Matthew 11

¹Yesu amalihaka-ru waavaha awiixutti awe muloko nanli miixuttiho iyo, aahivenya arowaka wiixuttiha n'ulaleya mittetthe soowattamela.

²Yohani Mpatisa, atthukeliw'ene mukhatteya, aahiiwa miteko siir'awe Kristu. Nto aahaaruma awiixutti awe anli,

³orowa omukoha Yesu wira: ?Ti nyuwo ole ontthuna orwa wala nimulipeleleke mukina??

⁴Yesu aahiwaakhula wira: ?Murowe mwamuleele Yohani itthu siniiwanyu ni sinoon'anyu.

⁵Alipa-oohoona, vano annoona; alipa-oorakala, annetta oratta-ene; anamakuttula annireerihiwa; atthu oohiiwa, vano anniiwa; atthu akhwiye annihihimuxiwa; atthu oohaawa annilaleeriwa Ehapari Yooreera.

⁶Ooreriwa t'ule ohinihiya okaamini miyo.?

⁷Awiixutti a Yohani v'aronw'aya, Yesu aahipacerya olavula n'atthu, alavulaka sa Yohani, aanaakoha wira: ?Nto munuupuwela wira mwaaronwe woona exeeni woothakoni? Mutthu ohilipalipa ntoko mutathi ottikinyiwa ni epheyo??

⁸Nto mwaaronwe woona-wo exeeni? Mutthu owanre soreerexa? Muupuwele wira ale anwara oratta-ene ankhala itthoko sa mamwene paahi.

⁹Vano-nto mwaaronwe woona-wo exeeni? Mwaaronwe omoona profeta? Ayo! Ni kinoolelani-tho wira: Owo muulupale onvikana profeta.

¹⁰Tthiri Yohani owo t'ule ohimmwe mwa Soolempwa wira: ?Kinoomuruma namuhupi aka ohoolo wanyu, wira alokiherye ephiro aka.?

¹¹Kinooleelani ekhweeli wira: Mwa atthu othene ayariwe ni muthiyana, khakhumelenle muulupale onvikana Yohani Mpatisa. Nto ole ori mukhaani momweneni wa wirimu, t'ori muulupale onvikana Yohani.

¹²Okhuma mahiku a Yohani Mpatisa mpakha vano, omwene wa wirimu onnihaaxiwa n'uwali nave alipa oowali tanikuxa yoowo.

¹³Maprofeta othene n'ikano sa Monse yaahilaleya omwene yoowo, mpakha mahiku a Yohani.

¹⁴Vano mwaatthunaka okikupali: Yohani ti Eliya yoowo aatthuna orwa.

¹⁵Ori ni maaru oowiiwa onimwiiwa.

¹⁶Vano kaalikanyihe n'ani atthu a mahiku ala? Ala anlikana n'anamwane ankilaathi mphironi khiyakhuwelelana yiiraka:

¹⁷?Hiyo nihoopa ikoma sootteeliha murima, nyuwo khuhiina! Nihiipa isipo sooriipiha murima, nyuwo khuhinla!?

¹⁸Nto ohoorwa Yohani Mpatisa, aatthukwa ni ahaawurya eviinyu, nto atthu yaahimya wira: ?Owo namukhwa anepa.?

¹⁹Vano ohoorwa Mwaana a Mutthu onlya ni onwurya, nave atthu anihimya wira: ?Mmooneke mutth'ule; namulya ni namuhapaliwa! Mpatthani a alipa-ooliviha mpoosito n'anatampi.? Nto ankhili a Muluku anooniheriwa ni miteko saya.

²⁰Nto Yesu ahipacerya opwapwela mittetthe iyo siiraly'awe mitikiniho sinci-ene, mwaha woohirukunuxa murima, ahimyaka wira:

²¹Mootakhaliwa nyuwo Korasini! Mootakhaliwa nyuwo Petisaita maana waakhanle wira oTiiro ni oSitoni saahipakiwa mitikiniho seiyo sipakiwe wa nyuwo, atthu anci-ene yaanwara isaakho ni yaamwiittikittela etthura vamuru, yooniheryaka orukunuxa waya murima.

²²Tivo, miyo kinooleelani wira: Nihiku noolamuliwa atthu aoTiru ni aoSitoni animooneliwa othunku woovikanani nyuwo.

²³Khi nyuwo, atthu aoKafarnawu, khino wunnuwa wanyu onoophiya wirimu? Nnaari! Omooroni paahi t'unrowanyu oriheliwa! Yaarookhala atthu a oSotoma yiireliwe sootikiniha siireliwanyu nyuwo, muttetthe ole waamukhala mpakha nihiku n'olelo.

²⁴Tivo, kinooleelani wira: ?Nihiku noolamuliwa atthu a oSotoma animooneliwa othunku woovikanani nyuwo.?

²⁵Okathi owo, Yesu aahihimya wira: Miyo kinnoottottopelani Tiithi Apwiya a wirimu ni vathi, okhala wira khimwaasuwelinhe itthu iya atthu oosuwela ni a miruku, khwaasuweliha axikhaani

²⁶Ayo, Tiithi maana ti siiso sitthunne anyu n'ureera wanyu murima

²⁷Itthu sothene kivahiwe n'Atiithi. Khaavo onimusuwela Mwaana, ehikhanle Atiithi: Nave khaavo onaasuwela Atiithi, ahikhanle Mwaana n'ale Mwaana ontthun'awe waasuweliha.

²⁸Murwe wa miyo nyuwo othene mulemeliwe ni muhaaxiwe, nto miyo kinimoomumulihani.

²⁹Mukuxe mukapatte ekheero aka nave mwiixutte sa miyo, kirina murima woomala ni oowiiyeviha, nto munoophwanya omumula muroohoni mw'anyu.

³⁰Okhala wira ekheero aka ti yookhweya nave muritti aka ti wooveya.