Matthew 23

¹Numala, Yesu aahihimeerya muttitthi w'atthu, n'awiixutti awe wira:

²Veehiceni ya Monse aakilaathi-vo aFarisi n'awiixuttihi a ikano.

³Mwiiweleleke sothene siniwiixuttihaayani, mweetteleke; nto muhitthareke meettelo aya, okhala wira awo annixuttiha, nto khuhiyeettela.

⁴Awo annitthuka miritti soolemela, soolipa okuxa, khuyaakapattiha akhw'aya mmakhatani nto awo hata n'ekath'aya khantthuna okwannya.

⁵Sothene siniiraya, aniira wira yooniweke n'atthu. Awo anninnuwiha ikhulula, annirekamiha maveru a malay'aya.

⁶Awo onnaasivela okilaathi mapuro oosuwanyeya, vanthukumaneliwa niira, ni mapuro oottittimiheya mpaani moothukumana.

⁷Awo onnasivela okhomasiwa n'atthu ankumanan'aya, ni wireliwa ?mwiixuttihi n'atthu othene.?

⁸Nto nyuwo mukhotteke wireliwa ?mwiixuttihi? maana mwiixuttihi anyu ori mmosa, Kristu; nyuwo othene mwaaxinna.

⁹Ahikhale ontthunayu omwirela tiithi vathi-va: Okhala wira tiith'inyu ori mmosa paahi, yoowo ori wirimu.

¹⁰Hata mukhootteke wireliwa mwiixuttihi, okhala wira mwiixuttihi anyu ori mmosa paahi okhanle Kristu.

¹¹Vano ole ori muulupale wa nyuwo, onookhala murumeyi anyu.

¹²Ole oniisinnuwiha, onooyevihiwa: Ole oniiyeviha, onimunnuwihiwa.

¹³Mootakhaliwa nyuwo awiixuttihi a ikano n'aFarisi, anawootothe, nyuwo munnaawalela atthu mukhora w'omwene wa wirimu, hata nyuwo mwaaxineene khamunkela-mo nave-tho munnakhottiherya ale amphavela okela-mo.

¹⁴Mootakhaliwa nyuwo awiixuttihi a ikano n'aFarisi, anawootothe. Tivo munoohukhummwa vanci-ene.

¹⁵Mootakhaliwa nyuwo awiixuttihi a ikano n'aFarisi, anawootothe, nyuwo munneettetta ilapo n'iphareya wira mumphwanye nnakhala mmalapo mmosa, oomukhaliha mwiixutti anyu; mwamphwanya vale munimukhaliha mwaana a omooroni wovikanani nyuwo imaara piili.

¹⁶Mootakhaliwa nyuwo muniweettiha akhw'inyu, muhoonaka, nyuwo munnihimya wira: ?Akhala mutthu onlaphela empa ya Muluku kahi etthu, nto alaphela muhakhu ori mpaani mwa Muluku, owo onnilokihiwa.?

¹⁷Nyuwo alolo ni oohoona! Yuulupale piivi: Eweero wala empa ya Muluku enreeriha eweero eyo?

¹⁸Nyuwo munnihimya-tho wira: Akhala mutthu onaalaphela altaari, kahi etthu; nto alaphela yoovaha eri vasulu w'altaari, owo onnilokihiwa.

¹⁹Nyuwo atthu oohoona ni alolo, yuulupale piivi? Yoovaha, wala altaari anreeriha yoovaha eyo?

²⁰Nto ole onlaphela yoovaha, onnalaphela altari awo n'itthu sothene siri vaavo.

²¹Onlaphela empa ya Muluku onlaphela empa eyo ni Ole onkhala mpaani memmo.

²²Onlaphela ehice ya Muluku, ni ole, okilanthe vehiceni vaavo.

²³Mootakhaliwa nyuwo awiixuttihi a ikano n'aFarisi, anawootothe, nyuwo munvaha yanamuloko ya soowiima sa mmatta mw'anyu: Cincili ni muxiri, nto munnithanya sooruma suulupale sa ikano, ntoko exariya othunku ni waamini. Ti seiya sirin'anyu weettela, muhihiyaka sikina.

²⁴Nyuwo, amuhooleli oohoona! Nyuwo munnikikittha epwilimwithi nto khuyamirya etthepo.

²⁵Mootakhaliwa nyuwo awiixuttihi a ikano n'aFarisi, anawootothe, nyuwo munnirapiha ekoopho ni eparatho otaru, muhina mwaya musareiyeene itthu soonanara ni sootakhala.

²⁶Nyuwo nfarisi oohoona mpaceryeke orapiha ekoopho ni eparatho, muhina mwaya wira-tho ota waya ekhale yooreera.

²⁷Mootakhaliwa nyuwo awiixuttihi a ikano n'aFarisi, anawootothe, nyuwo munlikana ni mahiye ootteelihiwa, ota waya onooneya oreera, nto muhina mw'aya musareiye-ene makhuva a atthu akhwiye, nave n'itthu sikina soowuntta.

²⁸Siiso-tho nyuwo vamaithoni v'atthu munnisooniherya okhala ooreera murima, nto mmurimani mwanyu musareiyeene wootha n'itthu sootakhala.

²⁹Mootakhaliwa nyuwo awiixuttihi a ikano n'aFarisi, anawootothe, nyuwo munnatekela okuttha maprofeta, munnireeriha mahiye a atthu a xariya.

³⁰Nave muhimyaka wira: ?Naakhanle okathi w'axitiith'ihu, khinaiwanana ni yaawo ewiivaka maprofeta.?

³¹Siiso, nyuwo munnihimya mmansinyu okhala an'aya atthu ale aniwiiva maprofeta.

³²Vano-nto nyuwo mmaliherye muteko w'axitiith'inyu.

³³Inoowa, nloko na ivili! Muniwerya sayi otthyawa ehukhumu y'omooroni?

³⁴Tivo, kinimoorumihelani maprofeta, alipa a miruku ni awiixuttihi a ikano. Akina munoowiiva, akinaku munimwakhomela vamwiikimanyo, akina-tho munimwaamana mpa mwinyu moothukumana, ni akina-tho munimwaalupattha elapo t'ilapo,

³⁵wira yoomoreleni ephome yothene y'atthu a xariya ekhumelo ya Abeli, mpakha ephome ya Sakariya, mwaana a Parakhiya, yoole omwiivalyaanyu eriyari y'empa ya Muluku ni waltari.

³⁶Vekekhayi kinooleelani wira: Itthu iya sothene sinimwaamorela atthu ala a vano.

³⁷Yerusalemu, Yerusalemu, nyuwo muniwiiva maprofeta ni munaavonya ni maluku arummwa! Imaara ikavi siphavenly'aka waathukumanya an'inyu ntoko mwalakhu onaathukumany'awe axan'awe mmapuphani! Nto nyuwo khuhitthuna.

³⁸Tivo emp'anyu enookhala milepe.

³⁹Vekekhayi kinooleelani wira: Okhuma okathi yoola khamunkoona-tho, mpakha nihiku ninrowaanyu ohimya wira: ?Attottopeliwe owo onrwa ni nsina na Apwiya.?