira: Owo onoonvaha murumeyi uwo weettiherya muhakhu awe wothene.

⁴⁸Nto murumeyi ule oonanara murima uupuwela wira: ?Pwiy'aka onnipisa orwa,?

⁴⁹khupacerya waamanakasa arumeyi akhw'awe, ni olya ni owurya vamosa n'anamuhapaliwa,

⁵⁰pwiy'awe onimoorwa nihiku nihinweherery'awe ni okathi ohinsuwel'awe.

⁵¹Pwiy'awe owo onoomuhukhumu, ni onoomurowana nipuro nawe vamosa n'anawootothe; iwo onookhala wunla n'ulumanyiha maino.