Matthew 10

¹Yesu aahiwiihana arummw'awe muloko n'anli, khwaavaha owerya wo woomola minepa sootakhala ni woovoniha iretta sothene ni sootakhala sa khula enamuna.

²Arummwa yaawo muloko nanli masin'aya t'ala: Oopacerya ti Simoni, iihaniwa-tho Petru, ni Antere munn'awe Petru, Yakopo mwaana a Sepeteyo ni Yohani, munn'awe Yakopo

³Filipe ni Partolomeu; Tome ni Matewu, mulipa-ooliviha mpoosito; Yakopo, mwaana a Alfeu ni Tateu;

⁴Simoni mukanaani, ni Yuta Iskariyoti, yoowo anvarihale Yesu.

⁵Awiixutti muloko nanli Yesu aahaaruma orowa olaleya ni khwaalaka wira: Muhihapuwele iphiro saamalapo, nnakhala muhikele mittetthe so Samariya;

⁶nto mphavele ipwittipwitthi soorimeela sa Isarayeli.

⁷Murowe mwalaleye wira: ?Omwene wa wirimu woophiya!?

⁸Mwaavonihe aretta, mwaarerihe anamakuttula, mwaahihimuxe atthu ookhwa, moomole minepa sootakhala. Siiso sivahiw'anyu mahala, nave-tho nvaheke mahala.

⁹Mwaarowaka, muhikuxe eweero, nnakhala eparatha, wala ekoopiri

¹⁰hata murupa, nnakhala soowara piili, wala ixapattho hata ttootto; maana namuteko onniphwanela ovahiwa yoolya.

¹¹Muttetthe ti muttetthe onrowaanyu ophiya, mmwavyeke mutthu oororomeleya; mukhaleke etthoko eyo mpakha okhuma elapo eyo.

¹²Nto mwaakelaka vatthokoni mukoheke murettele.

¹³Nave etthoko eyo yaphwanelela murettele anyu okhuruwele-vo; nto yaahiphwanelele, murettele owo wootthikeleni.

¹⁴Atthu yaahiwaakheleni, wala yaahitthune wiiwa masu anyu, mwavenyaka etthoko eyo wala muttetthe owo, mutatheke ntthupi na munawuni mwanyu.

¹⁵Kinoohimeeryani ekhweeli wira: Nihiku n'olamuliwa, atthu a oSotoma ni a oKomora anoomoreliwa ikharari waavikana atthu a elapo eyo.

¹⁶Mwiiwe! Miyo kinnoorumani ntoko ipwittipwitthi eriyari ya miici. Tivo, mukhale owiipasopa ntoko enoowa, oomaala ntoko ipompa.

¹⁷Nto mwiipasoope n'atthu! Awo animooroihani ohoolo wa makhulupale oophuka milattu, awo animoomanani mpaani mwaya moothukumana.

¹⁸Munooroihiwa ohoolo wa makhulupale a mulaponi ni ohoolo wa mamwene mwaha wa miyo, wira mukhale anamoon'aka vamaithoni vaya ni v'amalapo.

¹⁹Nto mwavahereriwa ohoolo wa makhulupale oophuka milattu, muhivelavele mwiiraka: ?N'akhule sayi? Wala nihimye exeeni?? Tthiri okathi ene yoowo Muluku onimoovahani moolumo oowakhula.

²⁰V'ekeekhayi kahiyo nyuwo munrowa olavula: Erooho Atiith'inyu tinrowa olavula mwa nyuwo.

²¹Nto munna onoovahererya munn'awe wira iiviwe, nave-tho tiithi onoonvahererya mwan'awe, ni anamwane animwaarukunuwela axitiithi aya, wira ewiivihe.

²²Nyuwo munoonyokhiwa n'atthu othene mwaha wa miyo. Nto ole onrowa ovilela mpakha weemaleloni, onimoopoliwa.

²³Mwaalupatthiwaka mmuttettheni, mutthyaweleke muttetthe mukina. Kinooleelani ekhweeli wira: Khamunimaliha weetteetta mittetthe sothene sa wIsarayeli, Mwaana a Mutthu ahirwiye.

²⁴Mwiixutti khaninvikana mwiixuttihi awe wala murumeyi khaninvikana Pwiy'awe.

²⁵Vanniphiyerya wira mwiixutti alikaneke ni mwiixuttihi awe, hata murumeyi alikaneke ni pwiy'awe. Vari mwaneene etthoko aihaniwa Satana, ankhi an'awe a vate anrowa wiihaniwa sayi?

²⁶?Muhiwoove y'awo, okhala wira khiivo evithiwe ehinrowa wooniheriwa, hata khiivo eniiriwa wiiphiini ehinrowa osuwelihiwa.?

²⁷Soothene sinoohimeeryakani wiiphini, mulaleyeke ota. Nave sothene siniiwanyu mwaapeliwaka owaruni, mulaleye vasulu v'empa.

²⁸Muhiwooveke ale aniiva erutthu, ehiweryaka wiiva erooho. Nto mmooveke Muluku, yoowo onwerya opwetexa erooho anyu vamosa ni erutthu omooroni.

²⁹Axipalame anli khantumihiwa ni enoota emosa paahi? Nto nnakhala mmosa khampweteya, Atiith'inyu ehitthunne.

³⁰Nto hata ikharari sa mmuruni mw'anyu sihalikeliwa sothene.

³¹Tivo, muhoove: Nyuwo muhaavikana axipalame oowaatta.

³²Tivo, ole onihimya vamaithoni v'atthu wira t'awaka, ni miyo-tho kinoomuhimya ohoolo w'Atiithi ari wirimu wira owo t'awaka.

³³Nave-tho ole onkiruna ohoolo w'Atthu, ni miyo-tho kinoomuruna ohoolo w'Atiithi ari wirimu.

³⁴Muhuupuwele wira miyo kiruuhale murettele mulaponi. Nkiruuhale murettele, kiruuhale ohiiwanana.

³⁵Maana miyo kirweenle w'akawanya atthu: Mwaana mwamulopwana ni tiithi awe, nave mwaana mwa muthiyana n'ame awe, muthiyana ootheliwa ni amaathi awe.

³⁶Siiso awanani awe mutthu anrowa okhala amusi awe.

³⁷Ole onaaphenta atiithi awe wala ame awe ovikana okiphenta miyo, khamphwanela okhala awaka. Ni ole onimphentexa mwan'awe mwamulopwana wala mwamuthiyana ovikana okiphenta miyo, khamphwanela okhala awaka.

³⁸Nave ole ohinikapatta mwikimanyo awe, anakitthara, khampwanela okhala awaka.

³⁹Ole onvarexexa ekumi awe, enoomurimeela; nave ole onirimeeliwa ekumi awe mwaha wokiphenta miyo, onoophwanya ekumi yeeyo.

⁴⁰Ole oniwaakhelani nyuwo, onikhaakhela miyo, ni ole onikhaakhela miyo, onimwaakhela ole okirumme.

⁴¹Ole onimwaakhela profeta mwaha w'okhala profeta, onootthuveliwa ntoko profeta; ole onimwaakhela naxariya mwaha w'okhala naxariya, onootthuveliwa ntoko naxariya.

⁴²Kinooleelani ekhweeli wira: Ole ontthuna onvaha maasi ooriirya, hata ekhale ekahi emosa paahi, aavahaka w'axikhaani ala mwaha wookhala mwiixutti aka, etthuvo awe khenimurimeela hata mano vakhaani.