Matthew 19

¹Okathi Yesu vaamanly'awe olavula myaha seiya, aahivenya oKalileya arowaka muttetthe w'oYuteya wa ekhopela ya muro Yortani.

²Muttitthi w'atthu waanimutthara, nave weiwo ahaapenuxa aretta.

³Afarisi akina yaahirowa okumana ni Yesu, enamweehererya emukohaka wira: ?Vannireerela mulopwana omwalana ni mwaar'awe mwaha w'etthu p'itthu?

⁴Yesu aahaakhula wira: ?Nyuwo mosoma khuluwi wira woopaceryani Muluku, aapattuxaka atthu, aampakale mulopwana ni muthiyana?,

⁵Tivo, mulopwana onimwaahiya atiithi awe n'ame awe, wira aphitaane ni mwaar'awe, ni oowanli aya enakhala mutthu mmosa paahi.

⁶Siiso awo kahiyo-tho atthu anli: Ari mutthu mmosa paahi. Tivo, ele Muluku ephitanyaly'awe, mutthu ahimwalanyihe.

⁷Nto awo yaahimukoha-tho wira: ?Xeeni Monse ohalaka oruma wira avahiweke epaphelo y'omwalana ni khuyamwalana?

⁸Nto Yesu aahiwaakhula wira: ?Mwaha w'olipa w'anyu murima Monse tootthunihenry'aweni omwalana n'axaar'inyu. Nto w'opaceryani khaviiriwa siiso.

⁹Nto miyo kinooleelani wira: ?Mulopwana onimwalana ni mwaar'awe, ohikhanle mwaha wa mararuwo, anamuthela mukina onooraruwa.?

¹⁰Awiixutti awe yaahimuhimeerya wira: ?Wakhala siiso mukhalelo wa mulopwana n'amwaar'awe, fataari ohithela.?

¹¹Yesu aahiwaakhula iiraka: ?Kahiyo atthu othene t'anwerya wiiwa ni weettela masu ala, nto yaale paahi avahiwe ni Muluku.

¹²Sihaavo ixariya soowaatta sa mwaha ola: Akhala atthu akina oohuliwa, maana ayariwe siiso, aakhala-tho akina oohuliwa maana ahononiwe n'atthu; akhala-tho oohuliwa votthuna waya mwaha w'omwene wa wirimu. Ole ontthuna osuwela iya, asuweleke.?

¹³Nto aahiruuheliwa anamwane akina wira awiixaatherye matata ni waavekelela nto awiixutti awe yaanaapwapwela.

¹⁴Nto Yesu aahahimeerya wira: Mwahiye anamwane ekirwele miyo! Muhaakhottiherye maana omwene wa wirimu ti waw'aya.

¹⁵Vaamanly'awe owiixaatherya matata, aahivenya vale.

¹⁶Okathi yoowo mmiravo mmosa aahimwaattamela Yesu khumukoha wira: Mwiixuttihi ooreera murima kiireke-ni wira kiphwanye ekumi ehinimala?

¹⁷Nto Yesu aahimwaakhula wira: Munikiirelelani ooreera murima? Khaavo ooreera murima ohikhanle mmosa paahi ori Muluku. Tivo, mwaatthunaka okela mweekumini, mweetteleke sooruma.

¹⁸Nto owo aahimukoha Yesu wira: ?Sooruma xeeni?? Nto Yesu aahimwaakhula iiraka: Muhimwiive mutthu, muhiraruwe, muhiiye, muhimootherye mutthu;

¹⁹mwaattittimihe Atiith'inyu n'ame anyu, mwaaphenteke akhw'inyu ntoko siniiphent'anyu.

²⁰Nto mmirav'owo aahaakhula wira: Sothene iyo kinneettela okhuma emiravo aka, enikihaleela-tho exeeni?

²¹Yesu aahimuhimeerya-tho wira: ?Mwaatthunaka okhala ooreera murima voomalela, murowe mwatumihe sothene sirin'anyu: Musurukhu ene mwaavahe atthu oohaawa. Siiso munookhalana muhakhu wirimu. Numala murwe, mukitthareke.?

²²Mmiravo vaaiwaly'awe moolumo ala, aahirowa ariipiwe-ene murima, maana owo ari tthaciri muulupale.

²³Nto Yesu aahahimeerya awiixutti awe wira: Veekeekhayi orikarika thaaciri okela Moomweneni wa Wirimu.

²⁴Kinooleelani-tho wira: Tivokhweya ekamelo ovolowa va mwiitheni vaakwiya, vahikhanle thaaciri okela Moomweneni wa Wirimu.

²⁵Awiixutti vaaiwalyaya siiso, yaahitikinihiwa vanci-ene, kwiira: ?Siiso nto anwerya woopowa t'ani?

²⁶Nto Yesu aahaawehexexa awiixutti awo khwahimeerya wira: ?Vekekhayi etthu ila atthu annooceela; nto Muluku sothene khiivo enoocel'awe.?

²⁷Nto Petru aahilavula iiraka: Moone, hiyo va noohiya itthu sothene, wira nikhale awiixutti anyu. Ninrowa ophwanya ni?

²⁸Yesu aahaakhula iiraka: Kinooleelani ekhweeli wira: Nyuwo munkitthara miyo nihiku n'olumwenku musya, okathi Mwaana a Mutthu onrow'awe okilathi veehiceni vawe yoovuwa ni nyuwo-tho munookilaathi vasulu va ihice muloko ni piili wira mulamule mahimo muloko ni manli a Isarayeli.

²⁹Nave othene ale anihiya emp'aya wala axinn'aya, n'axirokor'aya, n'atiithi aya n'ame aya n'amwaar'aya n'an'aya ni immatta saya mwaha wa miyo animwakhela-tho vanci-ene nave-tho anoophwanya ekumi ehinimala.

³⁰Atthu anci-ene ari oopacerya, anookhala ookiserya: N'ale ari ookiserya anookhala oopacerya.