Matthew 13

¹Nihiku nenle, Yesu avenyaka owannyawe, aahikilathi okherekhere wa nratta.

²Vano muttitthi w'atthu waahithukumana ohoolo w'awe, nto Yesu aahikela mukalawani khukilaathi memmo, nave atthu awo othene yaahanle yeemenle-ene oxerexere wa nratta.

³Yesu aanixuttiha itthu sinci-ene ni malikanyiho, iiraka: Mulipa-oomisa aahivenya arowaka omisa epyo awe.

⁴Amisaka siisaale, epyo ekina yaahimorela mphironi, khurwa axinuni khuthupa epyo eyo.

⁵Epyo ekina yaahimorela vamalukuni, opuro wahaakhanle etthaya yinci-ene. Epyo eyo yaahimela naanaanoru, maana etthaya yaari vasulusulu.

⁶Nto voopalyaya nsuwa, yaahinyaala yuuma, maana khiyaarina mitathaari soowiixerya.

⁷Epyo ekina yaahimorela vamiiwani. Miiwa iyo sinnuwaka, saahivuvurya epyo eyo.

⁸Epyo ekina yaahimorela vatthayani voreera, khwiima mihokorokho sophiyeryaka miloko muloko, ekina miloko mithanu na mmosa, ekina miloko miraru.

⁹Ole orina maaru oowiiwa tthiri onimwiiwa.

¹⁰Nto awiixutti awe yaahimwaattamela, khumukoha wira: ?Exeeni waixuttihaka atthu ni malikanyiho??

¹¹Yesu aahiwaakhula wira: Nyuwo moovahiwa osuwela esiiri y'omwene wa wirimu, nto awo khavahiwe.

¹²Maana ole orina, onimuncereriwa, ni onookhalana soowaatta. Vano ole ohikhalanne hata ele erin'awe onimwaakhiwa.

¹³Tivo, awo vanaalavulel'aka ni malikanyiho; maana awo hata yoonaka, khanoona; yiiwaka, khaniiwa nnakhala khansuwela.

¹⁴Vaavo-nto annimaliheriwa moolumo a profeta Yesaya, anihimya wira: Nyuwo munimwiiwa oratta-ene masi khamunrowa asuwela; munooweha oratta-ene, nto khamunrowa woona.

¹⁵Maana murima w'atthu ala ti woolipa nave khaiwale oratta-ene ni maaru aya, nto aakhuneela maitho aya wira ehooneke ni maitho aya ni wira yiiweke ni maaru aya ni esuweleke ni murima nto erukunuxe murim'aya miyo kaavonihe.

¹⁶Nto ooreeriwa maitho anyu, okhala wira annoona, ni ooreeriwa maaru anyu, okhala wira anniiwa.

¹⁷Veekheekhayi kinooleelani wira: Maprofeta manci-ene ni anaxariya yaahiphavela woona itthu sinoon'anyu, khuhoona, ni yaahiphavela wiiwa itthu siniiw'anyu nto khuhiiwa.

¹⁸Nwiriyane enihimyaya nlikanyiho na mulipa-oomisa.

¹⁹Epyo yaamorenle mphironi t'ale aniiwa masu oomwene wa wirimu, nto ahinaakela mmaaruni, onarwa mutakhali owaakha ele yaaliwe mmurimani mw'aya.

²⁰Epyo yaamorenle vamasorosoroni t'ale aniiwa masu a Muluku enaakhela naanaanoru n'utteeliwa murima.

²¹Nto kharina mitathaari, nave waamini waya ori vakhaani. Siiso waaphwanya ohaawa n'ulupatthiwa mwaha wa Masu a Muluku Yooreera annihiya naanaanoru.

²²Nto epyo yaamorenle vamiiwani t'ale aniiwa masu a Muluku, nto mwaha woweeteteya w'aya n'itthu sa vathi ni woototha wa muhakhu onnivuvurya masu awo, khuhinaima mihokorokho.

²³Epyo yaamorenle vatthayani voowunttelana t'ale aniiwa masu a Muluku, enaakhela, eniima mihokorokho miloko muloko, akina miloko mithanu ni mosa ni akina-tho miloko miraru.

²⁴Yesu aahahimeerya atthu nlikanyiho nikina iiraka: Omwene wa wirimu onlikana ni mulopwana mmosa aanle epyo yooreera mmatta mw'awe.

²⁵Nto ohiyu mmosa, atthu othene erupaka, nwanani awe aahirwa ophatteya-mo nthakathaka mmatta memmo mwaaliwe etriku, khurowa.

²⁶Etriku vannuwalyaya, nthakathaka naninnuwa-tho vamosa ni etriku.

²⁷Anamuteko a mwaneene ematt'eyo yaahirowa omukoha pwiy'aya wira: Pwiya khimwaanle epyo yooreera mmatta mwanyu? Nto nthakathaka nle ninkhuma vayi?

²⁸Owo aahaakhula wira: ?Nwanani t'irale eyo? anamuteko yaahimukoha-tho wira: Munnitthuna wira hiyo naphele nthakathaka nlo?

²⁹Nto mwaneene aahiwaakhula wira: ?Nnaari! Maana mwaaphelaka nthakathaka, munoophela vamosa ni etriku.

³⁰Muhiye sinnuweke vamosa mpakha okathi woohepha. Nave okathi yoowo kintthun'aka waahimeerya alipa-oohepha wira: ?Mpacerye ophela nthakathaka, mutthukwe mavisi mpahe. Nto etriku muthukumanye ni muhele mmuruttuni mw'aka.?

