Mark 4

¹Yesu aahitthikela-tho wiixuttiha orattani w'oKalileya. Nto yaahithukumana atthu anci-ene mpakha owo oohoona vokhalavo khukela mukalawani. Khukilaathi memmo. Muttitthi w'atthu wahanle oxerexere wanratta

²Siiso aaniwiixuttiha atthu awo itthu sinci-ene ni malikanyiho. Awiixuttihaka siisale, aahahimeerya wira:

³Mwiiwe saana! Okathi mmosa mulipa oomisa aahivenya arowaka omisa epyo awe.

⁴Nave amisaka siisaale epyo ekina yaahimorela mphironi, nave ipalame saahithupa.

⁵Ekina yaahimorela va masoro-soroni, vahaakhanlevo etthaya yaari vasulu-sulu.

⁶Nto voopaly'aya nsuwa miri saya saahivya maana khisaarina mitathaari sinci-ene.

⁷Epyo ekina yaahimorela vamiiwani, iyo vaannuwaly'aya khuhim'etthu.

⁸Nto epyo ekina yaahimorela etthaya yoorera. Yaahinnuwa nave yaahiima mihokorokho: Mpakha miloko miloko miraru, ekina miloko mithanu namosa, ekina mpakha miloko muloko.

⁹Numala Yesu aahiira: ?Ori ni maaru oowiiwa tthiri onimwiiwa.?

¹⁰Okathi muttitthi w'atthu waaronw'aya ale yaahanle yaahithukumana n'awiixutti nto khunvekela wira aahimeerye nlikanyiho nle.

¹¹Vano nto Yesu aahahimeerya wira: ?Wa nyuwo Muluku ohootthuniheryani osuwela ekano ya omwen'awe, vano ale ahikhanle awihu sothene aniixuttihiwa ni malikanyiho,

¹²wira yonaka nto ehooneke, yiiweke nto ehisuweleke, maana yaamuhokolowela wa Muluku nave owo aamwaalevelela.?

¹³Yesu aahaakoha awo iiraka: ?Nyuwo mwaahisuweleke nlikanyiho nla, munrowa osuwela sayi malikanyiho makina?

¹⁴Mulipa oomisa epyo, t'ule onlaleya Ehapari Yooreera.

¹⁵Epyo yaamorenle mphironi t'ale aniiwa, Ehapari Yooreera vano naanaanoru anarwa Satana khuwaakha Ehapar'ile Yooreera yaaliwe mwa yaawo.

¹⁶Atthu akina ari ntoko epyo yaamorenle va masoro-soroni, anaakhela Ehapari Yooreera n'utteeliwa murima,

¹⁷nto kharina mitathaari soowiithipela. Siiso waaphwanyakaru ohaawa n'ulupatthiwa mwaha w'Ehapari Yooreera annihiya naanaanoru.

¹⁸Akina anikhala ntoko epyo yaamorenle vamiiwani. Awo t'ale aniiwa Ehapari ya Muluku,

¹⁹nto okathi onaaphwany'aya maxankiho, woototha wa mihakhu ni minkhela sikina inavuvurya ehapar'ile, nave eyo khuhinaima etthu.

²⁰Nto atthu akina ari ntoko epyo yaamorenle vatthayani yooreera: Anniiwa Ehapari ya Muluku, yaakhelela nave yiima mihokorokho, akina miloko miraru, akina miloko mithanu namosa n'akina-tho miloko muloko.?

²¹Yesu ahaahimeerya-tho wira: ?Ookhala mutthu onipattiha muthuko nto anakhuneela ni mwaapo wala onihela mukulukutheleni? Vanreerela kahi opweha nipuro vanimwaleel'aya saana?

²²Maana khiivo etthu envithiwa ehinrowa wooniheriwa nave sothene siniiraneya muhina mwa esiiri inimalela osuweliwa.

²³Ole orina maaru oowiiwa onimwiiwa.?

²⁴Nlelo ahaahimeerya-tho wira: ?Mwiiwe saana enoohimeeryakani! Mphimo onaaphimel'anyu akhwiinyu, Nyuwo munoophimeliwa ni yoowo ancereryaka.

²⁵Okhala wira ole orina sinci-ene, onimuncereriwa, nave ole orina vakhaani hata yeeyo vakhaani onimwaakhiwa.?

²⁶Yesu aahihimya-tho wira: ?Omwene wa Muluku onlikana ni epyo mutthu enaal'awe mmatta.

²⁷Hata mulipa oowaala arupaka wala ahirupaka, eyo enoomela khuyannuwa, mwaneene owo ahisuwelaka munnuwelo aya.

²⁸Etthaya eneene t'iniimiha mihokorokho ni mwiri tunipacerya nto khunarwa makala wiimaleloni waya khinarwa epyo.

²⁹Nto muhokorokh'owo wattokottha vale tuniphiyery'aya okathi w'ohepha.?

³⁰Nave aahihimya-tho wira: Nintthuna olikanyiha nxeeni omwene wa Muluku wala nintthuna otaphulela sayi?

³¹Owo onlikana n'inuku yamukhaani yeeyo enaakuva omela ovikana inuku sothene.

³²Numala yaaliwa vale, yamela enninnuwa ekhala mwiri muulupale ipalame khunateka ipuru mmirittani

³³Owo aaniixutthiha Masu a Muluku ni malikanyiho manci-ene ntoko saatthunihery'awe ale yaamwiiwa wira esuweleke.

³⁴Nave khaalavula voohikhala ni malikanyiho, vano sothene saalavulawe ni malikanyiho aanaataphulela awiixutti awe wiiphini.

³⁵Nihiku nenle makaaripi-ene, Yesu aahahimeerya awiixutti wira: Nrowe nlapuwele okhopela w'anratta;

³⁶awo nave yaahaahiya atthu ale anci-ene nto yaahimpakhira Yesu mu kalawani mwaakilanth'aya. Nave ikalawa sikina saahimutthara.

³⁷Nto yaahirwa epheyo yuulupale nave mawimpi yaahincerereya khunakela maasi mukalawani

³⁸Yesu iira arupaka ottuli w'ekalawa ahaamihenrye-ene esumaso muru awe. Awiixutti yaahinvenyiha nto khumwiirela: ?Apwiya, khamunoona wira nnimookhwa??

³⁹Owo aahivenya khupwapwela epheyo ni mawiimpi iiraka: ?Mmaale, mwiikhalele! Nave epheyo yaahimaala ni mawimpi varattani yaahikhalela.

⁴⁰Nto Yesu aahaakoha awiixutti iiraka: ?Exeeni eniwiirihani muhalaka woova? Nlelo khamurina waamini??

⁴¹V'ekeekhayi awo khiyaareere woova nto yaanikohana yaaworu yiiraka: Mutth'ula t'ani hata epheyo ni mawimpi anoomwiiwelela?