Mark 3

¹Esaapatu ekina, Yesu aahikela mpaani moothukumana mwaihaniwa musinakooka, nto aahimphwanya-mo mutthu oorakala ntata.

²Nave yaahikhala-tho memmo atthu yaaphavela ekiiswa y'omootherya Yesu wira khaniiwelela ikano. Tivo, vanwehexex'aya wira emoone aatthunaka onvoniha mutth'ule nihiku na Esaapatu.

³Nto Yesu aahimwirela mutth'ule oorakala ntata wira: ?Mweemele murwe eriyari-va.?

⁴Numala aahaakoha atthu ale wira: ?Etthu eneemiheriwa nihiku na Saapatu tiivi? Wira sooreera wala sootakhala? Omoopola mutthu wala ompwetexa? Ale khiyaakhulanse etthu.?

⁵Nto Yesu aahaawehexexa n'uviruwa ariipiwe-ene murima, mwaha w'olipa wa mirima saya, nto aahimwirela mutth'ule: ?Mookole ntata.? Owo aahookola ntata, khukhala nikumi.

⁶Afarisi yaahikhuma khurowa naanaano-ru othukumana n'atthu a Heroti wira evaanelele mamwiivelo Yesu.

⁷Nto aahirowa n'awiixutti nratta n'oKalileya ni w'animutthara muttitthi muulupale w'atthu. Akina yaakhuma oKalileya, oYuteya,

⁸oYerusalemu, a w'Itumeya ni ookhopela wa muro Yortani ni a mittetthe soorukurerya sa ilapo S'otiru ni s'oSitoni. Atthu awo othene yaarowela okumana ni Yesu mwaha woowiiwa mitikiniho siir'awe.

⁹Nto Yesu aahaaruma awiixutti awe ophavela ekalawa ekina wira muttitthi w'atthu ohimphunye.

¹⁰Vekeekhayi, mwaha owo wowavoniha atthu anci-ene, aretta othene yaaniphunyana ephavelaka ophiya vaary'awe wira emukwannye.

¹¹Nto ale yaarina minepa sootakhala, emoonakaru Yesu yaanimukokhorela ohoolo w'awe emukhuwelelaka wira: ?Nyuwo mwa Ooreera murima a Muluku.?

¹²Nto Yesu aahakhoottiherya n'ulipiherya wira ehimoonelelihe.

¹³Numala aahiwela omwaako khuwiitthana ale yaatthun'awe. Awo yaahimwaattamela

¹⁴nto owo nave aahaathanla muloko n'anli wira yeetteke ni yoowo, wira aarume olaleerya Ehapari Yooreera,

¹⁵nave wira ekhalane owerya wo woomola minepa sootakhala.

¹⁶Atthu awo t'ala: Simoni (yoowo Yesu aanvahaly'awe nsina na Petru).

¹⁷Yakopo ni Yohani, aana a Sepeteyo (yaawo oowanly'aya, Yesu aavahaly'awe nsina na Powanerxi, eyo piiyo, ?Aana a Etari?)

¹⁸Antere, Filipe, Partolomewu, Matewu, Tome, Yakopo mwaana a Alfewu, Tatewu, Simoni, muKanani.

¹⁹Ni Yuta Iskariyoti, yole anvarin'he Yesu.

²⁰Numala Yesu aahirowa owaani. Naanaanoru waahirowa-tho muttitthi muulupale w'atthu, nto Yesu khaawerya olya mwaha w'atthu owo.

²¹Okathi amusi awe Yesu vaasuwenly'aya etthu-ene yeeyo yaahimurowela, okhala wira akhala yaahimya wira owo aahivahuwa, okhwa anepa.

²²Awiixuttihi a ikano yaakhumme oYerusalemu yaanihimya wira: Ola ovariwe minepa sa Pelisepuli. Nave-tho yoowo toninvaha owerya wo woomola minepa sootakhala.

²³Nto Yesu aahiwiihana atthu ale othene khwaahimeerya ni nlikanyiho nla iiraka: Vaniweryaneya sayi Satana omoomola Satana?

²⁴Omwene mmosa waakawanyeyaka, khunwerya-tho okhala;

²⁵wa enamuna emosaru etthoko emosa yaakawanyeyaka, khenwerya okhala.

²⁶Vano nto Satana aaikumihenrye ekhotto mmans'awe owo ookawanyeya ommalela opweteya n'uhikhala-tho

²⁷Khaavo oniwerya ovolowa mpaani mwa mutthu ootupa wira amwiiyerye ahipacenrye omutthukwa. Nto siiso tunwery'awe wiiya mireerelo sa mpaani-mmo.

²⁸Kinnoohimeeryani ekeekhayi wira atthu a vathi va anooleveleliwa sothene: Itampi ni moolimo ooveeha anrow'aya olavula.

²⁹Nto ole onrowa oveeha Erooho Yooreera khanleveleliwa-tho wa mahiku othene, okhala wira owo oolamuleliwa etampi ehinimala.

³⁰Yesu aahimyale siiso mwaha w'atthu akina yaahimya wira owo ovariwe ni munepa wootakhala.

³¹Nave amey'awe naaxinn'awe Yesu yaahiphiya-wo, yaaheemela vate, nto yaahimwiihaniha

³²yaahikhalavo atthu anci-ene yaakilaanthe emurukuryenrye-ene nto ookhala aamuhimeenrye wira: ?Amaminyu naaxinn'anyu ari vate vale animoophavelani.?

³³Nto Yesu aahaakhula wira: ?Amaama ni axinnaka taani??

³⁴Aawehaka atthu ale yaakilanthe emurukuryenrye-ene aahiira: ?Amamaka n'axinnaka t'ala ari va

³⁵Tthiri othene ale aneettela otthuna wa Muluku, yaawo t'akhanle axinnaka, axirokoraka n'amey'aka.?