³¹Yesu aahahimeerya atthu nlikanyiho nikina iiraka: Omwene wa wirimu onlikana n'inuku yaamukhaani-xa, mutthu mmosa aakuxaly'awe, khwaala mmatta mwawe.

³²Enuku iyo ti yamukhaanixa ovikana inuku sothene; nto yaannuwaka ennikhala yuulupale ovikana miri sothene ni ennikhala mwiri. Khuyarwa axinuni oteka ipuuru s'aya mmirittani mw'aya.

³³Yesu ahaahimeerya-tho nlikanyiho nikina iiraka: ?Omwene wa wirimu onlikana ni miropo, seiyo muthiyana sinkux'awe, khutakanyiha ni miphimo miraru sootthu, khweetheya. Nto otth'uwo woothene khuniipelana.?

³⁴Sothene iyo Yesu aahimeerya atthu ni malikanyiho, nave khiivo yaahimeenry'awe voohikhala ni malikanyiho.

³⁵Wira emaliheriwe ele yaahimmwe ni profeta, wira: ?Eyano aka kinootthukula ni malikanyiho, kinoolaleya itthu saavithiwe okhuma woopaceryani woolumwenku.?

³⁶Yesu aahihiya muttitthi w'atthu khurowa owaani. Nto awiixutti awe yaahimwaattamela, khumwiirela wira: ?Munitaphulele nlikanyiho na nthakathaka na mmatta.?

³⁷Yesu aahiwaakhula wira: ?Onaala epyo yooreera Mwaana a Muluku,

³⁸ematta, olumwenku. Epyo yooreera aana a omwene wa wirimu; nthakathaka t'ale akhanle aana a Satana.

³⁹Nwanani aalale epyo eyo yonanara ti Satana yoowo. Okathi woohepha, nihiku noomala olumwenku, ni alipa-oohepha a ankelo a Muluku.

⁴⁰Nto siisaale ninkuxiwaya nthakathaka nnaapahiwa va mooroni, siiso-tho vanimwiiraneya nihiku noomala olumwenku.

⁴¹Mwaana a Mutthu onimwaaruma Ankelo awe wira yathukumanye othene ale anatthekiha akhw'aya naale aniira sootakhala moomweneni mwawe,

⁴²Wira aarihele omooroni, weiwo onrowaya wunla ni olumanyiha maino.

⁴³Nto anaxariya anrowa waarya ntoko nsuwa, moomweneni mw'Atiithi aya. Ari ni maaru oowiiwa tthiri animwiiwa.?

⁴⁴Omwene wa wirumu onlikana ni muhakhu ovithiwe mmatta. Mutthu omphwany'awe muhakh'uwo khuvitha, nto asareiye-ene ottehiwa murima, onnirowa otumiha sothene sirin'awe, khuthuma ematta eyo.

⁴⁵Omwene wa wirimu onlikana-tho ni mulipa a nakoso omphavela maluku oowaaryexa.

⁴⁶Aphwanya nluku nowaarya ni noorikexa, onnirowa otumiha sothene sirin'awe, khuthuma nluku nlo.

⁴⁷Omwene wa wirimu onlikana-tho ni ntthavi ninriheliwa mmaasini, khunavara ihopa sa khula muxovo.

⁴⁸Nasareya ihopa, atothi annipurulela ntthavi ota, khukilaathi khuyathanla ihopa sooreera, ni khuyahela muttankani khunariha soonanara.

⁴⁹Siiso vanimwiraneya nihiku n'omala olumwenku; ankelo a Muluku animoorwa, yaavalaanye atakhali ni anaxariya.

⁵⁰Atakhali anooriheliwa omooroni, weiwo onrow'aya wunla ni olumanyiha maino.

⁵¹Yesu aahaakoha awiixutti awe wira: Muhiiwa saana itthu iya sothene? Awo yaahimwaakhula wira: ?Ayo, Pwiya nihiiwa!?

⁵²Vano Yesu aahahimeerya wira: Nto ole ori mwiixuttihi, iixuttihiwe oratta-ene omwene wa wirimu, onlikana ni mwaneene etthoko onkumih'awe mmuhakhuni mw'awe sooreera sa naanaano ni sa khalayi.

⁵³Nto Yesu vaamalihaly'awe malikanyiho ala, aahivenya-wo.

⁵⁴Vaaphiyaly'awe elapo awe, aaniwiixuttiha atthu mpaani mw'aya moothukumana, vano nto awo yaanitikinihiwa enahimya wira: ?Osuwela nno onimukhuma vayi, ni mitikiniho iya?

⁵⁵Kahiyo yoola mwaana a kalapinteero? Nave ame awe khaniitthaniwa Maria? Ni axinn'awe khaniitthaniwa yakopo ni Yosefe ni Simoni ni Yuta??

⁵⁶Khi axirokor'awe khanikhala othene aya eriyari ahu? Nto sinimukhuma vai sothene iya?

⁵⁷Tivo awo khiyaamwaamini. Vano Yesu aahahimeerya wira: ?Khaavo profeta onittittimihiwa mulaponi mwawe ni vatthokoni v'awe.

⁵⁸Tivo Yesu vahiiralya'awe miiriirya ni sotikiniha sinci-ene, mwaha w'ohaamini w'aya.?