Matthew 12

¹Mahiku awo, nihiku n'esaapatu, Yesu aahivira ematta ya etriku. Nave awiixutti awe yaahivoliwa etala, khupacerya ovurula makala a etriku, enakhuura.

²Nto aFarisi voonalyaya siisale, yaahimuhimeerya Yesu wira: ?Mooneke, awiixutti anyu anniira etthu ekhoottihiwe nihiku n'esaapato.?

³Yesu ahiwaakhula wira: ?Khamusomme yiraly'awe Taviti nihiku naavoliw'awe etala n'akhw'awe?

⁴Owo aahikela mpaani mwa Muluku, khukhuura mikatthe saavelelihiwe Muluku, seiyo sahaakhanle sookhuuriwa ni yoowo nnakhala ni atthu yarinaawe: S'akhuriwa n'anamukuttho paahi.

⁵Wala khamusomme ikano sa Monse wira isaapatu anamukuttho mpaani mwa Muluku annitthekela nlamulo n'esaapatu khuhiyakhalana mulattu?

⁶Vano kinooleelani wira: Vava ookhala-vo mukhulupale ovikana empa ya Muluku!

⁷Nto nyuwo mw'asuwenle moolumo anihimya wira: ?Miyo kintthun'aka woonela othunku, nkintthuna mukuttho?, khamwakhanle oowaalamula atthu ahitthenke.

⁸Okhala wira, Mwaana a Mutthu Pwiya a esaapatu.

⁹Yesu aahikhuma vale, khukela mpaani mwaya moothukumana.

¹⁰Aahikhala-mo mulopwana mmosa aarakanle ntata. Atthu akina ephavelaka omukumiherya mulattu woomuhimyana Yesu, yaahimukoha wira: ?Vannitthunihiwa onvoniha mutthu nihiku na esaapatu??

¹¹Nto Yesu aahiwaakhula wira: ?T'ani a nyuwo, oniira akhalanne-ene epwittipwitthi awe, eyo yamorela mulittini moowiixa nihiku na esaapatu ahinarowa okumiha?

¹²Vano-tho mutthu khantepa ovikana epwittipwitthi, ikano sahu sinnitthuniherya ovara miteko sooreera nihiku na saapatu.?

¹³Numala aahimuhimeerya mulopwan'ole wira: ?Mookole ntata.? Owo aahookola, naanaanoru ntata naahivona nnalikana nnikhw'aya.

¹⁴Nto aFarisi ekhumakaru-mo, yaahithukumana, khiyavaanelela enamuna y'omwiiva Yesu.

¹⁵Yesu v'asuwenly'awe etthu ile, aahivenya vale, ni atthu anci-ene yaahimutthara. Nave owo aahaavoniha aretta othene.

¹⁶Nto aahaaruma n'ulipiherya wira ehimoonelelihe.

¹⁷Siiso sahiiraneya ntoko saahimyaly'awe Muluku ni moolumo a profeta Yesaya wira:

¹⁸Ola epotha aka, omuthanlaly'aka onimphent'aka, Eroho aka ennisiveliwa ni yoola; Miyo kinnohela Eroho aka mwa yoola, ni onimwaalaleerya amalapo olamuliwa.

¹⁹Owo khanrowa onyakulihana ni mutthu hata khanrowa onyakula ni khaavo onrowa wiiwa nsu nawe mmawaani

²⁰Owo khanrowa waapapwela n'uwali atthu oohilipalipa Owo onrowa okhala mutthu oothunku ni khanrowa waaliyala atthu oonyanyaliwa.

²¹Amalapo anookhalana ororomelo mwa nsina nawe.

²²Vano Yesu aahiruuheliwa mulopwana aavariwe munepa wootakhala, ahoona ni ahaalavula, nto owo aahinvoniha, khutthikela olavula ni woona.

²³Nave atthu othene yahitikinihiwa vanci-ene, khiyakohana wira: ?Ola kahi mwaana a Taviti??

²⁴Nto aFarisi yiiwalyaya siiso, awo yaanihimya wira: Ola onoomola minepa sootakhala n'uwerya wa Pelisepuli, mukhulupale a minepa sootakhala.

²⁵Yesu asuwelaka suupuwelaya, aahahimeerya wira: Omwene wookawanyeya yoworu, onoohononeya. Nave-tho muttetthe wala etthoko yookawanyeya yeeyoru, enoohononeya.

²⁶Nto wakhala wira Satana onimoomola Satana mukhw'awe, ohiikawanya mmansawe: Nto mwene awe onkhala-tho sayi?

²⁷Nto miyo koomolaka minepa sootakhala n'uwerya wa Pelisepuli, ankhi atthu anyu anoomola n'uwerya wa wani? Nto yaawo, tanrowa okhala aphuki anyu.

²⁸Miyo koomolaka minepa sootakhala n'uwerya wa Erooho ya Muluku, eyo enthoonyerya wira omwene wa Muluku woophiya wa nyuwo.

