اول يوحنا 2

¹ای زما ګرانو بچیانو، زه دا خبرې د دې دپاره تاسو ته لیکم چې تاسو ګناه ونه کړئ. خو که چېرې څوک ګناه وکړي، نو د پلار سره زمونږ یو څوک شته چې زمونږ شفاعت به کوي، یعنې عیسی مسیح چې عادل دی.

²هغه په خپله زمونږ د ګناهونو کفاره کوونکی دی، یوازې زمونږ د ګناهونو دپاره نه بلکې د ټولې نړۍ د ګناهونو دپاره.

³که چېرې مونږ د هغه په حکمونو باندې عمل وکړو نو ډاډه یو چې هغه پېژنو.

⁴که چېرې څوک وایي چې زه هغه پېژنم، خو د هغه په حکمونو باندې عمل نه کوي نو هغه دروغجن دی او هېڅ رښتیا په هغه کې نشته.

⁵خو که څوک د هغه په کلام باندې عمل کوي نو د هغه په زړه کې په رښتیا سره د خدای دپاره مینه کامله شوې ده. نو په دې ډول کولای شو په دې ډاډه شو چې مونږ د خدای سره ملګرتیا لرو.

⁶که چېرې څوک ووایي چې هغه د خدای سره په شراکت کې اوسیږي، نو باید داسې ژوند وکړي لکه څنګه چې عیسی کاوه.

⁷ګرانو دوستانو، زه تاسو ته کوم نوی حکم نه لیکم بلکې دا زوړ حکم دی، یعنې هغه حکم چې د پیل نه تاسو ته درکړل شوی دی. دا زوړ حکم هماغه پیغام دی چې پخوا مو اورېدلی دی.

⁸خو بیاهم زه تاسو ته یو نوی حکم لیکم او د هغه رښتینولي هم په مسیح او هم په تاسو کې لیدل کیږي. ځکه چې تیاره ورکیږي او حقیقي رڼا د ځلېدلو په حال کې ده.

⁹که څوک دا دعوه کوي چې هغه په رڼا کې ژوند تېروي خو د خپل ورور نه کرکه کوي نو هغه لا تر اوسه په تیاره کې دی.

¹⁰که څوک د خپل ورور سره مینه کوي، نو هغه په رڼا کې اوسیږي او د ګناه سبب به نه شي.

¹¹خو که څوک د ورونو نه کرکه کوي نو هغه به په تیاره کې ژوند کوي او په تیاره کې به روان وي او په دې به نه پوهیږي چې چېرته روان دی، ځکه چې تیارې د هغه سترګې ړندې کړي دي.

¹²ای ګرانو بچیانو، زه تاسو ته لیکم ځکه چې ستاسو ګناهونه د مسیح د نوم په خاطر بخښل شوي دي.

¹³ای پلرونو، زه تاسو ته لیکم ځکه چې تاسو هغه پېژنئ چې له ازله موجود دی.ای ځوانانو، زه تاسو ته لیکم ځکه چې تاسو په شیطان باندې بریالي شوي یئ.

¹⁴ای ګرانو بچیانو، تاسو ته مې ولیکل، ځکه چې تاسو پلار پېژنئ.ای پلرونو، تاسو ته مې ولیکل ځکه چې تاسو هغه پېژنئ چې له ازله موجود دی.ای ځوانانو، ما تاسو ته ولیکل، ځکه چې تاسو قوي یئ او د خدای کلام په تاسو کې اوسیږي او تاسو په شیطان باندې بریالي شوي یئ.

¹⁵د نړۍ او هغو شیانو سره چې په نړۍ کې دي مینه مه کوئ، ځکه څوک چې د نړۍ سره مینه کوي په هغه کې د پلار خدای دپاره مینه نشته.

¹⁶ځکه چې هر هغه څه چې په نړۍ کې دي یعنې نفساني خواهشات، د سترګو شوق او هرڅه چې خلک ورباندې غرور کوي، هغه د پلار له خوا نه بلکې د دې نړۍ شیان دي.

¹⁷دنیاوي خواهشات تېرېدونکي دي، خو څوک چې د خدای رضا پوره کوي هغه به تل ترتله ژوندی وي.

¹⁸ګرانو بچیانو، دا اخرنی وخت دی. تاسو اورېدلي وو چې د مسیح دښمن راروان دی او اوس د مسیح ډېر دښمنان راښکاره شوي دي، نو له دې امله مونږ پوهېږو چې دا اخرنی وخت دی.

¹⁹دا خلک زمونږ سره نه وو، نو ځکه هغوی زمونږ نه لاړل. که هغوی زمونږ وای نو زمونږ سره به پاتې شوي وای. خو کله چې هغوی لاړل نو معلومه شوه چې هغوی په رښتیا سره زمونږ نه وو.

²⁰خو د خدای سپېڅلی تاسو ته روح القدس درکړی دی، نو له همدې امله تاسو ټولو ته حقیقت معلوم دی.

²¹نو دا مې تاسو ته له دې امله نه دي لیکلي چې د حقیقت څخه بې خبره یئ، بلکې دا چې تاسو ورباندې خبر یئ او همدارنګه تاسو پوهېږئ چې دروغ هېڅکله هم د رښتیا څخه نه راپیدا کیږي.

²²نو بیا هغه دروغجن څوک دی؟ دا هغه څوک دی چې وایي چې عیسی هماغه مسیح نه دی. دا سړی د مسیح دښمن دی ځکه چې هغه پلار او زوی دواړو نه مني.

²³څوک چې زوی نه مني نو پلار هم نه مني او څوک چې زوی ومني نو پلار یې هم منلی دی.

²⁴نو ګورئ، تاسو چې له پیل نه کوم څه اورېدلي دي هغه په خپلو زړونو کې وساتئ. که داسې وکړئ نو تاسو به هم د زوی او پلار سره په شراکت کې واوسېږئ.

²⁵او دا هغه څه دي چې خپله مسیح وعده کړې ده چې مونږ ته به تلپاتې ژوندون راکوي.

²⁶زه دا شیان د هغو خلکو په هکله تاسو ته لیکم چې غواړي تاسو بې لارې کړي.

²⁷خو مسیح تاسو ته روح القدس درکړی دی او هغه په تاسو کې اوسیږي، نو تاسو اړتیا نه لرئ چې کوم څوک درته تعلیم درکړي. ځکه چې روح القدس تاسو ته د ټولو شیانو په هکله تعلیم درکوي او د هغه تعلیم حقیقي تعلیم دی او دروغ په کې نشته. نو لکه څنګه چې هغه درته تعلیم درکړی دی د هغه سره په شراکت کې واوسېږئ.

²⁸هو، ای ګرانو بچیانو! د هغه سره په شراکت کې اوسئ چې کله هغه راښکاره شي نو مونږ به ډاډه اوسو او د هغه په راتللو سره به د هغه په حضور کې ونه شرمېږو.

²⁹څرنګه چې تاسو په دې پوه شوي یئ چې مسیح عادل دی نو باید ډاډه اوسئ چې هرڅوک چې عدالت کوي هغه د خدای روحاني اولاد دی.