Matthew 21

¹Okathi waahal'aya vakhaani ophiya oYerusalemu, yaahiphiya muttetthe w'opetifaxi, va Mwaako Olivera; nto Yesu aahaaruma awiixutti anli, aahimeery'aka wira:

²Muro-we muttetthe ori ohoolo w'anyu, mukelakaru munoomphwanya puuru oothiyana atthukeleliwe-ene ori ni mwaaxaan'awe, mwamutaphule mukiruuhele va.

³Akhala onrowa wookohani etthu, mmwaakhule wira: ?Apwiya tanaaphavela. Siiso owo onimoohiyeryani wakuxa.?

⁴Sothene iyo siiraneiye wira simaliheriwe iye sihimmwe ni profeta sinihimya wira:

⁵?Mulaleerye muttetthe w'oYerusalemu wira: Moone, mwene anyu onrwa wa nyuwo Owo toowiiyeviha: Onrwa amukilathenle puuru oothiyana mwaaxaana a puuru ontexa miritti.?

⁶Awiixutti yaahirowa, khwiira siisaale ntoko Yesu saarumaly'awe.

⁷Awo yaahimuruuha puuru'uwo ni mwaaxan'awe khwaatala ikuwo s'aya vasulu va puur'uwo, Yesu khumukilaathela.

⁸Muttitthi w'atthu waamutthara ottuli waanatala ikuwo s'aya mphironi ni akina yaninta makhukhu, khiyaatalela mphironi.

⁹Atthu othene ale yaarowa ohoolo n'ale yamutthara ottuli yaanikhuwela yiiraka: Avuwiihiwe Mwaana a Taviti! Attottopeliwe owo onrwa wa nsina n'Apwiya! Avuwiihiwe Muluku wirimu!

¹⁰Yesu akelaka oYerusalemu, atthu othene a mmuttettheni yaaheekeseya, yanikohana wira: Ola ti pani?

¹¹Muttitthi owo wanaakhula wira: ?Ola Yesu, profeta onikhuma oNasareti w'oKalileya!?

¹²Numala Yesu aahikela mpaani mwa Muluku khupacerya owoomola atthu othene yaattumiha ni yaatthuma mpaani memmo. Owo aahipittula meesa a atthu yaakakhanya musurukhu ni minyukhu saalipa yaatumiha ipompa.

¹³Nto aahahimeerya wira: Muluku oohimya mwa soolempwa wira: Emp'aka, enimwiitthaniwa empa ya mavekelo. Vano nyuwo mookhaliha nikhuku n'anawiiye.

¹⁴Alipa oohoona n'ale oorakala yaahirowa okhumana ni Yesu mpaani mwa Muluku, nave owo aahaapenuxa

¹⁵Makhulupale a anamukuttho ni awiixuttihi a ikano yaahinanariwa vanci-ene okathi voonaly'aya mitikiniho siiraawe Yesu ni vawiiw'aya axinamwane ekhuwelaka mpaani mwa Muluku yiiraka: ?Avuwihiwe Mwaana a Taviti.?

¹⁶Tivo awo yaahimukoha wira: Munniiwa ala sinihimy'aya. Yesu aahiira: Ayo kinniiwa, nto owo aahitthikela waakoha iiraka: ?Khi nyuwo khamunasome soolempwa wira: Wa masu a anamwane aneetta n'ale a mmatatani mooruuha nttottopelo noomalela??

¹⁷Numala olavula, owo aahikhuma muttetthe ole, khurowa oPetaniya khukhala weiwo ohiyu w'othene.

¹⁸Vaaxiiy'aya, ahokolowelaka oYerusalemu, Yesu aahivoliwa etala.

¹⁹Voonaly'awe mwiri wa mpheera waattamenle mphironi, owo aahattamela mwiri uwo, nave khuhiphwanya etthu, owo waari makukhuru paahi. Nto aahiirela mwiri uwo wira: ?We khuniima-tho mihokorokho!? Naanaanoru mwiri ule waahuuma.

²⁰Awiixutti yoonaka siisaale, yaahitikinihiwa yiiraka: ?Mwiri ula wa mpheera wuumale sayi naanaanoru??

²¹Yesu aahiwaakhula wira: ?Mwakhalana waamini ni muhihoveryaka, kahiyo munrowa owerya wira ele yiirihiwe mwiri ula paahi nto, hata, mwiirela mwak'ole wira: ?Wiiphele-vo wirihele mphareya? siiso vanimwiiraneya.

²²Nave sothene sinrowaanyu oveka mmavekeloni mwaaminiki munoovahiwa.

²³Yesu aahikela mpaani mwa Muluku khupacerya owiixuttiha atthu. Okathi yoowo makhulupale a anamukuttho ni makhulupale aYuta yaahimwaattamela, khumukoha wira: Owerya xeeni oniirananyu itthu iya? Ni oovahaleni owerya iwo t'ani?

