Matthew 20

¹Yesu aahihimya nlikanyiho nla iiraka: ?Omwene wa wirimu onlikana ni mutthu aakhumme vaasiisu-ene arowaka waaphavela anamuteko oomatta w'awe.

²Owo aahiiwanana n'awo waaliva enoota emosa, esisapo ya nihiku, khwaruma orowa omatta w'awe.

³Naakhumaly'aya nsuwa, aahirowa-tho waaphavela akinaku yaakilanthe vapuwani, ehivaraka etthu.

⁴Khwahimeerya wira: ?Ni nyuwo-tho murowe omatta waka mwavare muteko aka, kinimoolivani enoophwanelani, nave awo yaahirowa.?

⁵Mulopwan'ole aahivenya-tho othana eriyari ni okathi wa makaaripi owiihana-tho akina.

⁶Nave-tho makaripi-ene, nihalaka okela nsuwa aahaaphwanya akina ehiiraka etthu, khwakoha wira: ?Exeeni mukhalaka va nihiku noothe-ene, muhivaraka etthu?

⁷Atthu ale yaahaakhula wira: ?Maana khaavo anivan'he muteko.? Nto mwanene ematta aahiwirela wira: Weeso ni nyuwo rowani omatta waka nave munimwaakhela enoophwanelani.

⁸Okathi wa makaaripi, aahimuruma namuteko awe muulupale wira: ?Mwawiihane anamuteko, mwaalive mwaapaceryaka ale akisenrye orowa mpakha ale oopacerya.?

⁹Atthu ale yaaihaniwe nsuwa nihaleelaka okela khula mmosa aahaakhela enoota emosa esisapo ya nihiku nootheene.

¹⁰Nto vaaphiyaly'aya okathi w'ale yaapacenre orowa omatta, yaanaanyiherya wira yaarowa waakhela musuruku munci-ene. Nave n'awo-tho, khula mmosa aahaakhela enoota emosa esisapo ya nihiku.

¹¹Awo vaakhenly'aya siiso, yaahipacerya omwaapa mwaneene ematta yiiraka:

¹²?Atthu ala ookiserya avanre okathi mmosa paahi nto nyuwo munalikanyiha waaliva ni hiyo nivanre nihiku nootheene, ni nihaawale n'uviha wa nsuwa!?

¹³Mwaneene ematta aahimwaakhula mmosa wa yaawo iiraka: Mpatthani, nkiwotontheni! Kahiyo esisapo ya nihiku yaiwananny'ahu?

¹⁴Mukuxe ekhanle yaw'inyu, murowe. Miyo kintthuna onvaha yoole ookiserya ophiya ntoko kinoovahakani nyuwo.

¹⁵Miyo nkirina ehakhi yoowiira etthu entthu'naka ni etthu aka? Wala miyo okhala mutthu ooreera murima etthu yoonanara vamaithoni v'anyu?

¹⁶Yesu aahimaliherya iiraka: Siiso ale ookiserya anookhala oopacerya, n'ale oopacerya anookhala ookiserya, maana anci-ene ahiihaniwa nto oothanliwa ari vakhaani.

¹⁷Arowaka oYerusalemu, Yesu aahaathukumanya awiixutti muloko nanli wiiphiini, khwaahimeerya wira:

¹⁸?Mwiiwe! Va ninrowa oYerusalemu, weiwo Mwaana a Mutthu onrow'awe ovahereriwa makhulupale a anamukuttho n'awiixuttihi a ikano. Awo anrowa omulamula wira iiviwe.

¹⁹Anonvahererya wa amalapo wira enveehe yoowo, ni emmane ni ohoolo waya emukhomele, vamwiikimanyo. Nto mmurottoni mwaya onoohihimuwa mookhwaani.?

²⁰Okathi uwo mwaara a Sepeteu aari naan'awe aahimwaattamela Yesu, khukokhora ohoolo wawe wira anvekele etthu.

²¹Yesu aahimukoha wira: ?Mumphavelani?? Owo aahimwaakhula wira: ?Kimphavela wira an'ak'ala anli yakilaathi mukina moono anyu woolopwana mukina moono anyu w'othiyana, moomweneni mw'anyu.?

²²Nto Yesu aahiwaakhula wira: ?Nyuwo khamunsuwela etthu envek'anyu. Nyuwo munoowerya ohaawa weiwo miyo kinrow'aka ohaawa? Awo yaahimwaakhula yiiraka: ?Ayo, nnoowerya.?

²³Yesu aahahimeerya wira: ?Tthiri munoowurerya ohaawa weiwo miyo kinrow'aka ohaawa, nto okilaathi moono aka woolopwana wala woothiyana, nkihiyo miyo kiniwiirelani, Atiithi t'aniwiirela ale yaathanlaly'aya.?

²⁴Awiixutti akina muloko yiiwakaru mwah'ole, awo yaahaaviruwela axinna ale anli.

²⁵Nto Yesu aahaathukumanya othene, khwaahimeerya wira: Ntoko sinsuwel'anyu mamwene a mulaponi-mu annaruma atthu ntoko t'awaya; makhulupale annaahaaxa atthu n'uwerya w'aya.

²⁶Nto wa nyuwo vahiiraneye siiso: Ohiya-vo ole ontthuna okhala muulupale variyari v'anyu, akhale tonoorumeelani.

²⁷Ni ole omphavela okhala oopacerya variyari v'anyu, aakhale murumeyi anyu.

²⁸Hata Mwaana a Mutthu khaarwenle orumeeliwa; orwenle warumeela atthu ni oleva ekumi awe, wira awoopole atthu anci-ene.

²⁹Ekhumakaru oYerikho, muttitthi muulupale w'atthu wahimutthara Yesu.

³⁰Nto alopwana anli oohoona, yakilanthe mukherekhere mw'ephiro, vaaiwaly'aya wira Yesu t'avira, yaahipacerya okhuwela yiiraka: Pwiya! Mwaana a Taviti, munimorele ikharari!

³¹Atthu yaanapwapwela, yaamaalihaka: Nto awo nlelo yaamutepa okhuwela yiiraka: Pwiya, Mwaana a Taviti, munimorele ikharari!

³²Nto Yesu aaheemela, khuwiihana nto khwaakoha wira: Nyuwo mumphavela wira kiwiireleni exeeni?

³³Nave awo yaahaakhula wira: Pwiya, nintthuna wira maitho ahu etthukuwe.

³⁴Yesu aahimoriwa ikharari, aahikwannya maitho aya. Naanaanoru atthu ale yaahipacerya woona, khumutthara Yesu.