Matthew 16

¹Afarisi n'aSatukhi yaahimwaattamela Yesu. Ephavelaka omweehererya, awo yaahinvekela wira awooniherye ethoonyeryo enkhuma wa Muluku.

²Nto Yesu aahiwaakhula wira: ?Nsuwa nikelaka nyuwo munnihimya wira wirimu khureere oxeerya-wo: Meelo nihiku nooreera.?

³Vasiisu munnihimya wira: Olelo enoorupa epula, maana wirimu khureere oxeerya n'uripa-wo anawoothe nyuwo munsuwela otaphulela makhalelo oosulu, nto nyuwo muhinsuwela sayi otaphulela ithonyeryo sa makhalelo ookathi ula?

⁴Atthu ootakhala murima ni ooraruwa, annivekela ethonyeryo. Nto khanvahiwa ethonyeryo ekina, ehikhanle ethonyeryo ya profeta Yona. Ahimyakaru siiso, aahaahiya, khurowa.

⁵Okathi awiixutti valapuwelaya ekhopela ekina, yaahiliyala okuxa mikatthe

⁶Yesu aahahimeerya wira: ?Mwiipasoope saana ni miropo sa maFarisi ni sa maSatukhi?

⁷Awiixutti yaahipacerya waapelana yiiraka: ?Ola onlavulela siiso okhala wira khinruuhale mikatthe.?

⁸Nto Yesu asuwelaka saapelan'aya, aahiira: Nyuwo atthu oowaamini vakhaani, munaapelanani mwiiraka khiniruuhale mikatthe?

⁹Nlelo nyuwo khamunsuwela, hata khamunuupuwela, wa mikatthe thanu saavahiwe atthu imiya miloko mithanu ni ittanka ikavi sa mapattuxa saasarihaly'anyu?

¹⁰Khamunuupuwela-tho mikatthe iye thanu na piili saavonin'he atthu imiya miloko mixexe (4000) n'ittanka ikavi sa mapattuxa sasarihaly'anyu?

¹¹Nto muhinsuwela sayi wira miyo nkohimeenryeni mikatthe nto kiirale: Mwipasoope ni miropo sa aFarisi ni sa aSatukhi.

¹²Nto awiixutti yaahisuwela wira Yesu khawirenle wiipasoopa ni miropo sa mikatthe aawiirenle wiipasoopa ni miixuttiho sa aFarisi ni sa aSatukhi.

¹³Yesu aahiphiya muttetthe w'oKesareya wa oFilipe. Weiwo aahaakoha awiixutti awe wira: Atthu anihimya wira Mwaana a Mutthu ti pani?

¹⁴Awo yaahaakhula wira: ?Aakhala anihimya wira ti Yohani Mpatisa, akina anira t'Eliya, akina-tho anira ti Yeremiya, wala mwa mmosa a maprofeta.

¹⁵Yesu aahaakoha-tho wira: ?Ankhi nyuwo, munihimya wira miyo ka pani??

¹⁶Simoni Petru aahimwaakhula wira: Nyuwo mwa Kristu, Mwaana a Muluku a ekumi.

¹⁷Nto Yesu aahimuhimeerya Petru wira: Ooreeriwa ti nyuwo Simoni, mwaana a Yona, okhala wira kahiyo mutthu a vathi oosuwelinn'heni siiso; Atiithi ari wirimu t'osuwelin'heni.

¹⁸Nto miyo kinooleelani-tho wira nyuwo mwa Petru, vanluku nenla kinooteka vo Ekerex'aka. Vaavo owerya w'okhwa onimooceela opwetexa Ekerexa-eyo.

¹⁹Miyo kinimoovahani mihulelo s'omwene wa wirimu; etthu p'itthu enrow'anyu otthuka vathi-va, enookhala yootthukeya wirimu, ni etthu p'itthu enrow'anyu otthukula vathi-va, enookhala yootthukuliwa wirimu.

²⁰Nto aahaakhottiherya awiixutti omuleela mutthu wira owo ti Kristu.

²¹Okhuma vaavo, Yesu aahipacerya waaleela awiixutti awe wira: Kihaana orowa oYerusalemu, kihaana ohaawa itthu sinci-ene, sa mahumu, ni makhulupale a anamukuttho ni s'awiixuttihi a ikano kihaana wiiviwa n'uhihimuwa mookhwaani mmurottoni mwaya.

²²Nto Petru aahimurowana wiiphini, khupacerya onvaanyiha iiraka: Pwiya! Muluku khanootthuniheryeni iyo. Etthu iyo khinookhumelelani!

²³Nto Yesu aahirukunuwa khunweha Petru ni khumwiirela wira: Khumani ohoolo waka Satana, nyuwo mwa ekwathula eri ohoolo waka, maana khamunsuwela itthu sa Muluku, munsuwela itthu s'atthu paahi.

²⁴Numala, Yesu aahahimeerya awiixutti awe wira: Akhala mutthu ontthuna okitthara, aikhootte mwaneene ni akapatteke mwiikimanyo awe akitthareke.

²⁵Vekeekhayi ole ontthuna woopola ekumi awe, enoomurimeela; nto ole ompweteiwa ekumi awe mwaha wa miyo, onoophwanya-tho.

²⁶Mutthu omphwanyani waakhela olumenku wothene, ekumi awe erowaka opweteya? Wala ontthuna ovaha exeeni wira ahokoloxeriwe ekumi awe?

²⁷Maana Mwaana a Mutthu onimoorwa n'ankelo awe munttittimihoni mw'Atiithi awe, nto owo ononvaha khula mutthu ntoko simphwanel'aya miteko sawe.

²⁸Kinooleelani ekhweeli wira: ?Aakhala vaava ahinrowa okhwa, ehimoonne toko Mwaana a Mutthu arwaaka mmeekuni mw'awe.?