²⁴Yesu aahiwaakhula wira: ?Ni miyo kinimookohani etthu emosa paahi. Nave mwakaakhularu, ni miyo-tho kinimooleelani owerya oniiran'aka itthu iya.

²⁵Opatiso wa Yohani waakhumme vayi? Wa Muluku wala w'atthu?? Awo evaanelaka yaaworu yaanihimya wira: ?Namwaakhularu wira waakhumme wa Muluku, owo onoonikoha wira: Weeso mwahaamwaninelani??

²⁶Nave-tho namwaakhularu wira waakhumme w'atthu, onoopiha muttitthi w'atthu, okhala wira othene annisuwela wira Yohani profeta.

²⁷Siiso yaahimwaakula Yesu wira: Khanisuwenle. Yesu aahahimeerya wira: ?Ni miyo-tho nkinooleelani owerya oniiran'aka itthu iya.?

²⁸Nto munoona sayi? Aahikhala mulopwana mmosa aarina an'awe anli. Nto aahimwirela mwaana muulupale wira: ?Mwan'aka, olelo murowe mwavare muteko omatta waka?

²⁹Owo aahaakhula iiraka: ?Nkintthuna.? Nto vaahanly'awe aahirukunuxa murima khurowa-wo.

³⁰Tiithi ule aahimwiihana mwan'awe ole mukina, khumuhimeerya etthu emosa-ru. Owo aahaakhula wira: Koovenya-va tiithi! Nto khuhirowa-wo.

³¹Wa an'awe ale anli tuuvi iinre yaatthun'awe tiithi aya? Awo yaahaakhula wira: ?Tuule oopacerya.? Yesu aahahimeerya wira: Kinoohimeeryani wira: Atthu ooliviha mpoosito ni anamuttompe animooholelani, epacerye okela moomweneni mwa Muluku.

³²Maana Yohani aahirwa variyari v'anyu woothoonyerani ephiro ya xariya, nto nyuwo khuhimwaamini, nto alipa ooliviha mpoosito n'anamuttompe t'amwaaminni. Nto nyuwo hata monneene itthu iya, khamurukununxe murima wira mmwaamini.

³³Mwiiwe nlikanyiho nla nikina. Aahikhala mulopwana mmosa mwaneene etthoko aarina ematt'awe. Owo aahiphatteya mmatta-mmo miri sa evitera, aahitekela mukuso mukherekhere alikanyihaka nipuro noowama mihokorokho, aahiteka-tho empa yoorupelela. Aahaahiyerya anamuteko ematt'eyo wira elimeke: Numala aahirowa mukhwah'awe.

³⁴Vaaphiyayaly'aya okathi woohepha, aahaaruma arumeyi awe orowa w'anamuteko ale wira yaakhele mihokorokho saari s'awe.

³⁵Nto anamuteko awo yaahaavara arumeyi ale: Mukina yaahimmana, mukina yaahimwiiva, mukina-tho yaahinvonyakasa ni maluku.

³⁶Mwaneene ematta aahaaruma-tho arumeyi akina oowaatta wavikana ale oopacerya: Anamuteko awo yaahiwiriha ntoko saawirihaly'aya ale oopacerya.

³⁷Wokiseryani, aahaarumihela mwan'awe, ahimyaka wira: ?Mwan'ak'ola anomuttittimiha!?

³⁸Nto anamuteko ale, vamoonalyaya mwan'awe owo, yaahihimeeryana wira: Ola t'unrowa ohalana itthu sa tiithi awe. Nrowe nimwiive, soohiyeriwa sawe sikhale sawihu!

³⁹Nto awo yaahinvara, khumpurulela ota weematta, khumwiiva.

⁴⁰Vano aarwaaka mwaneene ematta, ontthuna owiriha exeeni anamuteko ale?

⁴¹Awo yaahimwaakhula yiiraka: Owo onoowiiva vowoopiha-vo atakhali awo, nave onimwaahiyerya ematt'awe anamuteko akina, antthuna onvaha mihokorokho okathi aya.

⁴²Numala Yesu aahahimeerya wira: Nyuwo khamunasome Soolempwa sinihimya wira: ?Nluku alipa-ooteka empa naakhoottaly'aya nookhalihiwa nluku noolipiha emp'eyo. Eyo epaken'ye n'uwerya w'Apwiya, ni eyo ti yootikiniha vamaithoni vahu??

⁴³Nto tivo kinooleelani wira: Munimwakhiwa omweene wa Muluku. Anoovahiwa atthu anloko nikina, antthuna wiimiha mihokorokho s'omwene yoola.

⁴⁴Nto ole onimorela nluku nla onimuntakaseya: Ole onrowa omoreliwa nluku nla onoonyakattiwa.

⁴⁵Makhulupale a anamukuttho n'aFarisi, vaaiwaly'aya malikanyiho ala, yaahisuwela oratta-ene wira Yesu aahimya yaawo.

⁴⁶Siiso, yaaniphavela onvara: Nto yaaniwoova atthu, okhala wira yaanisuwela wira Yesu profet'aya.