Mark 2

¹Vaaviraly'aya mahiku vakhaani, Yesu aahihokolowela oKafarnawu. Vaasuweliw'aya wira owo aari owaani,

²yaahithukumana weiwo atthu anci-ene mphakha ohinaphwanyaneya opuro hata vamukhora. Yesu iira aalaleeryaka masu awe,

³okathi yoowo, aahiruuhiwa mulopwana oorakala, athatiwaka n'alopwana axexe.

⁴Nto okhala wira awo khiyaawerya ompixa opuro waari Yesu, mwaha wa muttitthi w'atthu, yaahiwela vampani khuvenula nipatho eluluwanyaka vaavalexa vaari Yesu, khumukuruxa mulopwan'owo oorakala emwaatalenle-ene vanrepani.

⁵Okathi Yesu voonaly'awe waamini w'aya, aahimuhimeerya murett'owo wira: ?Mwan'aka itampi s'anyu sooleveleliwa.?

⁶Nto awiixuttihi akina a ikano yaakilaanthe vaavale, vaaiwaly'aya masu awo, yaaniikoha yiiraka:

⁷?Muth'ula onlavulelani siiso? Ola onninveha Muluku! Taani onwerya olevelela itampi ahikhanle Muluku paah??

⁸Naanaanoru Yesu, asuwelaka muhina mwa mw'Erooho awe enamuna yaap'aya, owo aahaakoha iiraka: Exeeni munaap'anyu siiso mmirimani mw'anyu?

⁹Yookhweya omwiirela oorakal'ola: ?Itampi s'anyu sooleveleliwa?, hata omuleela wira: ?Nvenye mukuxe nrepa n'anyu muroweke owaani??

¹⁰Tthiri musuweleke wira Mwaana a Mutthu ookhalana vathi-va owerya w'olevelela itampi.

¹¹Nave amurukunuwelaka oorakal'owo aahimwirela wira: ?Nyuwo mukuxe nrepa n'anyu muroweke owaani.?

¹²Naanaanoru, mulopwan'owo aaheemela khuttukhula nrepa n'awe khurowa, atthu othene emoonaka. Othene yaahitikinihiwa n'ile y'onaly'aya enanvuwiha Muluku yiiraka: ?Khinnoone etthu ntoko yeela!?

¹³Yesu aahirowa-tho orattani w'oKalileya. Atthu yaahirowa omphavela nave owo aaniwiixuttiha.

¹⁴Ahokolowaka, aahimoona Levi, mwaana Alfewu akilaanthi-ene opuro waaliviwa mpooxito, nto khumwiirela: Mukitthare! Levi aahivenya khumutthara yoowo.

¹⁵Vahoolo v'aya, Yesu aahikilaathi vamosa n'awiixutti awe analya owany'awe Levi vamosa n'alipa ooliviha mpooxito n'atthu akina oonanara murima. Nave yaari atthu anci-ene yaamutthara Yesu.

¹⁶Nto awiixuttihi akina a ikano, a etiini y'aFarisi, vaamoonaly'aya owo aly'aka n'atthu ale, yaahaakoha awiixutti awe yiiraka: ?Vanikhala sayi ola aly'aka n'atthu oonanara murima n'alipa anliviha mpooxito??

¹⁷Yesu vaaiwaly'awe eyo nave khuwaakhula iiraka: ?Kahiyo atthu akumi tanimphavela mukulukhana; aretta tanimphavela mukulukhana. Nto nkirweenle owiihana anaxariya, kaarweenle alipa oottheka.?

¹⁸Nihiku nimosa awiixutti a Yohani Mpatisa ni awiixutti a aFarisi yaatthukw'aya, yaahirowa omukoha Yesu yiiraka: ?Exeeni eniiriha awiixutti a Yohani Mpatisa ni awiixutti a aFarisi otthukwaka nto awiixutt'anyu ehinatthukwa??

¹⁹Yesu aahiwaakhula wira: ?Anamalattuliwa a niira n'othela akhala ootthukwaka mutheli anari ni yaawo? Tthiri nnaari!

²⁰Okathi onimoorwa aniir'aya yaakhiwe mutheli. Nihiku nenlo tanrow'aya otthukwaka.

²¹Khaavo onikhera ekuwo esya khuttotthela vakuwoni ya khalayi nto iira siiso ekuw'eyo esya enootthikelana ekhere ekuwo ele ya khalayi nave nipuro nlo nnimuncerereya.

²²Siiso-tho kheniheliwa eviinyu esya mmattonkani a khalayi okhala wira eviinyu eyo enoophutula mattonk'awo, siiso eviinyu enoohononeya vamosa ni mattonka. Tivo, eviinyu esya yiittheliweke mattonka masya.?

²³Nihiku nimosa na esaapatu, Yesu n'awiixutti awe yaanivira mmatta mwaaliwe etriku. Yeettaka siisaale mphironi, awiixutti yaanivurula makala a etriku khunakhuura.

²⁴Nto aFarisi yaahimukoha Yesu yiiraka: ?Mooneke aniirelani etthu ekhoottihiwe nihiku na Esaapatu?

²⁵Nave owo aahiwaakhula wira: ?Khamusomme etthu yiiraly'awe Taviti n'akhw'awe nihiku n'avoliw'aya etala yahaarin'aya etthu yoolya?

²⁶Aahikela mpaani mwa Muluku, okathi Apiyataari iir'awe ari mukhulupale a anamukuttho, khukhuura n'akhw'awe mikatthe s'oreerihiwa. Seiyo s'anikhoottihiwa okhuuriwa ahikhanle anamukuttho paahi.?

²⁷Khwaahimeerya-tho wira: Esaapatu tipakeliwe mutthu, kahiyo mutthu opakeliwe Esaapatu.

²⁸Tivo Mwaana a Mutthu hata Esaapatu ti Pwiya.