Matthew 18

¹Okathi uwo, awiixutti yaahimwaattamela Yesu khumukoha wira: T'ani ori muulupale Moomweneni wa Wirimu?

²Yesu aahimwiihana mwanamwane mmosa khumweemexa variyari v'aya.

³Khwiira: Vekeekhayi kinooleelani wira mwaahirukunuxe mirima s'anyu, ni mwaahikhale ntoko anamwane khamunkela Moomweneni wa Wirimu.

⁴Tivo, ole oniiyeviha aikhalihaka ntoko mwanamwane ola, owo tukhanle muulupalexa Moomweneni wa Wirimu.

⁵Nave ole onimwaakhela mwanamwane ntok'ola mwa nsina naka onikaakhela miyo.

⁶Yesu aahihimya-tho wira: Akhala mutthu ontthuna omutthekiha mmosa w'axikhaani ala anikaamini miyo, Fataari, atthukeleliwe nxilo nuulupale muxikoni, ariheliwe mphareya eriyari.

⁷Wootakhaliwa olumwenku mwaha wa sootthekiha, maana vannitthuneya wira sikhale sinatthekiha atthu. Nto ootakhaliwa t'ule onaatthekiha akhw'awe.

⁸Nto wakhala wira ntata n'anyu wala nnawu n'anyu nnimootthekihani, mwiikitthe, murihele ottai-wene, onnoreerelani okela mweekumini murakanle-ene, wala mututhunyaka, ohikhanle oriheliwa omooroni ohinttipha, mukhalanne-ene matata oomanli, wala inawu soopiili.

⁹Siiso-tho niitho nanyu nootthekihani, musyoole murihele ottaiwene, onnoreerelani okela mwekumini ehinimala, mukhalanne-ene niitho nimosa paahi ohikhanle oriheliwa omooroni ohinimala, mukhalanne-ene maitho oomanli.

¹⁰Mwiipasoope! Muhimuthanye nnakhala mmosa a axikhani ala! Tthiri miyo kinoohimeeryani wira: Ankelo aya anikhala ohoolo w'Atiithi ari wirimu annawehaweha mahiku othene.

¹¹Maana Mwaana a Mutthu orweenle oowoopola atthu yaarimeenle.

¹²Nyuwo munoona sayi? Mutthu akhalana ipwittipwitthi miloko muloko, ni khurimeela emosa, khino khanihiya iye sikina miloko mithanu na mixexe ni thanu na xexe mmathalani khiyarowa ophavela ele erimeenle?

¹³Kinooleelani ekhweeli wira: Aphwanya vale onootteeliwa murima mwaha w'emosa yeeyo ovikana iye sikina sothene sahaarimeenle.

¹⁴Siiso-tho kahiyo otthuna w'atith'inyu ari wirimu wira arimeele nnaakhala mmosa aaxikhaani ala.

¹⁵Vano munn'inyu ootthekelani, murowe mwakumanane, nyuwo n'uwo paahi mmoniherye yoonanara-eyo, awiiwani momutthikiherya mun'inyu ephiro yooreera.

¹⁶Nto aahitthune owiiwani, mmuroihele mutthu mukina wala atthu anli wira mulattu anyu ophukiwe ohoolo w'anamoona anli wala araru.

¹⁷Nave aahitthune owiiwelela atthu awo mwaahimeerye atthu a oKerexa, n'awo tho aahitthune owiiwelela mmukhalihe ntoko mmalapo ni mulipa-oottheka.

¹⁸V'ekeekhayi kinnoohimeeryani wira: Iye sothene sinnrow'anyu otthuka vathi-va, wirimu sinootthukiwa, ni sothene sinrow'anyu otaphula vathi-va, wirimu sinootaphuliwa.

¹⁹Nave-tho kinnohimeeryani wira yakhala atthu anli a nyuwo khwaakhulelihana vathi va waavekela etthu p'itthu Atiithi aka ari wirimu Awo animoovahani.

²⁰Maana nipuro ninthukuman'aya atthu anli wala araru, wa nsina naka, miyo kiri eriyari aya.

²¹Vano Petru aahimwaattamela Yesu, khumukoha wira: ?Pwiya, mukhw'aka akitthekela, kimuleveleleke vakavi?? Mpakha vathanu na vanli?

²²Yesu aahimwaakhula iiraka: ?Kahiyo vathanu na venli paahi. Nto mmuleveleleke imara sothene!?

²³Tivo omwene wa wirimu onlikana ni mwene mmosa, aatthunne olokiha saakophihaly'awe arumeyi awe.

²⁴Okathi vapacenry'awe waalokiha, aahirwa murumeyi mmosa aamukophenle musurukhu munci-ene.

²⁵Mulopwan'owo khaarina musurukhu, mwene owo aahiruma wira atumihiwe owo n'amwar'awe naan'awe n'itthu sothene saarin'awe wira alive saakophaly'awe.

²⁶Murumeyi owo ahikokhora ohoolo wa Pwiy'awe, khunvekela iiraka: ?Xontte! Mukivilele, kinimoolivani sothene.?

²⁷Nto Pwiy'owo aahimoonela othunku, aahimulevelela saakophaly'awe.

²⁸Nto murumeyi yoowo, akhumakaru-vo, aahimphwanya murumeyi mukhw'awe aamukophenle musuruku musurukhu emiya emosa wa eparatha. Aahinvara exiko, anamphinyaka mmilo, amwiirelaka: Mukilive sikikophenly'anyu!

²⁹Mmpatthani awe ole aahimukokhorela ohoolo w'awe khunvekela iiraka: ?Xontte! Mukivilele, miyo kinimoolivani sothene.?

³⁰Nto owo khaatthunne onvilela. Vano-nto aahimutthukeliha mukhatteya, mpakha omuliva saamukophenly'awe.

³¹Okathi arumeyi akhw'awe voonaly'aya etthu ile yiraneiye, yaahiriipiwa murima vanci-ene, khurowa omuleela mwene sothene iye saakhumelenle.

³²Nto pwiya aahimwihaniha murumeyi uwo, khumuhimeerya wira: ?Nyuwo mwa murumeyi ootakhala! Miyo kihoolevelelani sokopha sothene saakikophenlyanyu, maana mwahikivarela metto.

³³Nyuwo khimwakhanle oommorela ikharari mukhw'inyu siiso ntoko miyo koomorenlyakani nyuwo??

³⁴Pwiy'awe owo aahinanariwa vanci-ene, aahinvahererya murumeyi ule, w'alipa oohaaxa, wira amulive saamukophenly'awe sothene. Aahaavahererya alipa oohaaxa.

³⁵Ti siiso Atiithi aka ari wirimu anrow'aya omwiiriha khula mmosa a nyuwo aahileveleleke soottheka sa mukhw'awe ni murim'anyu woothene.