Matthew 22

¹Yesu aahitthikela waalavulela atthu ni malikanyiho, iiraka:

²Omwene wa wirimu onlikana ni yoolya ya niira noothela mwene mmosa yaavahalyawe nihiku naathela mwan'awe.

³Nihiku nlo, mwene aahaaruma arumeyi awe owitthana atthu yaalattulenly'awe niira nlo. Nto awo yaahikhootta orowa.

⁴Nto aahaaruma arumeyi awe akina iiraka: ?Mwaahimeerye atthu yaalattunly'aka wira yoolya yoolikana! Inyompe saka n'inama sikina sooneneva soohitiwa. Sothene soolikana; murwe woothelani.?

⁵Nto atthu ale khiyaathokorerya, khurowa mukina omatta w'awe, mukina omwiira nakoso awe.

⁶Akina-tho yaahaavara arumeyi awo, yahaahaaxa, khuwiiva.

⁷Mwene ole aahinanariwa vanci-ene, khwaaruma anakhotto awe orowa wapwetexa anawive awo, n'upaha muttetthe aya.

⁸Numala aahahimeerya arumeyi awe wira: ?Yoolya yoolikana, nto yaalattunly'aka khiyaaphwanelenle.

⁹Murowe iphiro sinvirexiwa, mwalattulele niira nla atthu othene anrowanyu waaphwanya.?

¹⁰Arumeyi awo yaahirowa iphiro sothene, khwaathukumanya atthu othene yaaphwanny'aya, ootakhala ni ooreera murima: Siiso wothelan'iwe yaahisareya atthu oolattuliwa.

¹¹Mwene aahikela wira aawehe atthu awo yaalattuliwe, khumoona-mo mulopwana mmosa ahaawanre nlaya na voothelani,

¹²Khumukoha wira: ?Mpathani, mukenle sayi muhirina nlaya na voothelani?? Nto owo khaakhunle etthu.

¹³Nto mwene aahiwirela arumeyi awe: ?Mmutthuke mutth'ula metto ni matata, mmurihele ota, weepiphini. Weiwo onookhala wunla n'ulumanyiha maino.?

¹⁴Maana oowiihaniwa ari anci-ene, nto oothanliwa ari vakhaani.

¹⁵Nto aFarisi akhumaka vaavale, yaanikohana yaaworu enamuna yoomulupattha Yesu n'itthu sahimy'awe.

¹⁶Nto yaahaaruma awiixutti aya, vamosa n'atthu a Heroti, orowa omuhimeerya wira: Mwiixuttihi, noosuwela wira mwa mutthu a ekeekhayi ni wira munniixuttiha n'ekeekhayi ephiro ya Muluku muhimucalaka mutthu n'ikhalelo s'awe, maana khamunwehexexa makhalelo a atthu.

¹⁷Nto munihimeerye enoon'anyu, etthu y'oloka omuliva mpoosito mwene Kesari?

¹⁸Nto Yesu asuwelaka woothererya w'aya, khwiira: ?Anawootothe! Munkittehatteheryani??

¹⁹Mukooniherye musuruku wa mpoosito. Nave awo yaahimuruuhela musuruku mmosa.

²⁰Nave-tho Yesu aahaakoha wira: ?Elatarato ela va ni nsina nlempwe vaava ti nawani??

²¹Awo yaahakhula wira: ?Ti na mwene Kesari.? Nto Yesu aahiwiirela: Weeso, munvaheke mwene ekhanle ya mwene Kesari; nave munvaheke Muluku ekhanle ya Muluku.

²²Awo vaaiwaly'aya siiso, yaahitikinihiwa, yaahimuhiya owo, khurowa.

²³Nihiku nenlo-tho aSatukhi yaawo anihimya wira alipa-ookhwa khanihihimuwa, yaahimuthukumanela Yesu, khumukoha yiiraka:

²⁴?Mwiixuttihi, Monse aahiruma wira: ?Mulopwana akhwa, ahimuyanre mwaana, munn'awe amurape wira amuyarele osuulu ole okhwiiye.?

²⁵Nto yaahikhala eriyaryahu axinna atthanu n'anli: Ole oopacerya aahimuthela mwar'awe, khukhwa ahiyaranne mwaana; siiso aahimuhiyerya munn'awe muthiyan'ole.

²⁶Munn'awe owo aahikhwa ahiyanre: Nave-tho aneeraru mpakha ole aneethanu neenli.

²⁷Vakhwiiy'aya othene, nave muthiyan'owo aahikhwa.

²⁸Nto vano nihiku nin'hihimuw'aya alipa-ookhwa, muthiyan'owo onrowa okhala mwaara a wani? Maana othene aya yaahimuthela mmosa yoowo.

²⁹Yesu aahiwaakhula wira: Nyuwo munnivonya, maana khamunsuwela soolempwa, nnakhala owerya wa Muluku.

³⁰Maana atthu vanrow'aya ohihimuwa mookhwaani, khanrowa othelaka nnakhala otheliwaka anrowa olikanaka n'ankelo a Muluku wirimu.

³¹Nto mwaha w'ohihimuwa w'alipa-ookhwa, khamunasome soohimeery'aweni Muluku iiraka:

³²?Miyo ka Muluku a Aparahaamu, a Isakhi, Muluku a Yakope?? Owo kahiyo Muluku a atthu ookhwa: Muluku a atthu akumi.

³³Atthu othene yaamwiiwa, yaanitikinihiwa ni mwiixuttiho awe.

³⁴Afarisi vaaiwaly'aya wira Yesu aahamaaliha aSatukhi, yaahithukumana poromosa.

³⁵Mmosa a yaawo, aari mwiixuttihi a ikano, aphavelaka omweehererya, aahimukoha iiraka:

³⁶?Mwiixuttihi, mwa sooruma sothene yuulupalexa piivi??

³⁷Yesu aahimwaakhula wira: ?Mwaaphenteke Apwiya Muluku anyu ni murim'anyu woothene, n'iroho anyu yothene n'usuwela w'anyu woothene.?

³⁸Ela ti yooruma yuulupale ni yoopacerya.

³⁹Yooruma yanenli enlikana ni yoopacerya, t'ila: Mumphenteke mukhw'inyu ntoko siniiphent'anyu.

⁴⁰Mwa sooruma iya piili sinnikhuma ikano sothene sa Monse ni sa maprofeta.

⁴¹Afarisi nlelo ethukumanneene, Yesu aahaakoha iiraka:

⁴²Nyuwo munuupuwela wira Kristu, Mwaana a wani? Awo yaahimwaakhula wira: Mwaana a Taviti!

⁴³Yesu aahahimeerya wira: Nto exeeni Taviti asuwelihiwaka ni erooho ya Muluku onimwiihan'awe owo Pwiya? Tthiri Taviti onnihimya wira:

⁴⁴?Apwiya aahahimeerya Apwiy'aka wira kilaathini moono aka woolopwana, mpakha miyo waakuherya awanan'inyu vathi va inawu s'anyu.?

⁴⁵Vano vakhala wira Taviti onimwiitthana Kristu Pwiy'awe, onikhala sayi mwan'awe?

⁴⁶Nto khaavo aawerya omwaakhula etthu okhuma nihiku nenle, khaavo-tho aaminyalela omukoha-tho etthu.