Matthew 17

¹Numala mahiku mathanu na mosa, Yesu aahimukuxa Petru ni Yakopo ni Yohani munn'awe Yakopo, khwaarowana yaawo-ru vamwaako woorekamexa.

²Yesu aahirukunuxa mukhalelo awe ohoolo waya. Owitho w'awe wanaarya ntoko nsuwa, ikuwo s'awe saahitteela, ntoko muthuko.

³Okathi yoowo aahaakhumelela Monse n'Eliya enalavula ni Yoowo.

⁴Petru aahimuhimeerya Yesu wira: ?Pwiya, vaanireerela hiyo okhalaka vaava. Mwatthuna, nnooteka iheema tthaaru: Emosa yaw'inyu, ekina ya Monse, n'ekina y'Eliya.?

⁵Nlelo owo alavulaka siiso, naahirwa neeku noowaarya, khwaakhuneela. Nave muneekuni mmo naahiiwanyeya nsu, naahimya wira: Ola Mwan'aka onimphent'aka. Yoola t'okisivelaxa. Mmwiiweleleke yoola!

⁶Vaiwalyaya nsu nla, awiixutti ale yahoova vanci-ene, khwipopheela vathi.

⁷Nto Yesu aahiwaattamela, khwaakwannya aahimeeryaka wira: Nvenye! Muhoove!

⁸Vaatthukunly'aya maitho, khiyamonne-tho mutthu mukina, ahikhanle Yesu paahi.

⁹Vano ekhuruwaka vamwaako, Yesu aahaalopola iiraka: Muhimulele mutthu etthu yoonaly'anyu, Mwaana a Mutthu ahinatthi ohihimuwa mookhwaani.

¹⁰Vano awiixutti yaahimukoha yiiraka: Awiixuttihi a ikano anihimyera-ni wira Eliya t'ompacerya orwa?

¹¹Yesu aahiwaakhula wira: Tthiri Eliya onimoorwa wira areherye sothene.

¹²Ni kinooleelani-tho wira Eliya ohoorwa, nto khuhisuweliwa. Atthu yaahimwiiriha sothene saatthun'aya. Siiso-tho awo anomwiiva Mwaana a Mutthu.

¹³Nto awiixutti yaahisuwela wira Yesu aamuhimya Yohani Mpatisa.

¹⁴Vaaphiyalyaya vaathukumanne atthu, mulopwana mmosa aahimwaattamela Yesu khukokhora ohoolo w'awe, khumuhimeerya wira:

¹⁵?Pwiya, mummorele ikharari mwan'aka mwamulopwana onkhwa ecile. Nave owo onnihaawa vanci-ene; imaara sinci-ene onnimorela vamooroni, ni imaara sikina onnimorela mmaasini?;

¹⁶kahaaruuhela awiixutti anyu, nto Khuhiwerya ompenuxa.

¹⁷Yesu aahaakhula iiraka: Nyuwo, nloko nohaamini ni nootakhala murima! Kinrowa okhala ni nyuwo mpakha silini? Mukiruuhele mwaan'owo va.

¹⁸Yesu aahipwapwela munepa wootakhala, naanaanoru owo waahimuhiya mwaan'owo. Okathi ene yoowo mwanamwane aahipenuwa

¹⁹Nto awiixutti yaahimwaattamela Yesu khuyamukoha wiphiini yiiraka: Exeeni hiyo nihiweryaka woomola munepa wootakhala ole?

²⁰Yesu aahiwaakhula iiraka: Mwaha wo waamini wanyu vakhaani. Kinooleelani ekhweeli wira: Mwaarina waamini ntoko enuku yamukhaanixa, mwamwirelaka mwak'ola wira: ?Okhume vo, orowe iwe. Mwak'owo waamukhuma. Khiivo mwaarow'anyu wooceelaka.

²¹Nto munepa wootakhala ntok'ole, onkhuma ni ovekela n'utthuka paahi.?

²²Nlelo aryeene oKalileiya, Yesu aahahimeerya wira: ?Mwaana a Mutthu onoorowa ovahereriwa mmatatani mw'atthu.

²³Awo anoomwiiva, nto mmurottoni mw'aya onoohihimuwa mookhwaani.? Ni moolumo ala, awiixutti wahaariipa murima vanci-ene.

²⁴Okathi Yesu n'awiixutti yaaphiyaly'aya oKafarnawu, alipa-ooliviha mpoosito w'empa ya Muluku yaahimwaattamela Petru, khumukoha wira: ?Mwiixuttihi anyu khanliva mpoosito??

²⁵Petru aahaakhula wira: Onniliva! Ehalaka ophiya owaani, Yesu ahiipacerya omukoha Petru wira: Simoni, munoona sayi? Mamwene a mulaponi-mu anliviha mpoosito wala muulutha waawani? Anaakhela w'atthu aya wala wamalapo?

²⁶Petru aahaakhula iiraka: W'amalapo. Naanaanoru Yesu aahimuhimeerya wira: Atthu aya khamphwanela oliva.

²⁷Vano-nto wira atthu ale nihaatthekihe murowe orattani, mwamurihele coolo mmaasini. Ehopa empaceryanyu olowa, nvare, mwaathamihe. Mwaano mw'aya munoophwanya musurukhu, mukuxe mwalive mpoosito aka ni waw'inyu.