اول يوحنا 5

¹هرڅوک چې په دې باندې ایمان لري چې عیسی هماغه مسیح دی، نو هغه د خدای اولاد دی او په هرچا باندې چې پلار ګران وي نو د هغه اولاد به هم ورباندې ګران وي.

²که چېرې مونږ د خدای سره مینه ولرو او د هغه په حکمونو باندې عمل وکړو نو بیا مونږ پوهېږو چې د خدای د اولادونو سره مینه کوو.

³دا د خدای سره مینه ده چې د هغه په حکمونو باندې عمل وکړو. د هغه حکمونه سخت نه دي،

⁴ځکه چې د خدای هر اولاد کولای شي چې په نړۍ باندې بری ومومي او دا بری زمونږ د ایمان په وسیله تر لاسه کیږي.

⁵هغه څوک دی چې په نړۍ باندې بری مومي؟ یوازې هغه څوک چې په دې ایمان لري چې عیسی د خدای زوی دی.

⁶عیسی مسیح هغه څوک دی چې د اوبو د تعمید او د خپلې وینې په تویولو سره راغی. هغه یوازې د اوبو سره نه بلکې د اوبو او وینو دواړو سره راغی. او روح القدس د دې شاهدي ورکوي، ځکه چې روح القدس حقیقت دی.

⁷نو درې شاهدان شته:

⁸یعنې روح القدس، اوبه او وینه، او درې واړه سره یو دي.

⁹څرنګه چې مونږ د انسان شاهدي قبلوو، نو د خدای شاهدي ډېره قوي ده او دا هغه شاهدي ده چې هغه د خپل زوی په هکله ورکړې ده.

¹⁰هرڅوک چې د خدای په زوی باندې ایمان لري نو دا شاهدي به د هغه په زړه کې وي. خو څوک چې په خدای ایمان نه لري نو هغه خدای دروغجن ګڼي، ځکه چې هغه د خدای په شاهدۍ باندې چې د خپل زوی په هکله یې ورکړې ده، ایمان نه لري.

¹¹هغه شاهدي دا ده: خدای مونږ ته تلپاتې ژوندون راکړی دی او دا ژوندون د هغه په زوی کې دی.

¹²د هرچا سره چې د خدای زوی وي نو هغه تلپاتې ژوندون لري او د چا سره چې د خدای زوی نه وي نو هغه تلپاتې ژوندون نه لري.

¹³دا خبرې مې تاسو ته چې د خدای د زوی په نوم ایمان لرئ، ولیکلې چې په دې پوه شئ چې تلپاتې ژوندون لرئ.

¹⁴او دا هغه اعتماد دی چې مونږ یې په خدای لرو چې که د هغه نه کوم څه چې د هغه د رضا سره برابر وي وغواړو نو هغه به یې اوري.

¹⁵که چېرې مونږ په دې پوهېږو چې کله چې د هغه نه هرڅه وغواړو نو هغه یې اوري، نو په دې باندې هم باید پوه شو چې که هرڅه د هغه څخه وغواړو نو مونږ ته یې راکوي.

¹⁶که چېرې څوک خپل ورور په داسې ګناه کولو وویني چې پایله یې مرګ نه وي، نو د هغه دپاره دې خدای ته دعا وکړي او خدای به ورته ژوند ورکړي، یعنې هغه چاته چې داسې ګناه یې نه ده کړې چې انجام یې مرګ وي. خو داسې ګناه هم شته چې انجام یې مرګ دی او زه دا نه وایم چې تاسو د هغه دپاره دعا وکړئ.

¹⁷ټول بد کارونه ګناه ده، خو داسې ګناه هم شته چې انجام یې مرګ نه وي.

¹⁸مونږ پوهېږو چې د خدای اولادونه د ګناه کولو عادت نه لري، ځکه چې د خدای زوی د هغوی ساتنه کوي او شیطان ورته زیان نه شي رسولی.

¹⁹مونږ پوهېږو چې د خدای یو، او نوره ټوله نړۍ د شیطان د لاس لاندې ده.

²⁰مونږ پوهېږو چې د خدای زوی راغلی دی او مونږ ته یې پوهه راکړه چې رښتینی خدای وپېژنو. مونږ د رښتیني خدای او د هغه د زوی عیسی مسیح سره ملګرتیا لرو. هغه رښتینی خدای او تلپاتې ژوندون دی.

²¹ګرانو بچیانو، خپل ځانونه د بتانو نه لېرې وساتئ.