Matthew 14

¹Mahiku awo, Heroti Kuvernatoro a oKalileya aahiiwa ovuwa wa Yesu.

²Nto aahahimeerya arumeyi awe wira: ?Owo ti Yohani Mpatisa; orohihimuwa mookhwaani! Tivo varin'awe ikuru soopaka mitikiniho.?

³Okhala wira Heroti aahiruma wira Yohani avariwe ni atthukiwe ni ariheliwe mukhatteya; owo iirale siiso mwaha wa Herotiya mwaara a Filipe, munn'awe Heroti uwo.

⁴Maana Yohani aanimuleela mahiku othene wira: ?Nyuwo khamurina exariya yoomuthela Herotiya, mwaara a munn'inyu.?

⁵Vano Heroti aaniphavela omwiiva Yohani, nto khinawoova atthu; maana atthu othene yanihimya wira Yohani aari profeta.

⁶Nto nihiku na niira nootthapeliwa oyariwa wa Heroti, mwaana mwamuthiyana a Herotiya aahiina ohoolo wa atthu yalattuliwe, khumusiveliha Heroti.

⁷Siiso Heroti aahimuroromeliha alaphelaka onvaha etthu piitthu yatthun'awe onvekela.

⁸?Mukivahe va, mukamelani, muru wa Yohani Mpatisa.?

⁹Kuvernatoro Heroti aahiriipiwa murima; nto mwaha woolapha wawe ni mwaha w'atthu yaalattunly'awe yaalya n'uwo aahiruma wira avahiwe.

¹⁰Nto aahiruma wikitthiwa muru Yohani Mpatisa mukhatteya.

¹¹Muru awe wahiruhiwa mukamelani, khuvahiwa mwali owo; n'uwo khurowa onvaha mai awe.

¹²Nto awiixutti a Yohani yaahirowela murutthu awe, khuvitha. Numala yaahirowa omuleela Yesu.

¹³Yesu vaaiwaly'awe ehaal'iyo, owo aahikela mukalawani khukhuma elapo eyo. Ahirowa mekh'awe moothakoni, wira akhale mekh'awe. Nto atthu vaasuwenly'aya yaahivenya mmittettheni mw'aya khumutthara Yesu mwentta vathi.

¹⁴Vaakhumalyawe mukalawani, ahoona muttitthi w'atthu, nto Yesu aahaamorela ikharari, khwaavoniha arett'aya.

¹⁵Makaaripi awiixutti yaahirowa okumana ni Yesu, khumuhimeerya wira: ?Vahanle wiila; nipuro nla moothakoni. Mwaamwarye atthu ala arowe mmawaani yathume yooly'aya.?

¹⁶Yesu aahiwaakhula wira: ?Khivantthuneya owiirela orowa atthu ala mwaavahe yeenyu yolya.?

¹⁷Vano awo yaahimuhimeerya wira: ?Hiyano va nrina mikatthe mithanu n'ihopa piili paahi.?

¹⁸Yesu aahiwiirela wira: ?Mukiruuhele va mikatthe iyo.?

¹⁹Nto aahaaruma atthu othene okilaathi vamalaxini. Numala ahikuxa mikatthe iyo mithanu n'ihopa piili, khuweha osulu. Aahimeyanya mikatthe iyo, khwaavaha awiixutti awe ni awo yaahaakawela atthu othene.

²⁰Atthu othene yaahikhuura mpakha ovona. Numala yaahittotteliwa mapattuxa yahanle, khusarya ittanka muloko ni piili.

²¹Atthu yaakhuurale yaahanle ophiyerya miloko mithanu alopwana-ru paahi waahiya athiyana n'anamwane.

²²Numala, Yesu aahaaruma awiixutti awe okela mukalawani wira ahooleke olapuwela okhopela w'anratta; okhala wira owo aahala aamwaryaka atthu.

²³Vaamwanry'awe muttitthi owo w'atthu, aahiwela vamwaako wiphiini wira avekele. Vahiila nlelo ori weiwo mekh'awe.

²⁴Nave ekalawa yaahitteivelana okerekhere waakhummy'aya, emaniwaka ni mawimpi, okhala wira yaarowa waakhum'aya epheyo.

²⁵Vahalaka oxa Yesu aahirowa okumaana n'awiixutti ettaka vasulu va maasi.

²⁶Nto awiixutti vamoonaly'aya eettaka vasulu va maasi, awo yaahituthuwa khwiira: ?Ole munepa, enakhuwela yoovaka.?

²⁷Nto Yesu ahaakuva waalavuliha ahimyaka wira: ?Mukurunuxe murima; ti miyo. Muhoove.?

²⁸Petru aahimwaakhula wira: ?Pwiya, mwaari nyuwo, kirumeeni kirwe wa nyuwo, keettaka vasulu va maasi.?

²⁹Yesu ahiira: Murweeke! Petru aahikhuma mukalawani, khupacerya weetta vasulu va maasi arowaka wa Yesu.

³⁰Nto oonaka epheyo yaatepa woopa, aahoova. Nave apaceryaka osama ahikhuwela iiraka: ?Pwiya mukoopole.?

³¹Naanaanoru Yesu aahimookolela ntata ni khunvarela; nto aahimwirela wira: ?Nyuwo mutthu oowaamini vakhaani, mun'hoveryani?

³²Vaakenly'aya mukalawani, epheyo yaahimaala.

³³Nto ale yaahanle mukalawani yaahimukokhorela Yesu, yiiraka: ?V'ekeekhayi nyuwo mwa Mwaana a Muluku.?

³⁴Vaalapunwaya, yaahiphiya elapo y'oXenesare.

³⁵Atthu a elapo eyo, emusuwelaka-ru Yesu, yaahiruma olaleiwa mapuro othene. Vano atthu yaahimuruuhela aretta othene,

³⁶Siiso yaaninvekela wira aahiye hata vakhaani avare nlaya okherekhere w'aya paahi. Nto othene ale yaanvanre yaahivonihiwa.