²⁹T'ani onwerya okela mpaani mwa mutthu omwaakha itthu sawe, aahipacenrye omutthuka mwaneene owo? Tthiri amutthukwa vale, taniweryawe omwaakha muhakhu awe.

³⁰Ole ohikhanle ni miyo, onnikivirikanya: Ole ohinthukumanya vamosa ni miyo, onoomwarexa.

³¹Tivo, miyo kinooleelani wira: Muluku onimwaalevelela atthu itampi s'aya sothene ni moolumo onveeha. Vano owo khanaalevelela atthu aniveeha Erooho Y'oreera.

³²Akhala mutthu oninveeha Mwaana a Mutthu, Muluku onoomulevelela; nto ole onveeha Erooho Yooreera khanleveleliwa-tho Hata okathi ula nnakhala okathi wa meelo.

³³Mwaphatteya mwiri wooreera, nave mihokorokho s'aya sooreera; mwaphatteya mwiri woohireera, nave mihokorokho s'aya khasinreera. Maana mwiri onsuwanyeya ni mihokorokho s'aya.

³⁴Nyuwo, nloko na ivili! Muniwerya sayi ohimya itthu sooreera, nyuwo muri ootakhala murima? Tthiri itthu sisanrye mmirimani mwa mutthu, seiyo eyano ennilavula.

³⁵Mutthu ooreera murima onnikumiha sooreera muroohoni mw'awe. Mutthu ootakhala murima onnikumiha sootakhala mmurimani mwawe mootakhala.

³⁶Miyo kinooleelani wira nihiku noolamuliwa, atthu anookohiwa mwaha wa moolumo othene oohiloka alavunly'aya.

³⁷Maana mwaha moolumo anyu munookhalihiwa anaxariya nave-tho mwaha moolumo anyu munoolamuliwa.

³⁸Awiixuttihi a ikano sa Monse ni aFarisi akina yaahimwirela Yesu wira: ?Mwiixuttihi, nintthuna wira mpake mitikiniho, hiyo noone.?

³⁹Yesu aahiwaakhula wira: Nloko nootakhala ni noohiiwelela ninvekela nthonyeryo. Nto khanvahiwa nikina, nihikhanle nthoonyeryo na profeta Yona.

⁴⁰Siiso ntoko Yona saakhanly'awe mahiku mararu otthana ni ohiyu ori mmirimani mw'ehopa yuulupale, nave-tho Mwaana a Mutthu onookhala mmahiye mahiku mararu othana ni ohiyu.

⁴¹Nihiku na mulattu, atthu aoNinive anoovenya waaphuka atthu a vano, animwaatthukela, okhala wira atthu yaawo aoNinive, yiiwakaru olaleya wa Yona, yaahirukunuxa mirima saya. Vano, vaava ookhala-vo mukhulupale onvikana Yona.

⁴²Nihiku nenlo noolamuliwa, Pwiyamwene a elapo yookusini, onoovenya aalamule atthu ala ni onimwatthukela, okhala wira owo okhumme wookiseryani w'elapo, arwaaka wira miruku sa Salomoni. Nto ola ori va muulupale oonvikana Salomoni.

⁴³Munepa wootakhala wamukhuma mutthu, onnettakasa moothakoni, ophavelaka nipuro n'omumula, ohinaphwanya.

⁴⁴Vano-nto waahiphwanye nipuro, owo onnihimya wira: ?Kinoohokolowela owanny'aka, weiwo okhumaly'aka.? Ophiyakaru onniphwanya empa eyo ehikhaliwaka, eveliwe-ene ni ererihiwe-ene oratta-ene.

⁴⁵Nto munepa owo onnirowela minepa sikina mithanu na miili sootepa otakahala, sonvikana owo, iyo sinnikela emp'eyo, khuyakhala memmo. Siiso makhalelo masya a mutthu'owo annitepa onanara ovikanaka mukhalelo wa khalayi. Vanrowa wiiraneya siiso wa nloko nla nootakhala.

⁴⁶Yesu nlelo alavulaka ni muttitthi w'atthu yaahirwa amey'awe ni axihim'awe khweemela ota. Aphavelaka olavula ni Yoowo.

⁴⁷Aahikhala mutthu aamuhimeenrye wira: ?Amam'inyu ni axihima'anyu ari vate vale, awo amphavela olavula ni nyuwo.?

⁴⁸Yesu aahimwakhula ole aamuleenle wira: ?Ameyaka t'ani? Wala axinn'aka t'ani?

⁴⁹Nto awookolelaka ntata awiixutti awe ahiira: ?Amam'aka ni axinn'aka t'ala!

⁵⁰Maana, ole oneettela otthuna w'atiithi aka, ari wirimu, owo tokhanle munn'aka, murokor'aka ni mam'aka.?